ଢାକା ୧୨।୦୨: ବଙ୍ଗୋପସାଗରେ ବୁଡିଲା ଡଙ୍ଗା । ବାଂଲାଦେଶରୁ ମାଲେସିଆ ଯାଉଥିବା ଏକ ଯାତ୍ରାବାହୀ ଡଙ୍ଗା ବୁଡିଯାଇ ୧୫ଜଣ ଯାତ୍ରୀଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଡଙ୍ଗା ବୁଡିରେ ନିଖୋଜ ଥିବା ଯାତ୍ରୀମାନଙ୍କୁ ସନ୍ଧାନ ପାଇଁ ଉଦ୍ଧାର କାର୍ଯ୍ୟ ଜାରି ରହିଛି । ସମସ୍ତ ମୃତକ ରୋହିଙ୍ଗ୍ୟା ଶରଣାର୍ଥୀ ହୋଇଥିବା ଅନୁମାନ କରାଯାଉଛି ।
ସୂଚନାଯୋଗ୍ୟ ଯେ, ମଙ୍ଗଳବାର ଦିନ ବାଂଲାଦେଶରୁ ମାଲେସିଆ ଯାଉଥିବା ଏକ ଯାତ୍ରୀବାହୀ ଡଙ୍ଗା ବଙ୍ଗୋପସାଗରରେ ଯାତ୍ରାକରୁଥିଲା । ମଙ୍ଗଳବାର ଦିନ ସକାଳ ୭ଟା ସମୟରେ ହଠାତ୍ ଡଙ୍ଗାଟି ବୁଡିଯାଇଥିଲା । ଡଙ୍ଗା ବୁଡି ଦ୍ବାରା ୧୫ଜଣ ଯାତ୍ରୀ ମୃତ୍ୟୁବରଣ କରିଥିବା ବେଳେ ୭୦ଜଣ ଲୋକଙ୍କ ସୁରକ୍ଷିତ ଭାବେ ଉଦ୍ଧାର କରାଯାଇଛି । ତେବେ ଡଙ୍ଗାରେ ଯାତ୍ରା କରୁଥିବା ଯାତ୍ରୀମାନଙ୍କ ମଧ୍ୟରୁ ୪୦ଜଣ ନିଖୋଜ ଥିବା ସୂଚନା ରହିଛି । ନିଖୋଜ ଥିବା ସମସ୍ତ ବ୍ୟକ୍ତିଙ୍କୁ ଉଦ୍ଧାର ପାଇଁ ସେନା ବାହିନୀର ସହଯୋଗ ମଗାଯାଇଛି । ସେନାବାହିନୀ , ସ୍ଥାନୀୟ ଉଦ୍ଧାରକାରୀ ଦଳ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ତେବେ ସ୍ଥାନୀୟ ସେନା ଅଧିକାରୀଙ୍କ ସୂଚନାନୁସାରେ ଡଙ୍ଗାରେ ପ୍ରାୟ ୩୦୦ରୁ ଅଧିକ ଜଣ ଯାତ୍ରା କରୁଥିଲେ । ବର୍ତ୍ତମାନ ସୁଦ୍ଧା ଡଙ୍ଗା ବୁଡିର କାରଣ ଅସ୍ପଷ୍ଟ ରହିଛି ।