Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ସଂସଦରେ CAAକୁ ପ୍ରଶଂସା କଲେ ରାଷ୍ଟ୍ରପତି, ବାଜିଲା ତାଳି ତାପରେ ନାରାବାଜିରେ ଗୃହ କମ୍ପାଇଲେ ବିରୋଧୀ

31/01/2020 at 12:57 PM

ନୂଆଦିଲ୍ଲୀ ୩୧।୧: ଆଜିଠାରୁ ଆରମ୍ଭ ହୋଇଛି ସଂସଦର ବଜେଟ୍‌ ଅଧିବେଶ । ସଂସଦର ମିଳିତ ଅଧିବେଶନକୁ ସମ୍ବୋଧନ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ଏହା ପୂର୍ବରୁ ଆଜି ରାଷ୍ଟ୍ରପତି ଉଦବୋଧନ ଦେଇଛନ୍ତି। ଆସନ୍ତାକାଲି ବଜେଟ୍ ଆଗତ କରାଯିବାକୁ ଥିବାବେଳେ ଆଜି ରାଷ୍ଟ୍ରପତି ଉଦବୋଧନ ଦେଇଛନ୍ତି ।

ସଂସଦରେ ସିଏଏର ପ୍ରଶଂସା କରିଛନ୍ତି ରାଷ୍ଟ୍ରପତି । ଏହା ଏକ ଐତିହାସିକ ପଦକ୍ଷେପ ବୋଲି କହିଛନ୍ତି ରାଷ୍ଟ୍ରପତି । ଏହି ଆଇନରେ ସଂଶୋଧନ ସହିତ ଜାତିର ଜନକ ମହାତ୍ମା ଗାନ୍ଧିଙ୍କ ସ୍ବପ୍ନ ପୂରଣ ହେବ ବୋଲି କହିଛନ୍ତି । ରାଷ୍ଟ୍ରପତି ସିଏଏକୁ ସମର୍ଥନ କରିଥିବାରୁ ସଂସଦରେ ବିଜେପି ସାଂସଦମାନେ ତାଳି ମାରିଥିବା ବେଳେ ବିରୋଧୀ ଦଳ ପକ୍ଷରୁ ହଙ୍ଗାମା ଓ ନାରାବାଜି କରାଯାଇଥିଲା ।

ରାଷ୍ଟ୍ରପତି କହିଥିଲେ ନ୍ୟୁ ଇଣ୍ଡିଆ ଗଠନ ପାଇଁ ମୋଦି ସରକାରଙ୍କ ଦୃଢ ଲକ୍ଷ୍ୟ ରହିଛି । ଜାମ୍ମୁକାଶ୍ମୀରରୁ ଧାରା ୩୭୦ ଉଚ୍ଛେଦ ଐତିହାସିକ ନିଷ୍ପତ୍ତି । ସମଗ୍ର ଦେଶବାସୀଙ୍କ ପରି ଜମ୍ମୁକାଶ୍ମୀର ଓ ଲଦାଖବାସୀଙ୍କୁ ସମାନତା ଅଧିକାର ମିଳିଛି ।

ପାକିସ୍ତାନରେ ସଂଖ୍ୟାଲଘୁଙ୍କ ଉପରେ ହେଉଥିବା ଅତ୍ୟାଚରକୁ ନିନ୍ଦା କରିଛନ୍ତି ରାଷ୍ଟ୍ରପତି। ‘ସବକା ସାଥ, ସବକା ବିକାଶ, ସବକା ବିଶ୍ବାସରେ ମୋ ସରକାର ଚାଲୁଛି’ ବୋଲି ରାଷ୍ଟ୍ରପତି କହିଛନ୍ତି । ମୋ ସରକାର ପାଇଁ ମୁସଲିମ ମହିଳାଙ୍କୁ ନ୍ୟାୟ ମିଳିଛି । ଉପଭୋକ୍ତା ଆଇନ, ଚିଟଫଣ୍ଡ ଆଇନ ପ୍ରଣୟନ ହୋଇଛି ।

ସରକାରଙ୍କ ପକ୍ଷରୁ ଡିଜିଟାଲ ବ୍ୟବସ୍ଥାକୁ ବିକଶିତ କରାଯାଉଛି । ଦେଶର ୧୨୧ କୋଟି ଲୋକଙ୍କ ପାଖରେ ଆଧାର କାର୍ଡ, ଭୀମ୍ ଆପ୍ ଭଳି ସୁବିଧା ରହିଛି। ଆତଙ୍କବାଦୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେଇ ସରକାର ସେନାକୁ ସବୁ ଅଧିକାର ଦେଇଛନ୍ତି ବୋଲି ରାଷ୍ଟ୍ରପତି କହିଛନ୍ତି ।

ସୂଚନାଯୋଗ୍ୟ ଯେ, ଏପ୍ରିଲ ୩ ତାରିଖ ପର୍ଯ୍ୟନ୍ତ ଏହି ଅଧିବେଶନ ଚାଲିବ । ଅଧିବେଶନର ପ୍ରଥମ ପର୍ଯ୍ୟାୟ ଫେବୃଆରୀ ୧୧ ତାରିଖ ଯାଏଁ ଚାଲିବ ଏବଂ ଦ୍ବିତୀୟ ପର୍ଯ୍ୟାୟ ମାର୍ଚ୍ଚ ୨ରୁ ଏପ୍ରିଲ ୩ ପର୍ଯ୍ୟନ୍ତ ଅନୁଷ୍ଠିତ ହେବ । ଆସନ୍ତାକାଲି ବଜେଟ୍ ଆଗତ କରାଯିବ।

   Related Posts