ଭୁବନେଶ୍ୱର ୨୦/୧୦ : ଦୀପାବଳିକୁ ଆଉ କିଛି ଦିନ ବାକି ରହିଲା। ହିନ୍ଦୁ ପାଞ୍ଜି ଅନୁସାରେ, କାର୍ତିକ ମାସ କୃଷ୍ଣ ପକ୍ଷ ଅମାବାସ୍ୟା ତିଥିରେ ଦୀପାବଳି ପାଳନ କରାଯାଏ। ଏଥର ଦୀପାବଳି ନଭେମ୍ବର ୪ ତାରିଖ ଗୁରୁବାର ଦିନ ପାଳନ କରାଯିବ। ଦୀପାବଳିରେ ଭଗବାନ ଗଣେଶ ଓ ମାତା ଲକ୍ଷ୍ମୀଙ୍କ ପୂଜାର ବିଶେଷ ମହତ୍ତ୍ୱ ରହିଛି। ଏଥର ଦୀପାବଳି ଦିନ ଗ୍ରହମାନଙ୍କର ଦୁର୍ଲଭ ସଂଯୋଗ ରହିଛି। ଜ୍ୟୋତିଷଙ୍କ ଅନୁଯାୟୀ, ଦୀପାବଳି ଦିନ ୪ ଗ୍ରହ ଗୋଟିଏ ରାଶିରେ ବିରାଜମାନ କରିବେ। ସେଥିପାଇଁ ଏଥର ଦୀପାବଳି ଅତ୍ୟନ୍ତ ଶୁଭ ବୋଲି କୁହାଯାଉଛି। ଭକ୍ତଙ୍କୁ ଭଗବାନ ଗଣେଶ ଓ ମା' ଲକ୍ଷ୍ମୀଙ୍କ ଆଶୀର୍ବାଦ ପ୍ରାପ୍ତ ହେବ।
ଦୀପାବଳିରେ ୪ ଗ୍ରହର ସଂଯୋଗ ହେଉଛି। ଦୀପାବଳି ଦିନ ତୁଳା ରାଶିରେ ସୂର୍ଯ୍ୟ, ବୁଧ, ମଙ୍ଗଳ ଓ ଚନ୍ଦ୍ରମା ବିରାଜମାନ କରିବେ। ତୁଳା ରାଶିର ଗୁରୁ ଗ୍ରହ ଶୁକ୍ର। ଶୁକ୍ର ଗ୍ରହକୁ ସୁଖ-ସମୃଦ୍ଧିର କାରକ ଗ୍ରହ କୁହାଯାଏ। ସୂର୍ଯ୍ୟଙ୍କୁ ଗ୍ରହମାନଙ୍କ ରାଜା, ମଙ୍ଗଳକୁ ଗ୍ରହମାନଙ୍କ ସେନାପତି ଓ ବୁଧକୁ ଗ୍ରହମାନଙ୍କ ରାଜକୁମାର କୁହାଯାଏ। ଚନ୍ଦ୍ରମାକୁ ମନର କାରକ ବୋଲି କୁହାଯାଏ।
ଦୀପାବଳି ଶୁଭ ମୁହୂର୍ତ୍ତ - ଅମାବାସ୍ୟା ତିଥି ନଭେମ୍ବର ୪ ତାରିଖ ସକାଳ ୬ଟା ୩ ମିନିଟରୁ ଆରମ୍ଭ ହୋଇ ୫ ତାରିଖ ସକାଳ ୨ଟା ୪୪ ମିନିଟରେ ସମାପ୍ତ ହେବ। ଦୀପାବଳିରେ ଲକ୍ଷ୍ମୀ ପୂଜା ସମୟ ସନ୍ଧ୍ୟା ୬ଟା ୯ ମିନିଟରୁ ରାତି ୮ଟା ୨୦ ମିନିଟ ଯାଏଁ ଅଛି। ଲକ୍ଷ୍ମୀ ପୂଜା ସମୟ ଏକ ଘଣ୍ଟା ୫୫ ମିନିଟ ରହିଛି।
ଧନତେରସ - ଏଥର ଧନତେରସ ନଭେମ୍ବର ୨ ତାରିଖ ମଙ୍ଗଳବାର ଦିନ ପଡୁଛି। ହିନ୍ଦୁ ପାଞ୍ଜି ଅନୁସାରେ ଧନତେରସ କୃଷ୍ଣ ପକ୍ଷ ତ୍ରୟୋଦଶୀ ତିଥିରେ ପାଳନ କରାଯାଏ। ଏହାକୁ ଧନ୍ଵନ୍ତରୀ ଜୟନ୍ତୀ ମଧ୍ୟ କୁହାଯାଏ।
