ଲକ୍ଷ୍ନୌ ୨୧।୮-- ଶିକ୍ଷାନୁଷ୍ଠାନରେ ରାଗିଂ ରୋକିବା ପାଇଁ କେତେ କଣ ନିୟମ । ଏପରିକି ରାଗିଂ କରୁଥିବା ଛାତ୍ରଛାତ୍ରୀମାନଙ୍କୁ ବହିଷ୍କାର କରିବା ପାଇଁ ମଧ୍ୟ ନିୟମ ରହିଛି । ହେଲେ ଉତ୍ତର ପ୍ରଦେଶର ଏକ ମେଡିକାଲ କଲେଜରେ ଏହି ନିୟମକୁ ଫୁ କରି ଉଡାଇ ଦିଆଯାଇଛି । ସିନିୟର ଛାତ୍ରମାନେ ପାଖାପାଖି ଦେଢ ଶହ ଛାତ୍ରଙ୍କୁ ଏପରି ରାଗିଂ କରିଛନ୍ତି ଯେ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ।
ଯାହାଁପନା ତୌଫା କବୁଲ ହୋ ।
ଥ୍ରି ଇଡିଏଟ୍ ଫିଲ୍ମର ଏହି ଦୃଶ୍ୟ ସମସ୍ତଙ୍କର ମନେଥିବ ନିଶ୍ଚିତ । ଯେଉଁଠି ପ୍ରଥମ ବର୍ଷର ଇଂଜିନିଅର ଛାତ୍ରଙ୍କୁ ରାଗିଂ କରୁଛନ୍ତି କିଛି ସିନିଅର ଛାତ୍ର । ତାହା ତ ଥିଲା ଫିଲ୍ମର ଦୃଶ୍ୟ କିନ୍ତୁ ଉତ୍ତରପ୍ରଦେଶର ଏକ ମେଡିକାଲ କଲେଜର ଦୃଶ୍ୟ ଏହାକୁ ବଳିଯାଇଛି । ଲଣ୍ଡା ହୋଇ ଛାତ୍ରମାନେ ଧାଡିରେ ହୋଇ ଚାଲିଛନ୍ତି । ସେମାନଙ୍କୁ ସାମୁହିକ ଲଣ୍ଡା କରାଯାଇଛି ଏବଂ ଧାଡିରେ ଚାଲିବାକୁ ବାଧ୍ୟ କରାଯାଇଛି । ଆଉ ଏପରି କରିବାକୁ ବାଧ୍ୟ କରିଛନ୍ତି ସିନିଅର ଛାତ୍ରମାନେ । ଏମ୍ବିବିଏସ୍ ପ୍ରଥମ ବର୍ଷର ୧୫୦ ଜଣ ଛାତ୍ରଙ୍କୁ ଲଣ୍ଡା କରି ଏପରି ଧାଡିରେ ଚଲାଯାଉଛି । ସେତିକି ନୁହେଁ ମେଡିକାଲ କଲେଜ୍ରେ ପାଠ ପଢିବାର ଅଛି ତ ସିନିଅରଙ୍କୁ ସାଲ୍ୟୁଟ୍ କରିବାକୁ ବି ବାଧ୍ୟ କରାଯାଉଛି । ଆଉ ଏହି କଥାକୁ ଜୁନିଅର ଛାତ୍ରମାନେ ପାଳନ କରି ସିନିଅରଙ୍କୁ ସାଲ୍ୟୁଟ କରି କ୍ଲାସ ରୁମ୍କୁ ଯାଉଛନ୍ତି ।
ଏହି ରାଗିଂ ଭିଡିଓ ଭାଇରାଲ୍ ହେବା ପରେ ୟୁନିଭର୍ସିଟି ପ୍ରଶାସନ ତତ୍ପର ହୋଇଛି । କ୍ୟାମ୍ପସରେ ରାଗିଂକୁ ଘୋର ବିରୋଧ କରାଯାଉଛି । ଏପରିକି ରାଗିଂ କରୁଥିବା ଛାତ୍ରଛାତ୍ରୀଙ୍କ ବିରୋଧରେ ପୂର୍ବରୁ ମଧ୍ୟ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ହୋଇଛି ବୋଲି ପ୍ରଶାସନ ପକ୍ଷରୁ କୁହାଯାଇଛି। ଯେଉଁମାନେ ଏଥିରେ ଜଡିତ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ପ୍ରକ୍ରିୟା ଆରମ୍ଭ ହୋଇଛି । ଏଥିପାଇଁ ଏକ କମିଟି ଗଠନ କରାଯାଇଛି । ରାଗିଂ କୁ ରୋକିବା ପାଇଁ ଦେଶର ଅନେକ ଆଇନ କାନୁନ ଅଛି । ହେଲେ ରାଗିଂ ରୋକାଯାଇପାରି ନାହିଁ ।
