ସକାଳୁ ଏଯାଏଁ ଖୋଲିନି ଶ୍ରୀମନ୍ଦିର । ଶ୍ରୀମନ୍ଦିର ଭିତର ଦ୍ବାର ଖୋଲିନି । ମହାପ୍ରଭୁଙ୍କ ସମସ୍ତ ନୀତିକାନ୍ତି ଠପ୍ । ଶ୍ରୀଜୀଉଙ୍କୁ ଦର୍ଶନ ନକରିପାରି ଭକ୍ତ ନିରାଶ । ନୂଆବର୍ଷ ପାଇଁ ପୁରୀରେ ହଜାର ହଜାର ଭକ୍ତଙ୍କ ଭିଡ ଲାଗିଛି । ଭକ୍ତ କିନ୍ତୁ ଦର୍ଶନ କରିପାରୁନାହାନ୍ତି । ବିଳମ୍ବରେ ସିଂହଦ୍ବାର ଖୋଲାଯାଇଥିଲେ ମଧ୍ୟ ଭିତର ଦୁଆର ବନ୍ଦ ରହିଛି । ପୋଲିସ-ସେବାୟତଙ୍କ ମଧ୍ୟରେ ଗଣ୍ଡଗୋଳ ଉଗ୍ର ରୂପ ନେଇଛି ।
ସେବାୟତଙ୍କୁ ସୁରକ୍ଷା କର୍ମୀଙ୍କ ମାଡ ପ୍ରତିବାଦରେ ନୀତିକାନ୍ତି ବନ୍ଦ ରହିଛି । ସମସ୍ୟାର ସମାଧାନ ପାଇଁ ପହଞ୍ଚିଲେ ଜିଲ୍ଲାପାଳ । ଗତକାଲି ସନ୍ଧ୍ୟାରେ ବଙ୍ଗାଳି ଭକ୍ତଙ୍କୁ ଶ୍ରୀମନ୍ଦିର ଭିତରକୁ ନେବାବେଳେ ସେମାନଙ୍କୁ ବିଦେଶୀ ଭକ୍ତ ସନ୍ଦେହ କରି ସୁରକ୍ଷା କର୍ମୀମାନେ ସିଂହ ଦ୍ବାର ନିକଟରେ ଅଟକାଇଥିଲେ । ସେମାନଙ୍କୁ ମନ୍ଦିର ଭିତରକୁ ନେଇ ଯାଉଥିବା ଭବାନୀ ମହାପାତ୍ର ଓ ୨ସୁରକ୍ଷା କର୍ମୀଙ୍କ ମଧ୍ୟରେ ଯୁକ୍ତି ତର୍କ ପରେ ହାତାହାତି ହୋଇଥିଲେ । ୨ ସୁରକ୍ଷା କର୍ମୀ ଜଣେ ସେବାୟତଙ୍କୁ ନିର୍ଦ୍ଧୁମ ପିଟିଥିବା ଅଭିଯୋଗ ହୋଇଛି । ସୁରକ୍ଷାକର୍ମୀଙ୍କ ମାଡରେ ଭବାନୀ ମହାପାତ୍ର ଆହତ ହୋଇଛନ୍ତି । ତାଙ୍କୁ ପୁରୀ ସଦର ମେଡିକାଲରେ ଭର୍ତ୍ତି କରାଯାଇଛି । ଭବାନୀ ମହାପାତ୍ର ଓ ପୋଲିସ କନେଷ୍ଟବଲ୍ ବିଶ୍ବଜିତ ପରିଜା ଉଭୟ ସିଂହଦ୍ବାର ଥାନାରେ ଏତଲା ଦେଇଛନ୍ତି । କୋଲକତାରୁ ଆସିଥିବା ସଂପୃକ୍ତ ଏସଏନପାଲ୍ ମଧ୍ୟ ପୋଲିସ ଦୁର୍ବ୍ୟବହାରର ଶିକାର ହୋଇଥିବା ଅଭିଯୋଗ କରିଛନ୍ତି ।
