ଦିଲ୍ଲୀ ୨୩|୧୧: ଦେଶୀ ଗର୍ଲ ପ୍ରିୟଙ୍କା ଚୋପ୍ରା ଖୁବ୍ଶୀଘ୍ର ନିକ୍ ଜୋନ୍ସଙ୍କୁ ବିବାହ କରି ବିଦେଶୀ ଗାର୍ଲ ହେବାକୁ ଯାଉଛନ୍ତି । ମାତ୍ର ଏ ଭିତରେ ନିକ୍ ଜୋନ୍ସ ଯେତେବେଳେ ସାତ ଦରିଆ ପାର ହୋଇ ତାଙ୍କୁ ଭେଟିବାକୁ ଦିଲ୍ଲୀ ପହଞ୍ଚିଥିଲେ ସେତେବେଳେ ପ୍ରିୟଙ୍କାଙ୍କ ଖୁସି ଆକାଶ ଛୁଇଁଥିଲା । ନିକ୍ଙ୍କୁ ଦେଖି ପ୍ରିୟଙ୍କା ଏତେ ଭାବବିହ୍ବଳ ହୋଇଯାଇଥିଲେ ଯେ, ସେହି ମୁହୂର୍ତ୍ତର ଏକ ରୋମାଣ୍ଟିକ ଫଟୋ ସୋସିଆଲ ମିଡିଆରେ ସେୟାର କରିଦେଇଥିଲେ । ପ୍ରିୟଙ୍କା ଏବଂ ନିକ୍ ବିବାହର ପ୍ରସ୍ତୁତି ମଧ୍ୟରେ ନିଜ ପରିବାର ସହ ଥ୍ୟାଂକ୍ସ ଗିଭିଙ୍ଗ୍ ଉତ୍ସବ ପାଳନ କରିଥିଲେ ।
ପ୍ରିୟଙ୍କା ଗୁରୁବାର ରାତିରେ ଇନ୍ଷ୍ଟାଗ୍ରାମରେ ଏକ ଫଟୋ ସେୟାର କରିଛନ୍ତି । ଯେଉଁଥିରେ ପ୍ରିୟଙ୍କା ନିକ୍ ଏବଂ ତାଙ୍କ ପରିବାର ସହ ଡିନର ଟେବଲରେ ବସିଥିଲେ । ଫଟୋରେ ଉଭୟ ଉଭୟଙ୍କ ହାତ ଧରିଥିବାର ନଜରକୁ ଆସିଥିଲା । ଫଟୋ ସହ ସେ ଲେଖିଥିଲେ “ଥ୍ୟାଂକ୍ସ ଗିଭିଙ୍ଗ ସମସ୍ତଙ୍କ ପାଇଁ ଶୁଭ ହେଉ, ମୋ ପରିବାର ସବୁବେଳ ପାଇଁ” ।
ନିକ୍ ମଧ୍ୟ ଏହି ଫଟୋ ସେୟାର କରିଛନ୍ତି । ସେ ଲେଖିଛନ୍ତି, “ଥ୍ୟାଂକ୍ସ ଗିଭିଙ୍ଗ୍ ଉତ୍ସବ ଭଲ ରହିଲା, ଭଲପାଉଥିବା ଆପଣ ସମସ୍ତଙ୍କ ସହ ସବୁଠୁ ଭଲ ଦିନ” । ନିକ୍ ଗୁରୁବାର ହିଁ ଦିଲ୍ଲୀ ପହଞ୍ଚିଥିଲେ । ପ୍ରିୟଙ୍କା ଭାରତକୁ ନିକ୍ଙ୍କୁ ସ୍ବାଗତ କରିଥିଲେ । ଇନ୍ଷ୍ଟାଗ୍ରାମରେ ଏକ ଫଟୋ ମଧ୍ୟ ସେ ସେୟାର କରିଥିଲେ । ଏହି ଫଟୋର କ୍ୟାପସନ ଦେଇଥିଲେ ପ୍ରିୟଙ୍କା - “ଓ୍ବେଲକମ୍ ହୋମ୍ ବେବି” । ଶୁଣାଯାଉଛି ଯେ ପ୍ରିୟଙ୍କା ଏବଂ ନିକ୍ ଡିସେମ୍ବରରେ ଯୋଧପୁରର ଭବ୍ୟ ଉମେଦ ଭବନ ପ୍ୟାଲେସରେ ବିବାହ କରିବେ । ପ୍ରିୟଙ୍କା ଏବେ ‘ଦ ସ୍କାଏ ଇଜ୍ ପିଙ୍କ୍’ ର ସୁଟିଂ ପାଇଁ ଦିଲ୍ଲୀରେ ଅଛନ୍ତି ।
