ବାରଣାସୀ ୧୩/୪ : କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ବାରଣାସୀରୁ ପ୍ରଧାନମନ୍ତ୍ରୀ ମୋଦିଙ୍କ ବିପକ୍ଷରେ ନିର୍ବାଚନ ଲଢ଼ି ପାରନ୍ତି | ମିଳିଥିବା ସୂଚନା ଅନୁଯାୟୀ, ପ୍ରିୟଙ୍କା ନିଜେ ମୋଦିଙ୍କ ବିପକ୍ଷରେ ନିର୍ବାଚନ ଲଢ଼ିବା ପାଇଁ ରାଜି ହୋଇଛନ୍ତି | କିନ୍ତୁ ପ୍ରିୟଙ୍କାଙ୍କ ନିର୍ଣ୍ଣୟ ସମ୍ପୂର୍ଣ ନିର୍ଣ୍ଣୟ ନୁହେଁ | ଶେଷ ନିଷ୍ପତ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଏବଂ ସୋନିଆ ଗାନ୍ଧୀ ନେବେ |
{"id":103174}
ମହାସଚିବ ହେବାପରେ ପ୍ରିୟଙ୍କା ଲଗାତାର ବିଭିନ୍ନ ଅଂଚଳ ପ୍ରଚାର କରୁଛନ୍ତି | ସମାଜବାଦୀ ପାର୍ଟି, ବହୁଜନ ସମାଜବାଦୀ ପାର୍ଟି ଏବଂ ରାଷ୍ଟ୍ରୀୟ ଲୋକଦଳ ମହାମେଣ୍ଟ କରି କଂଗ୍ରେସ ପାଇଁ ଉତ୍ତର ପ୍ରଦେଶରେ କେବଳ ୨ଟି ଆସନ ଛାଡିଥିଲା | କଂଗ୍ରେସ ମଧ୍ୟ ନିଜ ଚାଲ ଦେଖାଇଛି |
ପ୍ରିୟଙ୍କା ପ୍ରୟାଗରାଜ ଠାରୁ ବାରଣାସୀ ପ୍ରଚାର ଯାତ୍ରା କରିଛନ୍ତି | ବାରଣାସୀରେ କାଶୀ ବିଶ୍ୱନାଥ ମନ୍ଦିର ମଧ୍ୟ ଦର୍ଶନ କରିଛନ୍ତି | ସହିଦଙ୍କ ପରିବାରଲୋକଙ୍କୁ ମଧ୍ୟ ସାକ୍ଷାତ କରିଥିଲେ | ଏହାପରେ ପ୍ରଶ୍ନ ଉଠିଥିଲା ପ୍ରିୟଙ୍କା ବାରଣାସୀରୁ ନିର୍ବାଚନ ଲଢ଼ିବେ କି ? ସୂତ୍ର ଅନୁଯାୟୀ, ଗତ ନିର୍ବାଚନ ବେଳେ ମୋଦିଙ୍କ ବିପକ୍ଷରେ ଆପ, ସମାଜବାଦୀ ପାର୍ଟି, ବହୁଜନ ସମାଜବାଦୀ ପାର୍ଟି ଏବଂ କଂଗ୍ରେସ ଥିଲା | ୨୦୧୪ ନିର୍ବାଚନ ବେଳେ ମୋଦିଙ୍କ ସପକ୍ଷରେ ଥିଲା ନିର୍ବାଚନୀ ମାହୋଲ | ମୋଦି ନିଜର ନିକଟତମ ପ୍ରତିଦ୍ବନ୍ଦୀ ଅରବିନ୍ଦ କେଜ୍ରିୱାଲଙ୍କ ଠାରୁ ୩୭୧୭୮୪ ଭୋଟରେ ବିଜୟୀ ହୋଇଥିଲେ | ମୋଦିଙ୍କୁ ସମୁଦାୟ ୫୮୧୦୨୨ ଭୋଟ ମିଳିଥିବାବେଳେ କେଜ୍ରିୱାଲଙ୍କୁ ୨୦୯୧୩୮ ଭୋଟ ମିଳିଥିଲା | କଂଗ୍ରେସ ପ୍ରାର୍ଥୀ ଅଜୟ ରାୟ ୭୫୬୨୪ ଭୋଟ ପାଇ ତୃତୀୟ ସ୍ଥାନରେ ଥିଲେ |
ପ୍ରିୟଙ୍କାଙ୍କ ନିକଟବର୍ତ୍ତୀ କହିଛନ୍ତି ଯେ, ଏବେ ଦେଶରେ ଆଉ ମୋଦି ଲହର ନାହିଁ | ସେଥିପାଇଁ ଯଦି ପ୍ରିୟଙ୍କାଙ୍କ ଭଳି ମଜବୁତ ମୁହଁ ବାରଣାସୀ ନିର୍ବାଚନ ମୈଦାନକୁ ଓହ୍ଲାନ୍ତି ତାହେଲେ ବାରଣାସୀରେ କଂଗ୍ରେସ ଜିତିବା ସୁନିଶ୍ଚିତ | କିନ୍ତୁ ସେଥିପାଇଁ ସମାଜବାଦୀ ପାର୍ଟି ଏବଂ ବହୁଜନ ସମାଜବାଦୀ ପାର୍ଟି ମଧ୍ୟ କଂଗ୍ରେସକୁ ସହଯୋଗ କରିବା ଦରକାର |
ନିଜେ ପ୍ରିୟଙ୍କା ମଧ୍ୟ ଏହି ପ୍ରସଙ୍ଗ ଉପରେ ଗମ୍ଭୀର ଭାବେ ଚିନ୍ତା କରୁଛନ୍ତି | ରାଏବରେଲୀ କାର୍ଯ୍ୟକର୍ତ୍ତା କୌଣସି ଆସନରୁ ନିର୍ବାଚନ ଲଢ଼ିବା ପାଇଁ ପ୍ରିୟଙ୍କାଙ୍କ ନିକଟରେ ଦାବି କଲେ ପ୍ରିୟଙ୍କା ହସି ହସି ଜବ ଦେଉଛନ୍ତି, 'ବାରଣାସୀରୁ ଲଢ଼ିବି କି ?'
