ଜୟପୁର,୦୯/୧୨: ରାଜସ୍ଥାନର ୨୧ଟି ଜିଲ୍ଲାରେ ଅନୁଷ୍ଠିତ ଜିଲ୍ଲା ପରିଷଦ ଓ ପଞ୍ଚାୟତ ସିରିଜ ନିର୍ବାଚନର ଫଳାଫଳ ସାମ୍ନାକୁ ଆସିଛି । ନିର୍ବାଚନରେ ବିଜେପି ଦମଦାର ପ୍ରଦର୍ଶନ କରିଛି । ଦଳ ୧୩ଟି ଜିଲ୍ଲା ପରିଷଦ କବଜା କରିଥିବା ବେଳେ କଂଗ୍ରେସ ମାତ୍ର ୫ଟି ଦଖଲ କରିଛି । ଏହି ୨୧ ଜିଲ୍ଲାର ୨୨୨ଟି ପଞ୍ଚାୟତ ସମିତି ନିର୍ବାଚନରେ ବିଜେପି ଦବଦବା ଜାହିର କରିଛି । କଂଗ୍ରେସକୁ ୮୧ଟି ଓ ବିଜେପି ଖାତାକୁ ୯୩ଟି ଆସନ ଯାଇଛି ।
ବିଜେପିର ବିଜୟକୁ ନେଇ ଦଳୀୟ କର୍ମୀ ଓ ନେତା ଖୁସି ମନାଇଛନ୍ତି । ରାଷ୍ଟ୍ରୀୟ ମହାସଚିବ ଏବଂ ରାଜସ୍ଥାନ ପ୍ରଭାରୀ ଅରୁଣ ସିଂ ବିଜେପିର ବିଜୟ ପାଇଁ ରାଜ୍ୟବାସୀଙ୍କୁ ଧନ୍ୟବାଦ ଜଣାଇଛନ୍ତି । ଏହାସହ ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି । ପରିଣାମ କଂଗ୍ରେସ ସରକାରର ଅହଂକାର ଓ ମିଛର ଫଳ ବୋଲି କହିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ।
ରାଜସ୍ଥାନରେ ୨୧ଟି ଜିଲ୍ଲାରେ ମୋଟ୍ ୨୨୨ଟି ପଞ୍ଚାୟତ ସମିତି ପାଇଁ ନିର୍ବାଚନ ଅନୁଷ୍ଠିତ ହୋଇଥିଲା । ଏହାମଧ୍ୟରୁ ୯୩ଟି ବିଜେପି ଓ ୮୧ଟି ଆସନରେ କଂଗ୍ରେସ ଜିତିଛି । ୪୨ଟି ଏପରି ପଞ୍ଚାୟତ ସମିତି ରହିଛି ଯେଉଁଠାରେ କେହି ହେଲେ ସଂଖ୍ୟାଗରିଷ୍ଠତା ହାସଲ କରିନାହାଁନ୍ତି । ୫ଟି ଅନ୍ୟଦଳ ଖାତାକୁ ଯାଇଛି ।