ଭୁବନେଶ୍ବର୩୧|୭: ଟ୍ରିପଲ ତଲାକ ବିଲ୍ ରାଜ୍ୟସଭାରେ ପାସ୍ ତ ହୋଇଗଲା ଦେଶ ସାରା ସେଲିବ୍ରେସନ କରୁଛନ୍ତି ମହିଳା ଓ ବିଜେପି ନେତା। କିନ୍ତୁ ଦିଲ୍ଲୀରୁ ଭୁବନେଶ୍ବର ରାଜନୀତି ହୁଲସ୍ତୁଲ । ବିରୋଧିଙ୍କୁ ଧୋକା ଦେଇ ପଛଦ୍ବାର ବାଟେ ଏହି ବିଲ୍ କେନ୍ଦ୍ର ସରକାର ପାସ୍ କରାଇ ନେଇଛନ୍ତି ବୋଲି କଂଗ୍ରେସ ଅଭିଯୋଗ କରିଛି ।
କାଲି ରାଜ୍ୟସଭାରେ ରଞ୍ଜୀବ ବିଶ୍ବାଳଙ୍କ ସହିତ ୫ କଂଗ୍ରେସ ସାଂସଦ ଭୋଟ ଦେଇନାହାନ୍ତି। ଯାହାକୁ ନେଇ କଂଗ୍ରେସ ଚିନ୍ତାରେ । ଦଳ ପକ୍ଷରୁ ଏମାନଙ୍କୁ ଉତ୍ତର ମଗାଯାଇଛି । ଏଥିସହିତ କଂଗ୍ରେସ କହିଛି ସରକାର ବିରୋଧୀ ଦଳଙ୍କୁ ଅନ୍ଧାରରେ ରଖି ଶେଷ ମୂହୁର୍ତ୍ତରେ ଏହି ବିଲ୍ ରାଜ୍ୟସଭାରେ ଆଗତ କରିଥିଲେ ଏବଂ ସେହିଦିନ ହିଁ ପାରିତ କରାଇ ନେଇଥିଲେ । ଯେଉଁଥିପାଇଁ ବିରୋଧି ଦଳ ଏକଜୁଟ ହୋଇପାରିଲେ ନାହିଁ କି ହ୍ବିପ୍ ବି ଜାରି ପାଇଁ ପର୍ଯ୍ୟାପ୍ତ ସମୟ ରହିଲା ନାହିଁ । ଟିଏମସି ଏମପି ଡେରେକ୍ ଓ ବ୍ରାଏନ୍ କହିଛନ୍ତି ସଂଖ୍ୟା ବଳରେ ସରକାର ପିଜା ଡେଲିଭରି ଭଳି ବିଲ୍ ପାସ କରାଉଛନ୍ତି।
ଏଣେ ଓଡିଶା ବିଧାନସଭାରେ କିଛି କମ୍ ତାତି ଦେଖିବାକୁ ମିଳିନି । ଏଠି କଂଗ୍ରେସ ଉଭୟ ବିଜେପି ଓ ବିଜେଡିକୁ ଘେରିଛି ।କେନ୍ଦ୍ରରେ ବିଜେପିର ସହଯୋଗୀ ଥିବା ଜେଡିୟୁ ଓ ଏଆଇଏଡିଏମକେ ବିଲକୁ ବିରୋଧ କରି କକ୍ଷତ୍ୟାଗ କରିଥିବା ବେଳେ ବିଜେଡି କାହିଁକି ଉପରେ ପଡ଼ି ସମର୍ଥନ କଲା ବୋଲି କୈଫତ ମାଗିଛି କଂଗ୍ରେସ । ଏହା ବିଜେଡିର ଡବଲ ଷ୍ଟାଣ୍ଡାର୍ଡ ବୋଲି କହିଛି କଂଗ୍ରେସ ।
ନିର୍ବାଚନ ବେଳେ ବିଜେପି - ବିଜେଡି ପରସ୍ପର ବିରୋଧରେ ବର୍ଷୁଥିଲେ ଆଜି ଲାଗୁଛି ଯେ ଉଭୟ ରାଜ୍ୟ ଆଉ କେନ୍ଦ୍ରରେ ଯେମିତି ମିଳିତ ସରକାର ଚାଲିଛି । ମୁଖ୍ୟମନ୍ତ୍ରୀ ଏହାର ଜବାବ ରଖିବାକୁ ଦାବି କରିଛନ୍ତି ତାରା ବାହିନୀପତି । ଶାସକଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଥିଲେ ମୁସଲିମ ମହିଳାଙ୍କ ସୁରକ୍ଷା ପାଇଁ ଏଭଳି ଏକ ଜନ ହିତକର ବିଲ୍ କୁ ବିଜେଡି ସମର୍ଥନ କରିଛି । ବିଜେପି କହିଛି ଏଠି ରାଜନୀତି ନାହିଁ ଜାତୀୟ ସ୍ବାର୍ଥ ଅଛି ।
ପ୍ରଥମେ ଅଶ୍ବୀନି ବୈଷ୍ଣବଙ୍କୁ ରାଜ୍ୟସଭା ପଠାଇବାରେ ସମର୍ଥନ, କିଛିଦିନ ତଳେ ଆରଟିଆଇ ସଂଶୋଧନ ବିଲ୍ କୁ ସମର୍ଥନ ଏବଂ ପରେ ଆଣ୍ଟି ଟ୍ରିପିଲ ତଲାକ ବିଲ ଓ ଏକକ ଟ୍ରିବ୍ୟୁନାଲ ବିଲ୍କୁ ବିଜେଡି ସମର୍ଥନ କରିଛି ।