ନୂଆଦିଲ୍ଲୀ ୨୭।୬: କୋଭିଡ-୧୯ ମହାମାରୀ ଲାଗି କେନ୍ଦ୍ର ସରକାର ଖର୍ଚ୍ଚକାଟ ନୀତି ଆପଣେଇଛନ୍ତି। ଏଥିରେ ସରକାରୀ କର୍ମଚାରୀଙ୍କ ମହଙ୍ଗା ଭତ୍ତା ଓ ପେନସନଭୋଗୀଙ୍କ ଅତିରିକ୍ତ କିସ୍ତି ମଧ୍ୟ ସରକାର ଅଟକାଇ ଦେଇଛନ୍ତି । ଏବେ ରାଜ୍ୟ ସଭା କର୍ମଚାରୀଙ୍କ ଲାଗି ଏହି ନିୟମ ଲାଗୁ ହୋଇଛି। ଫଳରେ ୧ ଜାନୁୟାରୀ ୨୦୨୦ରେ ସରକାର କର୍ମଚାରୀଙ୍କ ଲାଗି ଘୋଷଣା କରାଯାଇଥିବା ମହଙ୍ଗା ଭତ୍ତାରୁ ରାଜ୍ୟସଭା କର୍ମଚାରୀ ମଧ୍ୟ ବଞ୍ଚିତ ହେବେ।
ଏ ନେଇ ରାଜ୍ୟସଭା ସଚିବାଳୟ ପକ୍ଷରୁ ଏକ ସର୍କୁଲାର ଜାରି କରାଯାଇଥିବା ବେଳେ ଏଥିରେ ଜୁନ୍ ୨୦୨୧ ପର୍ଯ୍ୟନ୍ତ କର୍ମଚାରୀଙ୍କୁ ମହଙ୍ଗା ଭତ୍ତା ପ୍ରଦାନ କରାଯାଇ ପାରିବ ନାହିଁ ବୋଲି ସୂଚିତ କରାଯାଇଛି। ସୂଚନା ଯୋଗ୍ୟଯେ କେନ୍ଦ୍ର ସରକାର କର୍ମଚାରୀଙ୍କ ଲାଗି ୧ ଜାନୁୟାରୀ ୨୦୨୦ରେ ଘୋଷଣା କରିଥିବା ମହଙ୍ଗା ଭତ୍ତାକୁ ଗତ ଏପ୍ରିଲ ମାସରେ ରୋକି ଦେଇଥିଲେ। କେନ୍ଦ୍ର ଅର୍ଥମନ୍ତ୍ରାଳୟଙ୍କ ବ୍ୟୟ ବିଭାଗ ପକ୍ଷରୁ ଏ ନେଇ ଜାରି ଆଦେଶରେ ପେନଶନଧାରୀଙ୍କୁ ମଧ୍ୟ ମହଙ୍ଗାଭତ୍ତା ଦିଆଯିବ ନାହିଁ ବୋଲି ସ୍ପଷ୍ଟ କରିଦେଇଥିଲେ।
ବ୍ୟୟ ବିଭାଗଙ୍କ ପତ୍ରରେ ୧ ଜୁଲାଇ ୨୦୨୦ ଓ ୧ ଜାନୁୟାରୀ ୨୦୨୧ରେ ଦେୟ ମହଙ୍ଗା ଭତ୍ତା ଓ ଅତିରିକ୍ତ ମହଙ୍ଗା କିସ୍ତି ମଧ୍ୟ ପୈଠ କରାଯିବନାହିଁ ବୋଲି ସୂଚିତ କରାଯାଇଥିଲା। ତେବେ ଏହି ବର୍ଦ୍ଧିତ ମହଙ୍ଗା ଭତ୍ତା ଜୁଲାଇ ୨୦୨୧ରୁ କର୍ମଚାରୀଙ୍କ ବେତନରେ ମିସାଇ ପ୍ରଦାନ କରାଯିବ ବୋଲି କୁହାଯାଇଛି।
