ନୂଆଦିଲ୍ଲୀ ୦୬/୧୧: ଗତ ମାସରେ ବର୍ଲିନରେ ଥିବା ଋଷର ଦୂତାବାସ ସାମ୍ନାରେ ଜଣେ ଯୁବକଙ୍କ ମୃତଦେହ ଠାବ ହୋଇଥିଲା । ତେବେ ମୃତକ ଜଣଙ୍କ ଗୁପ୍ତଚର ବୋଲି ଜର୍ମାନ ସୁରକ୍ଷା ବାହିନୀ ପ୍ରକାଶ କରିଛି । ମୃତକଜଣଙ୍କ ଋଷ ଏଫଏସବିର ସଦସ୍ୟର ବୋଲି ଅନୁମାନ କରାଯାଉଛି ।
ସୂଚନାନୁସାରେ, ଗତ ମାସ ୧୯ ତାରିଖରେ ଯୁବକଙ୍କ ମୃତଦେହ ଠାବ ହୋଇଥିଲା । ଯାହା ବର୍ଲିନରେ ଅବସ୍ଥିତ ଋଷ ଦୂତାବାସ ସାମ୍ନାରେ ପଡିଥିଲା । ଦୂତାବାସର ଉପର ମହଲାରୁ ପଡି ସେ ପ୍ରାଣ ହରାଇଥିଲେ । ତେବେ ସେ କିପରି ପଡିଥିଲେ ତାହା ଏବେସୁଦ୍ଧା ଅସ୍ପଷ୍ଟ ରହିଛି ।
ଡେର୍ ସ୍ପିଗଲ୍ ମାଗାଜିନ୍ ଅନୁସାରେ, ପ୍ରଥମେ ଋଷ ଦୂତାବାସ ମୃତକଜଣଙ୍କୁ ନିଜର କର୍ମଚାରୀ ବୋଲି କହିଥିଲା । ତେବେ ଆଉ କିଛି ଅଧିକା ତଥ୍ୟ ଦେବାକୁ ଦୂତାବାସ ମନା କରିଦେଇଥିଲା । କିନ୍ତୁ ଜର୍ମାନୀ ସୁରକ୍ଷା ବାହିନୀ ଅଲଗା କଥା କହୁଛି । ଋଷିଆ ଗୁଇନ୍ଦା ସଂସ୍ଥାର ସେ ଏଜେଣ୍ଟ୍ । ଏହାସହ ସେ ଜଣେ ଉଚ୍ଚ ପଦସ୍ଥ ଅଧିକାରୀ ବୋଲି ଜର୍ମାନୀ କହିଛି ।
ତେବେ କ୍ରେମଲିନ୍ ମୃତ୍ୟୁ ସହ ଦୂତାବାସର କୌଣସି ସମ୍ପର୍କ ନଥିବା ସଫେଇ ଦେଇଛି । ଏପରିକି ଋଷ୍ ଦୂତାବାସ ମଧ୍ୟ ମୃତ ଅଧିକାରୀ ଗୁପ୍ତଚର ନୁହେଁ ବୋଲି କହିଛି । ଆହୁରି ମଧ୍ୟ ବିଭିନ୍ନ ଗଣମାଧ୍ୟମରେ ପ୍ରକାଶିତ ରିପୋର୍ଟ ମିଛ । ଏଥିରେ କୌଣସି ସତ୍ୟତା ନଥିବା ଋଷ କହିଛି ।