ନୂଆଦିଲ୍ଲୀ,୨୯/୦୪: ଦେଶରେ ଅକ୍ସିଜେନର ଅଭାବ । ଆଇସିୟୁରେ ବେଡ୍ ନାହିଁ । ସଂକ୍ରମଣ ମଧ୍ୟ ଦ୍ରୁତ ଗତିରେ ବ୍ୟାପୁଛି । ଭାରତକୁ ଏ ସଙ୍କଟରୁ ଉଦ୍ଧାର କରିବା ପାଇଁ ଆଗକୁ ଆସିଛନ୍ତି ଅଭିନେତ୍ରୀ ପ୍ରିୟଙ୍କା ଚୋପ୍ରା । ସେ ବୁଧବାର ଇନଷ୍ଟାଗ୍ରାମରେ ଫଣ୍ଡ୍ ଏକାଠି କରିବା ନେଇ ଅନୁରୋଧ କରିଛନ୍ତି ।
ପ୍ରିୟଙ୍କା ଏକ ଭିଡିଓ ସେୟାର କରି କହିଛନ୍ତି ଯେ, ଭାରତ ବହୁତ କିଛି ଆବଶ୍ୟକ କରୁଛି । ସେ ଲଣ୍ଡନରେ ଅଛନ୍ତି । କିନ୍ତୁ ତାଙ୍କ ବନ୍ଧୁ ଓ ପରିବାର ଲୋକେ ଭାରତର ଅବସ୍ଥା ବାବଦରେ ତାଙ୍କୁ କହୁଛନ୍ତି । ହସ୍ପିଟାଲରେ ବେଡ୍ ନାହିଁ, ଆଇସିୟୁରେ ବେଡ୍ ନାହିଁ, ଆମ୍ବୁଲାନ୍ସ ବି ବହୁତ ବ୍ୟସ୍ତ ରହୁଛି , ଏପରିକି ମଶାଣିରେ ମଧ୍ୟ ଶବଦାହ ପାଇଁ ସ୍ଥାନର ଅଭାବ ଦେଖାଦେଇଛି । ଭାରତ ହେଉଛି ତାଙ୍କର ଘର । ଏବେ ଦେଶ ଯନ୍ତ୍ରଣାରେ କାନ୍ଦୁଛି ।
ସେ ଆହୁରି କହିଛନ୍ତି ଯେ, ଯେଉଁ ଯାଏଁ ସମସ୍ତେ ସୁରକ୍ଷିତ ହୋଇ ନାହାଁନ୍ତି ସେଯାଏ କେହି ବି ସୁରକ୍ଷିତ ନୁହେଁ । ଏହି ମହାମାରୀକୁ ରୋକିବାକୁ ସମସ୍ତେ ଉଦ୍ୟମ କରିବା ଆବଶ୍ୟକ । ସମସ୍ତେ ଏକାଠି ଆଗକୁ ଆସିବା ଦରକାର । ଏହାର ମୁକାବିଲା ପାଇଁ କିଛି ଦାନ କରନ୍ତୁ । ଭାରତ ଆପଣଙ୍କ ସାହାଯ୍ୟ ଚାହୁଁଛି ।
ପ୍ରିୟଙ୍କାଙ୍କ ପୂର୍ବରୁ ତାଙ୍କ ସ୍ୱାମୀ ତଥା ଗାୟକ ନିକ୍ ଜୋନ୍ସ ମଧ୍ୟ ଭାରତକୁ ଆର୍ଥିକ ସହାୟତା ପ୍ରଦାନ କରିଛନ୍ତି । ସେ ମଧ୍ୟ ତାଙ୍କ ଫଲୋଅର୍ସଙ୍କୁ ଭାରତ ପାଇଁ କିଛି ଦାନ କରିବାକୁ ଅନୁରୋଧ କରିଛନ୍ତି । ଏହି ଭାଇରସକୁ ହରାଇବାର ସମୟ ଆସିଛି ବୋଲି ସେ କହିଛନ୍ତି ।