ନୂଆଦିଲ୍ଲୀ ୦୩/୦୫ : ଦେଶ ବର୍ତ୍ତମାନ କରୋନା ମହାମାରୀ ବିରୋଧରେ ସଂଗ୍ରାମ କରୁଛି । ଏଥିରେ ବଲିଉଡ ତାରକା ମଧ୍ୟ ସାହାଯ୍ୟର ହାତ ବଢ଼ାଇଛନ୍ତି । ଅଭିନେତ୍ରୀ ତଥା ପଞ୍ଜାବ କିଙ୍ଗ୍ସ ଇଲେଭେନ ଟିମର ମାଲିକ ପ୍ରୀତି ଜିଣ୍ଟା ମଧ୍ୟ ସହାୟତାର ହାତ ବଢ଼ାଇଛନ୍ତି । ସେ କହିଛନ୍ତି ଯେ ତାଙ୍କ ଆଇପିଏଲ ଟିମ ଆବଶ୍ୟକୀୟ ଲୋକଙ୍କୁ ଅକ୍ସିଜେନ କନ୍ସେନଟ୍ରେଟର (Oxygen Concentrators) ଯୋଗାଇବ । ଏଥିପାଇଁ ପଞ୍ଜାବ ଫ୍ରାଞ୍ଚାଇଜି ରାଉଣ୍ଡ ଟେବୁଲ ଇଣ୍ଡିଆ (RTI) ନାମକ ସଂସ୍ଥା ସହ ପାର୍ଟନରସିପ କରିଛି । ପ୍ରୀତି ନିଜ ଇନଷ୍ଟାଗ୍ରାମ ଆକାଉଣ୍ଟ ଏକ ପୋଷ୍ଟ କରି ଏ ସମ୍ପର୍କରେ ସୂଚନା ଦେଇଛନ୍ତି ।
ପ୍ରୀତି ଲେଖିଛନ୍ତି, 'କରୋନା ମହାମାରୀ ଯୋଗୁଁ ଉତ୍ପନ୍ନ ହୋଇଥିବା ସ୍ଥିତିକୁ ଦେଖି ପଞ୍ଜାବ କିଙ୍ଗ୍ସ ଇଲେଭେନ ଟିମ ନିଜ ପାର୍ଟନର ରାଉଣ୍ଡ ଟେବୁଲ ଇଣ୍ଡିଆ ସହ ମିଶି ଦେଶରେ ମାଗଣାରେ ଅକ୍ସିଜେନ କନ୍ସେନଟ୍ରେଟର ଯୋଗାଇବାକୁ ଫଣ୍ଡ ଯୋଗାଡ କରିବାକୁ ନିଷ୍ପତ୍ତି ନେଇଛନ୍ତି । ମୋତେ ପୁରା ଭରସା ଅଛି ଯେ ଏକଜୁଟ ହୋଇ ଆମେ ଭାଇରସ ବିରୋଧରେ ଏହି ଯୁଦ୍ଧ ନିଶ୍ଚୟ ଜିତିବା । ମୋର ନିବେଦନ ଏହି ଅଭିଯାନରେ ସମସ୍ତେ ସାମିଲ ହୁଅନ୍ତୁ ଏବଂ ନିଜ ତରଫରୁ ଯେତିକି ସମ୍ଭବ ସାହାଯ୍ୟ କରନ୍ତୁ ।'
୩ ଦିନ ପୂର୍ବରୁ ପଞ୍ଜାବ ଟିମର ବ୍ୟାଟ୍ସମ୍ୟାନ ନିକୋଲାସ ପୁରନ ଆଇପିଏଲ ୨୦୨୧ ଆୟର କିଛି ରାଶି ଦାନ କରିବାକୁ ନିଷ୍ପତ୍ତି ନେଇଥିଲେ । ଟ୍ୱିଟରରେ ଏକ ଭିଡିଓ ଜାରି କରି ସେ ଲୋକଙ୍କୁ ଅପିଲ କରିଥିଲେ ଯେ 'ଯଦି ଆପଣ ଟିକା ନେଇପାରିବେ ତାହେଲେ ନିଶ୍ଚୟ ନିଅନ୍ତୁ, ମୁଁ ଯାହା ପାରିବି କରିବି । ଭାରତ ପାଇଁ ପ୍ରାର୍ଥନା କରିବା ସହ ଏହି ସଙ୍କଟରୁ ବାହାରିବାକୁ ମୁଁ ମୋ ବେତନର କିଛି ରାଶି ଦାନ କରିବି ।'