ଢେଙ୍କାନାଳ,୨୫/୦୫: ଢେଙ୍କାନାଲ ମୁଖ୍ୟ ଡାକ୍ତରରଖାନରେ କର୍ମଚାରୀଙ୍କ ଖାମଖିଆଲି ମନୋଭାବ । ଡାକ୍ତରଖାନାକୁ ପ୍ରସବ ପାଇଁ ଆସିଥିବା ଜଣେ ଗର୍ଭବତୀଙ୍କର କୋଭିଡ ପଜିଟିଭ ଚିହ୍ନଟ ହେବାରୁ ଚିକିତ୍ସା କଲେନି ସ୍ୱାସ୍ଥ୍ୟ କର୍ମଚାରୀ । ଏପରିକି କଟକ ସ୍ଥାନତାରିତ କରିଦେଇ ଚୁପ ହୋଇ ବସିପଡିଲେ। ଫଳରେ ଏହି ପ୍ରସୂତି ଜଣଙ୍କ ଦୀର୍ଘ ୫ଘଣ୍ଟା ଧରି ଡାକ୍ତରଖାନା ଆଉଟଡୋର ସମ୍ମୁଖରେ ଥିବା ଘରର ବାରଣ୍ଡାରେ ପଡି ଯନ୍ତ୍ରଣାରେ ଛଟପଟ ହେବା ଘଟଣା ବେଶ ଆଲୋଡନ ସୃଷ୍ଟି କରିଛି ।
ତେବେ ଦୀର୍ଘ ସମୟ ଧରି ପ୍ରସୂତି ଯନ୍ତ୍ରଣାରେ ଛଟ ପଟ ହେଥିବା ବେଳେ ଗଣମାଧ୍ୟମ ପ୍ରତିନିଧିଙ୍କ ହସ୍ତକ୍ଷେପ ପରେ ମହିଳାଙ୍କୁ ଆମ୍ବୁଲାନ୍ସ ଯୋଗେ କଟକ ସ୍ଥାନାନ୍ତରିତ କରାଯାଇଥିବା ଜଣାପଡିଛି । ସୂଚନା ମୁତାବକ, ଢେଙ୍କାନାଳ ସଦର ଥାନା ଅଞ୍ଚଳର ଏହି ଗର୍ଭବତୀ ମହିଳାଙ୍କ ପ୍ରସବ ଯନ୍ତ୍ରଣା ଯୋଗୁଁ ତାଙ୍କ ପରିବାର ପକ୍ଷରୁ ସୋମବାର ସନ୍ଧ୍ୟା ୫ଟାରେ ଢେଙ୍କାନାଲ ମୁଖ୍ୟ ଡାକ୍ତରଖାନାରେ ଭର୍ତି କରା ଯାଇଥିଲା । ମାତ୍ର ତାଙ୍କର କୋଭିଡ ଟେଷ୍ଟ କରିବାରୁ ପଜିଟିଭ ଜଣାପଡିଥିଲା ।
ଫଳରେ କର୍ମଚାରୀମାନେ ତାଙ୍କୁ ଚିକିତ୍ସା ନଦେଇ କୋଭିଡ ସଂକ୍ରମିତ ଆଳରେ କଟକ ଏସସିବିକୁ ସ୍ଥାନାନ୍ତର କରିଦେଇ ଡାକ୍ତରଖାନା ଭିତରକୁ ଆଉ ପଶିବାକୁ ଦେଇନଥିଲେ । ଏପରିକି ଆଇସୋଲେସନ ରୁମର ବ୍ୟବସ୍ଥା ରହିଥିଲେ ମଧ୍ୟ ତାଙ୍କୁ ଗୁରୁତ୍ୱ ଦେଇ ନଥିଲେ କିମ୍ବା ତୁରନ୍ତ ଆମ୍ବୁଲାନ୍ସର ବ୍ୟବସ୍ଥା ମଧ୍ୟ କରିନଥିଲେ । ଡାକ୍ତରଖାନା କର୍ମଚାରୀଙ୍କ ଏପରି ଖମଖିଆଳି ମନୋଭାବ ବିରୋଧରେ ତାଙ୍କ ପରିବାର ଲୋକେ ପ୍ରଶ୍ନ କରିଛନ୍ତି ।