ମସ୍କୋ, ୨୬|୦୭ : ସେଣ୍ଟ ପିଟର୍ସବର୍ଗରେ ଚାଲିଛି ଋଷର ଯୁଦ୍ଧାଭ୍ୟାସ । ଏହାମଧ୍ୟରେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଦେଶର ନୌସେନାର ଶକ୍ତି ବାବଦରେ ଆଲୋଚନା କରିଛନ୍ତି । ଏହାସହ ଲିଥଲ୍ ଷ୍ଟ୍ରାଇକ୍ ଉପରେ ପ୍ରତିକ୍ରିୟା ରଖିଛନ୍ତି। ଏହି ପ୍ରତିକ୍ରିୟା ସେତେବେଳେ ସାମ୍ନାକୁ ଆସିଛି ଯେତେବେଳେ ଦେଶର ସୈନ୍ୟ ଅଧିକାରୀ ନୂଆ ଜ୍ଞାନକୌଶଳରେ ନିର୍ମିତ ଅସ୍ତ୍ରଶସ୍ତ୍ରର ପରୀକ୍ଷା କରିବେ ବୋଲି କହିଥିଲେ । ଏଥିରୁ ଅନେକ ଅସ୍ତ୍ର ପୁଟିନଙ୍କ ଅସ୍ତ୍ରାଗରରୁ ଆସିଛି ଯାହାକୁ ପୁଟିନ ଅପରାଜେୟ ବୋଲି କହିଛନ୍ତି ।
ପୁଟିନ କହିଛନ୍ତି ଯେ, ଋଷ ନୌସେନା ପାଖରେ ସବୁ କ୍ଷମତା ବିଶିଷ୍ଟ ଅସ୍ତ୍ରଶସ୍ତ୍ର ରହିଛି । ଯାହାକୁ ଜାତୀୟ ସ୍ୱାର୍ଥରେ ଉପଯୋଗ କରାଯାଇପାରିବ । ସମୁଦ୍ର ତଳେ ଥିବା ଶତ୍ରୁର ରଣନୀତିକୁ ପଣ୍ଡ କରାଯାଇପାରିବ । ଏପରି ସ୍ଥିତିରେ ଲିଥାଲ ଷ୍ଟ୍ରାଇକ୍ ଆବଶ୍ୟକ ହୋଇଥାଏ । ଋଷ ପାଖରେ ବିଶ୍ୱର ଅନ୍ୟତମ ଶ୍ରେଷ୍ଠ ନୌସେନା ରହିଛି । ଅନେକ ଶକ୍ତିଶାଳୀ ହାଇପରସୋନିକ୍ ଅସ୍ତ୍ରଶସ୍ତ୍ର ରହିଛି। ଯାହାକୁ କୌଣସି ଅନ୍ୟ ଅସ୍ତ୍ର ଅଟକାଇ ପାରିବ ନାହିଁ । ଶତ୍ରୁକୁ ଚେକ୍ ଦେବାକୁ ଋଷ ପାଖରେ ଢେର୍ ଅଧିକ ବାଲିଷ୍ଟିକ୍ ମିସାଇଲଠୁ ଆରମ୍ଭ କରି ଗୋଳା ବାରୁଦ ଅଛି ବୋଲି ପୁଟିନ କହିଛନ୍ତି ।
ସୂଚନାଯୋଗ୍ୟ, ଦେଶର ନୌସେନାର ବାର୍ଷିକ ପରେଡ୍ ଉପଲକ୍ଷେ ପୁଟିନ ଏହା କହିଛନ୍ତି । ଏହି କାର୍ଯ୍ୟକ୍ରମରେ ପୁଟିନଙ୍କ ସହ ପ୍ରତିରକ୍ଷା ମନ୍ତ୍ରୀ ସେରଗେଇ ସୋଇଗୁ ମଧ୍ୟ ଉପସ୍ଥିତ ଥିଲେ ।
