ଚାନ୍ଦବାଲି ୩୧।୦୧ : ଭିଜିଲାନ୍ସ ଓ ବନବିଭାଗର ମିଳିତ ଚଢାଉ । ଭଦ୍ରକ ଜିଲ୍ଲା ଧାମରା କଇଥଖୋଲା ବଜାରରେ ମିଳିତ ଭାବେ ଚଢାଉ ହୋଇଛି । ତେବେ ଏହି ଚଢାଉରେ ଲକ୍ଷାଧିକ ଟଙ୍କାର କାଠ ସହ ଅନ୍ୟାନ୍ୟ ସାମଗ୍ରୀ ଜବତ ହୋଇଛି ।
ଖବର ଅନୁଯାୟୀ, କଇଥଖୋଲା ବଜାରରେ ଥିବା ଖଲିଲ ଅଲ୍ଲି ଖାଁକ କାଠ ଦୋକାନରେ ବ୍ୟାପକ ପରିମାଣର ଚୋରା କାଠ ଥିବା ଖବର ପାଇଥିଲା ବନବିଭାଗ । ସଂପୃକ୍ତ ଦୋକାନକୁ ପଶ୍ଚିମବଙ୍ଗର କୋଲକାତା ଏବଂ କାନ୍ଥିରୁ ଚୋରାରେ କାଠ ଆସୁଛି । ଏହିସବୁ କାଠ ଯାତ୍ରୀବାହୀ ବସ୍ ଯୋଗେ ଆସୁଥିବାର ଅଭିଯୋଗ ହୋଇଥିଲା । ଅଭିଯୋଗକୁ ଭିତ୍ତିକରି ବନବିଭାଗ ଓ ଭିଜିଲାନ୍ସ ଟିମ୍ ମିଳିତ ଭାବେ ଚଢାଉ କରିଛି ।
ଏହି ଚଢାଉରେ ଧାମରା ବନପାଳ ,କରଞମାଳ ବନପାଳ , ଧାମରା ଥାନା ପୁଲିସ ଏବଂ ଭଦ୍ରକ ଭିଜିଲାନ୍ସ ଟିମର ବହୁ ସଦସ୍ୟ ଉପସ୍ଥିତ ରହିଥିଲେ । ସେହିପରି ଖଲିଲ ଅଲ୍ଲୀ ଖାଁଙ୍କ ଗୋଦାମ ଘରେ ମଧ୍ୟ ଚଢାଉ ହୋଇଛି। ସଂପୃକ୍ତ ବ୍ୟକ୍ତିଙ୍କ ଦୋକାନ ଘର ଏବଂ ଗୋଦାମରେ ବିପୁଳ ପରିମାଣର କାଠ ଜବତ ହୋଇଥିବା ଜଣାଯାଇଛି।