ପାଟଣା, ୧୦/୦୩: ଗତ କିଛିଦିନ ଧରି ଶିମିଳିପାଳ ବନାଞ୍ଚଳ ଜଳୁଥିବା ବେଳେ ଏହାର ପ୍ରଭାବରେ ଚତୁର୍ଦ୍ଦିଗ ଧୁଆଁରେ ଆଚ୍ଛାଦିତ ହୋଇପଡିଛି । ଶିମିଳିପାଳର ସୀମାନ୍ତରେ ଥିବା ଗ୍ରାମଗୁଡିକ ଧୁଆଁର ବଳୟ ଭିତରେ ରହିବା ଭଳି ମନେ ହେଉଛି । ଏହି ଧୁଆଁ ଏବେ ସାରା ଅଞ୍ଚଳରେ କୁହୁଡିର ଭ୍ରମ ସୃଷ୍ଟି କରୁଥିବା ଦେଖିବାକୁ ମିଳିଛି ।
ଧୂଆଁ ପ୍ରଭାବରେ ଲୋକଙ୍କ ଆଖି ପୋଡୁଥିବା ଲୋକେ ପ୍ରକାଶ କରିଛନ୍ତି । ବିଶେଷ କରି ପାଟଣା ରେଞ୍ଜ ଦାମାହୁଦା, ମାଛଗଡ଼, ଗୋଜାପଥର, ବେଲସରେଇ, ଉଚ୍ଚାଟାଙ୍ଗର ଆଦି ଗ୍ରାମର ଲୋକେ ଏଥିରେ ଅଧିକ ପ୍ରଭାବିତ ହୋଇଥିବା ଜଣାପଡ଼ିଛି ।
ଲୋକେ ନିଶ୍ଵାସ ପ୍ରଶ୍ୱାସ ନେବାରେ କଷ୍ଟ ଅନୁଭବ କରୁଥିବା ବେଳେ ରାସ୍ତାରେ ଯାଉଥିବା ବାଇକ ଚାଳକମାନେ ଭଲ ଭାବେ ଦେଖି ପାରୁନଥିବାରୁ ଅସୁବିଧାର ସମ୍ମୁଖୀନ ହେଉଛନ୍ତି । ଅତିଶୀଘ୍ର ନିଆଁକୁ ଆୟତ୍ତ ନକରାଗଲେ ଏହାର କୁପ୍ରଭାବ ଜୀବଜଗତ ଓ ପରିବେଶ ଉପରେ ପଡିବ ବୋଲି ଆଶଙ୍କା ପ୍ରକାଶ ପାଇଛି ।