ଗଞ୍ଜାମ ୨୮/୬: ବଡ଼ ଡକାୟତ ଗ୍ୟାଙ୍ଗକୁ କାବୁ କଲା ଦିଗପହଣ୍ଡି ଥାନା ପୋଲିସ। ଏହା ସହ ବଡ଼ ଧରଣର ଡାକାୟତି ଯେଜନାକୁ ପଣ୍ଡ କରି ପୋଲିସ ୫ କୁଖ୍ୟାତ ଡକାୟତଙ୍କୁ ଗିରଫ ମଧ୍ୟ କରିଛି । ଗଞ୍ଜାମ ଜିଲ୍ଲା ଦିଗପହଣ୍ଡି ଅଞ୍ଚଳରେ ଅସାମାଜିକ ଯୁବକଙ୍କ ଦ୍ବାରା ବିଭିନ୍ନ ସମୟରେ ଚୋରି , ଡକାୟତି, ଲୁଟ୍ ଆଦି ଲୋକଙ୍କୁ ଭୟଭୀତ କରି ରଖିଛି। କିନ୍ତୁ ରବିବାର ବିଳମ୍ବିତ ରାତିରେ ଦିଗପହଣ୍ଡି ଥାନା କାଶି ବିଶ୍ବନାଥ ମନ୍ଦିର ଯିବା ରାସ୍ତାରେ କମଳାପୁର ଛକ ନିକଟରେ ଏକ ବଡ଼ ଡକାୟତି ଗ୍ୟାଙ୍ଗକୁ ପୋଲିସ ଧରିବାରେ ସଫଳ ହୋଇଥିବା ବେଳେ ୫ ଜଣକୁ ଗିରଫ ମଧ୍ୟ କରିଛି । ତେବେ ପୋଲିସ ଅଭିଯୁକ୍ତ ମାନଙ୍କ ନିକଟରୁ ୪ଟି ବୋମା ସମେତ ବହୁ ମାରଣାସ୍ତ୍ର ଜବତ କରିଥିବା ସୂଚନା ମିଳିଛି ।
ଗିରଫ ଅଭିଯୁକ୍ତ ମାନଙ୍କ ମଧ୍ୟରେ କାଳିଆ ସାହୁ (୨୯) , ସନ୍ତୋଷ ସାହୁ (୩୨) ବିକାଶ ମହାପାତ୍ର (୩୪) , ବାଦଲ ନାଇକ (୧୯) , ପିଣ୍ଟୁ ବେହେରା (୨୮) ରହିଥିବା ବେଳେ ସମସ୍ତ ଅଭିଯୁକ୍ତ ହେଲେ ବ୍ରହ୍ମପୁର ବଡ଼ବଜାର ଥାନା ଅଞ୍ଚଳର । ଖବର ଅନୁଯାୟୀ , ଗତକାଲି ସଟଡାଉନ କଟକଣା ଜାରି ରହିଥିବା ବେଳେ ରାତି ପ୍ରାୟ ସାଢେ଼ ଗୋଟାଏ ସମୟରେ ଦିଗପହଣ୍ଡି ପୋଲିସ ଏସ୍ ଆଇ ମାଧବ ଚନ୍ଦ୍ର ଟାକିରୀ ଓ କର୍ମଚାରୀମାନେ କଇଠଖଣ୍ଡି , ତଲାସିଙ୍ଗି , ଭୂଷୁଣ୍ଡା ଆଦି ଗ୍ରାମରେ ପାଟ୍ରୋଲିଂ ସାରି ଫେରୁଥିବା ସମୟରେ କମଳାପୁର ଛକ ନିକଟବର୍ତ୍ତୀ ଏକ ଗଛ ମୂଳରେ ଅଭିଯୁକ୍ତମାନେ ତଲାସିଙ୍ଗି ଏସବିଆଇ ବ୍ୟାଙ୍କକୁ ଲୁଟିବା ପାଇଁ ଯୋଜନା କରୁଥିଲେ ।
ତେବେ ଦିଗପହଣ୍ଡି ପୋଲିସ ଏହି ବାଟରେ ଯିବା ସମୟରେ ଡକାୟତି ଗ୍ୟାଙ୍ଗଙ୍କ କଥା ଶୁଣିଥିଲେ । ଏହାପରେ ପୋଲିସ ଚାରିପଟେ ନାକାବନ୍ଦୀ କରି ଅଭିଯୁକ୍ତଙ୍କୁ ଘେରାଉ କରିଥିଲା । ଅଭିଯୁକ୍ତ ମାନେ ପୋଲିସକୁ ଚକମା ଦେବାକୁ ଚେଷ୍ଟା ଚଳାଇଥିଲେ ମଧ୍ୟ ପୋଲିସ କବଜାରୁ ବର୍ତ୍ତି ପାରିନଥିଲେ । ତେବେ ପୋଲିସ ସମସ୍ତ ଅଭିଯୁକ୍ତମାନଙ୍କୁ ଗିରଫ କରିବା ସହ ଡକାୟତି ଯୋଜନା ନିମନ୍ତେ ବ୍ୟବହାର କରିଥିବା ବୋମା , ଲୁହାରଡ , ଲୁହା ପାଇପ , ୫ ଗୋଟି ମୋବାଇଲ ସମେତ କିଛି ମାରଣାସ୍ତ୍ର ମଧ୍ୟ ଜବତ କରିଥିଲା ।
ଏନେଇ ଦିଗପହଣ୍ଡି ପୋଲିସ ଥାନା କେସ୍ ନଂ ୧୬୨/୨୧ ଧାରା ୩୯୯/୪୦୨ ଆଇପିସି ଏବଂ ବିସ୍ଫୋରକ ନିୟନ୍ତ୍ରଣ ଆଇନ ଧାରା ୪ ଓ ୫ ଅନୁସାରେ ସମସ୍ତ ଅଭିଯୁକ୍ତଙ୍କ ବିରୁଦ୍ଧରେ ମକଦ୍ଦମା ରୁଜୁ କରାଯାଇ ସୋମବାର ଅପରାହ୍ନରେ କୋର୍ଟ ଚାଲାଣ କରାଯାଇଥିବା ବେଳେ ସେଠାରେ ଜାମିନ ନାମଞ୍ଜୁର ହେବାରୁ ଦିଗପହଣ୍ଡି ସବଜେଲ ହାଜତକୁ ପଠାଇ ଦିଆଯାଇଥିବା ଥାନା ଅଧିକାରୀ ବସନ୍ତ କୁମାର ସେଠୀ ସୂଚନା ଦେଇଛନ୍ତି।
