ମୁମ୍ବାଇ ୨୯/୮: ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ମାମଲାରେ ସିବିଆଇ ତଦନ୍ତର ଆଜି ନବମ ଦିନ। ରିୟା ଚକ୍ରବର୍ତ୍ତୀ ପୋଲିସ କର୍ମୀଙ୍କ ସୁରକ୍ଷାରେ ଡିଆରଡିଓ ଅଫିସ୍ ପହଞ୍ଚିଛନ୍ତି। ସିବିଆଇ ଏଠାରେ ତାଙ୍କୁ ପଚରାଉଚରା କରୁଛି।
ସୂଚନା ଅନୁଯାୟୀ ରିୟାଙ୍କୁ ସିଦ୍ଧାର୍ଥ ପିଠାନୀ, ନୀରଜ ସିଂହ ଏବଂ କେଶବ ବଚନେରଙ୍କ ସାମନାରେ ବସାଇ ପ୍ରଶ୍ନ ପଚରାଯାଇପାରେ। ଏହି ୩ଜଣ ଡିଆରଡିଓ ଗେଷ୍ଟ ହାଉସ୍ ପହଞ୍ଚି ସାରିଛନ୍ତି। ମୁମ୍ବାଇ ପୋଲିସର ୩ଜଣ ଅଫିସର ମଧ୍ୟ ସିବିଆଇ ପାଖରେ ପହଞ୍ଚିଛନ୍ତି। ସେପଟେ ,ଡ୍ରଗ୍ସ ମାମଲାର ଯାଞ୍ଚ କରୁଥିବା ନାର୍କୋଟିକ୍ସ କଣ୍ଟୋଲ୍ ବ୍ୟୁରୋ ମଧ୍ୟ ଆଜି ରିୟାଙ୍କୁ ପଚରାଉଚରା ପାଇଁ ସମନ ପଠାଇ ପାରେ। ଏନସିବି ମୁମ୍ବାଇରେ ୨ଜଣ ଡ୍ରଗ୍ସ ଚାଲାଣକାରୀଙ୍କୁ ଗିରଫ କରିଛି।
ଏହା ପୂର୍ବରୁ ଶୁକ୍ରବାର ସିବିଆଇ ରିୟାଙ୍କୁ ୧୦ଘଣ୍ଟା ପଚରାଉଚରା କରିଥିଲା। ରିୟା ସକାଳ ୧୧ଟାରେ ଡିଆରଡିଓ ଗେଷ୍ଟ ହାଉସ୍ ପହଞ୍ଚିଥିଲେ ଏବଂ ରାତି ୯ଟାରେ ସେଠାରୁ ବାହାରିଥିଲେ। ଏହା ପରେ ସାନ୍ତାକୃଜ ପୋଲିସ୍ ଷ୍ଟେସନ ପହଞ୍ଚିଥିଲେ। ସେ ନିଜ ସୋସାଇଟିରେ କେତେକ ସାମ୍ବାଦିକଙ୍କ ବିରୋଧରେ ବିକ୍ଷୋଭ କରିବାର ଅଭିଯୋଗ କରିଥିଲେ। ପରେ ପୋଲିସ୍ ଟିମ୍ ତାଙ୍କୁ ଘର ଯାଏଁ ଛାଡ଼ିବାକୁ ଯାଇଥିଲା।
