Sunday, September 22, 2019

Prameya News7

Prameya News7, News7 Odia, Odisha Latest News, Odisha Current Headlines, Odisha News Online

କାଲି ବାହୁଡା, ଆଜି ସଂଧ୍ୟା ୭ଟା ପରେ ଶ୍ରୀଜୀଉଙ୍କ ସାଂଧ୍ୟ ଦର୍ଶନ ବନ୍ଦ, ଶ୍ରୀକ୍ଷେତ୍ରରେ ଲକ୍ଷାଧିକ ଭକ୍ତ

ପୁରୀ୧୧|୭: ଆଡ଼ପ ମଣ୍ଡପରେ ଚାଲିଛି ମହାପ୍ରଭୁଙ୍କ ସଂଧ୍ୟା ଦର୍ଶନ । ଆଉ କିଛି ସମୟ ପରେ ଜନ୍ମବେଦୀରେ ଶ୍ରୀଜିଉଙ୍କୁ ଦର୍ଶନ କରିବାର ସୁଯୋଗ ସରିଯିବ । ପୁଣି ଆର ବର୍ଷକୁ ଅପେକ୍ଷା କରିବାକୁ ପଡ଼ିବ । ସଂଧ୍ୟାଦର୍ଶନ ପାଇଁ ଶ୍ରୀଗୁଣ୍ଡିଚା ମନ୍ଦିରରେ ଲକ୍ଷାଧିକ ଭକ୍ତଙ୍କ ଭିଡ଼ ଜମିଛି । ସଂଧ୍ୟା ୭ଟା ପରେ ସାଧାରଣ ଦର୍ଶନ ବନ୍ଦ ହୋଇଯିବ । ଏହାପରେ ଆସନ୍ତା କାଲି ମହାପ୍ରଭୁଙ୍କ ବାହୁଡ଼ା ଯାତ୍ରା ପାଇଁ ଚାଲିବ ପ୍ରସ୍ତୁତି ।….

ସେ ଶମ୍ଭୁପାଣି । ସେ ଚକ୍ରପାଣି । ସେ ସାରା ଜଗତର ପାଳନକର୍ତ୍ତା । ସେ ପୁରୁଷୋତ୍ତମ । ସେଇଥି ପାଇଁ ତ ଆଜି ପୁରୁଷୋତ୍ତମ କ୍ଷେତ୍ରରେ ତାଙ୍କ ଦର୍ଶନ ମାତ୍ରକ ପାଇଁ ଲାଗିଛି ଭକ୍ତଙ୍କ ଭିଡ଼ । ଆଡ଼ପ ମଣ୍ଡପରେ ମହାପ୍ରଭୁଙ୍କ ଶେଷ ଦର୍ଶନ ବା ସଂଧ୍ୟା ଦର୍ଶନ ପାଇଁ ଶ୍ରୀକ୍ଷେତ୍ରରେ ଲକ୍ଷାଧିକ ଭକ୍ତଙ୍କ ଗହଳି ଲାଗିଥିଲା । ମହାପ୍ରଭୁଙ୍କୁ ଦର୍ଶନ କରିବା ସହ ଆଡ଼ପ ଅବଢ଼ା ପାଇ ପୁରି ଉଠିଥିଲା ଭକ୍ତର ମନ ।

ଆସନ୍ତାକାଲି ମହାପ୍ରଭୁଙ୍କ ବାହୁଡ଼ା ଯାତ୍ରା । ପୁଣି ଶ୍ରୀମନ୍ଦିର ଅଭିମୁଖେ ବାହୁଡ଼ିବେ କାଳିଆ ସାଆନ୍ତ । ସେଥିପାଇଁ ମଧ୍ୟ ପ୍ରସ୍ତୁତି ଦରକାର । ତେଣୁ ଆଜି ସଅଳ ସଅଳ ଠାକୁରଙ୍କ ନୀତିକାନ୍ତି ହୋଇଛି । ଏମିତିକି ସଂଧ୍ୟା ୭ଟା ପରେ ଶ୍ରୀଗୁଣ୍ଡିଚା ମନ୍ଦିରରେ ସାଧାରଣ ଭକ୍ତଙ୍କ ଦର୍ଶନ ବନ୍ଦ କରାଯାଇଛି । ଏହା ପରେ ବାହୁଡ଼ା ଯାତ୍ରା ପାଇଁ ମହାପ୍ରଭୁଙ୍କ ସେନାପଟା ଲାଗି ନୀତି କରାଯିବ ।

ଆଜି ସଂଧ୍ୟା ଦର୍ଶନ ପାଇଁ ଲକ୍ଷାଧିକ ଭକ୍ତଙ୍କ ଭିଡ଼ ପୁଣି କାଲି ବାହୁଡ଼ାଯାତ୍ରା, ଏମିତିରେ ପୋଲିସ ପ୍ରଶାସିନ ପକ୍ଷରୁ ମଧ୍ୟ ବ୍ୟାପକ ସୁରକ୍ଷା ବନ୍ଦୋବସ୍ତ ଉପରେ ଗୁରୁତ୍ବ ଦିଆଯାଇଛି । ଶ୍ରୀଗୁଣ୍ଡିଚା ଯାତ୍ରା ଭଳି ବାହୁଡ଼ା ଯାତ୍ରାରେ ମଧ୍ୟ ସମାନ ଢ଼ଙ୍ଗରେ ପରିଚାଳନା ବ୍ୟବସ୍ଥା କରାଯାଇଛି ।

ଜନ୍ମବେଦୀରେ କାଳିଆ ଠାକୁରଙ୍କୁ ବ୍ୟସ୍ତକଲାଣି ମାଉସୀ ଘର ପୋଡ଼ ପିଠାର ମହକ । ବାହୁଡ଼ାଯାତ୍ରାରେ ମାଉସୀମା’ଙ୍କ ପାଖରେ ଟିକିଏ ଅଟକି ପୋଡ଼ପିଠା ଖାଇବାକୁ ମନ ଉଚ୍ଛନ୍ନ ହେଲାଣି । ସେପଟେ କଳାଶ୍ରୀମୁଖଙ୍କ ଅନ୍ତରର କଥାକୁ ବୁଝି ତାଙ୍କ ପାଇଁ ପୋଡ଼ ପିଠା ପ୍ରସ୍ତୁତିରେ ଲାଗିଛନ୍ତି ସେବାୟତ ।

କାଲି ବାହୁଡ଼ିବା ବେଳେ ମାଉସୀମା ମନ୍ଦିର ନିକଟରେ ଅଟକିବେ ତିନି ରଥ । କୁଡ଼ୁଆରେ ଲାଗିହେବ ପୋଡ଼ପିଠା । ପୋଡ଼ପିଠା ଖାଇ ପୁଣି ଶ୍ରୀମନ୍ଦିର ଅଭିମୁଖେ ବାହାରିବେ ଶ୍ରୀଜିଉ । ଶନିବାର ରଥାରୁଡ଼ ଚତୁର୍ଦ୍ଧାମୁର୍ତ୍ତିଙ୍କୁ ସୁନାବେଶରେ ଦର୍ଶନ କରିବେ ଭକ୍ତ । 

135 Views

   ସମ୍ବନ୍ଧିତ ଖବର