ଲକ୍ଷ୍ନୌ ୦୭/୧୨ : ଲଖୀମପୁର ଖିରୀ ହିଂସା ମାମଲାରେ କେନ୍ଦ୍ର ମନ୍ତ୍ରୀ ଅଜୟ ମିଶ୍ରାଙ୍କୁ ବଡ ଆଶ୍ବସ୍ତି ମିଳିଛି । କେନ୍ଦ୍ରମନ୍ତ୍ରୀଙ୍କ ବିରୁଦ୍ଧରେ ମାମଲା ରୁଜୁ କରିବା ନେଇ କୋର୍ଟରେ ହୋଇଥିବା ଯାଚିକାକୁ ଖାରଜ କରିଛନ୍ତି ଅଦାଲତ । ଲଖୀମପୁର ଖିରୀରେ ହୋଇଥିବା ହିଂସାରେ ୪ ଜଣ କୃଷକଙ୍କ ସମେତ ୮ ଜଣଙ୍କର ମୃତ୍ୟୁ ଘଟିଥିଲା । ଘଟଣାରେ ସାମ୍ବାଦିକ ରମଣ କଶ୍ୟପଙ୍କ ମଧ୍ୟ ମୃତ୍ୟୁ ଘଟିଥିଲା । ମୃତକ ସାମ୍ବାଦିକଙ୍କ ଭାଇ କେନ୍ଦ୍ରମନ୍ତ୍ରୀଙ୍କୁ ଗିରଫ କରିବା ନେଇ କୋର୍ଟରେ ଯାଚିକା ଦାଖଲ କରିଥିଲେ ।
ରମଣ କଶ୍ୟପଙ୍କ ଭାଇ କେନ୍ଦ୍ର ମନ୍ତ୍ରୀ ଅଜୟ ମିଶ୍ରାଙ୍କ ସମେତ ମୋଟ ୧୪ ଜଣଙ୍କ ବିରୁଦ୍ଧରେ ହତ୍ୟା ମାମଲା ରୁଜୁ କରିବା ପାଇଁ ଆବେଦନ କରିଥିଲେ । ତେବେ ଶୁଣାଣି ପରେ, କେନ୍ଦ୍ରମନ୍ତ୍ରୀଙ୍କ ବିରୁଦ୍ଧରେ ମାମଲାରେ ରୁଜୁ ହୋଇପାରିବ ନାହିଁ ବୋଲି କହିଥିଲେ ସିଜେଏମ୍ କୋର୍ଟ । ପରେ ମାମଲାର ଶୁଣାଣି ପାଇଁ ଡିସେମ୍ବର ୧କୁ ଦିନ ଧାର୍ଯ୍ୟ କରିଥିଲେ କୋର୍ଟ । ଶୁଣାଣି ପରେ ଡିସେମ୍ବର ୬ ତାରିଖରେ ରାୟ ପ୍ରକାଶ ପାଇଁ କହିଥିଲେ କୋର୍ଟ । କିନ୍ତୁ ପରେ ୭ ତାରିଖ ମଙ୍ଗଳବାର ରାୟ ଶୁଣାଇଥିଲେ ସିଜେଏମ୍ କୋର୍ଟ । ରାୟ ମୁତାବକ କେନ୍ଦ୍ରମନ୍ତ୍ରୀଙ୍କ ବିରୁଦ୍ଧରେ କୌଣସି ହତ୍ୟା ମାମଲା ରୁଜୁ କରାଯାଇପାରିନ ନାହିଁ ବୋଲି କୋର୍ଟ ସଫାସଫା ଶୁଣାଇଦେଇଛନ୍ତି ।