ଢେଙ୍କାନାଳରେ ବିୟର ଫ୍ୟାକ୍ଟ୍ରି ନିର୍ମାଣ ପାଇଁ ଗଛ କଟାକୁ ନେଇ ସରଗରମ ରାଜନୀତି
Published By : Prameya-News7 Bureau | November 18, 2018 IST
ଢେଙ୍କାନାଳ ୧୮/୧୧ : ଢ଼େଙ୍କନାଳ ବଳରାମପୁରରେ ବିୟର ଫ୍ୟାକ୍ଟ୍ରିକୁ ପାଇଁ ଗଛ କାଟାଯିବା ଏବେ ଢେଙ୍କାନାଳ ଡେଇଁ ରାଜଧାନୀର ହଟ୍ ଟପିକ୍ ହୋଇଛି। ମୁଖ୍ୟମନ୍ତ୍ରୀଏହାର ତଦନ୍ତ ସହିତ ଗଛକଟା ବନ୍ଦ ପାଇଁ ନିର୍ଦ୍ଦେଶ ଦେଇଛନ୍ତି। ତେବେ ବିରୋଧୀ ଏଥିରେ ସନ୍ତୁଷ୍ଟ ହୋଇନାହାନ୍ତି । ଏପଟେ ବଳରାମପୁର ଗାଁ ଲୋକେ ମଦ ଫ୍ୟାକ୍ଟ୍ରି କାମ ବନ୍ଦ କରିବାକୁ ଦାବି କରିଛନ୍ତି।
ମୃତ ବୃକ୍ଷର ଅନ୍ତ୍ୟେଷ୍ଟି । ଚାଲିଛି ଭଜନ ସଂକୀର୍ତ୍ତନ। କଟାଗଣ୍ଡି ତଳେ ହେଉଛି ବୃକ୍ଷ ରୋପଣ। ପାଣି ଦେଉଛନ୍ତି । ମହାପ୍ରସାଦ ସେବନ ବି ହେଉଛି । ଏ ହେଉଛି ଢେଙ୍କାନାଳ ବଳରାମ ପୁରର ଦୃଶ୍ୟ। ସେହି ବଳରାମପୁର ଯେଉଁଠାରେ ବିୟର ଫ୍ୟାକ୍ଟ୍ରି ପାଇଁ ଦିନଦିନ ଗଡ଼ିଛି ପ୍ରାୟ ୬ଶହ ଗଛ । ଗାଁ ଲୋକେ ଏହାକୁ ବରଦାସ୍ତ କରିବା ମୁଡରେ ନାହାନ୍ତି । ଗାଁ ଲୋକେ ସିଧା ସିଧା ସରକାରଙ୍କୁ ଚେତାବନୀ ଶୁଣାଇଛନ୍ତି। ମରିବେ ପଛେ ମଦ ଫ୍ୟାକ୍ଟ୍ରି ନିର୍ମାଣ କରାଇଦେବେ ନାହି । ବଳରାମପୁର ଆଞ୍ଚଳିକ ପରିବେଶ ସୁରକ୍ଷା ସମିତି ସେଠାରେ ରଣହୁଂକାର ଦେଇଛି। ସଂପୃକ୍ତ ସ୍ଥାନରୁ ହଜାରେରୁ ଅଧିକ ଗଛ କଟାଯାଇଥିବା ଅଭିଯୋଗ କରିଛି । ଘଟଣା ସ୍ଥଳରେ ବିଭିନ୍ନ ରାଜନୈତିକ ଦଳର ନେତା ବି ଡେରା ପକାଇବା ଆରମ୍ଭ କରିଛନ୍ତି।
ଘଟଣାକୁ ନେଇ ମୁଖ୍ୟମନ୍ତ୍ରୀ ଚିନ୍ତା ପ୍ରକାଶ କରିଛନ୍ତି। ଗଛ କାଟିବା ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି। ଘଟଣାର ଆରଡିସି ସ୍ତରୀୟ ତଦନ୍ତ ଲାଗି ନିର୍ଦ୍ଦେଶ ଦେଇଛନ୍ତି । ଏହା ସତ୍ତ୍ବେ ବି ଥମିନି ରାଜନୀତି । ବିରୋଧୀ ଦଳ ନେତା ନରସିଂହ ମିଶ୍ର କହିଛନ୍ତି ଆଇନ ଅନୁସାରେ କେନ୍ଦ୍ରର ବିନା ଅନୁମତିରେ ଗଛ କଟାଯାଇ ପାରିବନି । ଜୋର ଜବରଦସ୍ତ ଗଛ କଟା ହୋଇଛି, ଯାହା ବେଆଇନ ଓ ଅପରାଧ । ପୋଲିସକୁ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କାହିଁକି ନିର୍ଦ୍ଦେଶ ଦିଆଯାଇନି ବୋଲି ପ୍ରଶ୍ନ କରିଛନ୍ତି । ବିଜେପି ବି ସମାଲୋଚନା କରିଛି । ସେପଟେ ବିଜେଡି କହିଛି ତଦନ୍ତ ପରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ।
P&A ବଟଲ୍ସ ପ୍ରାଇଭେଟ ଲିମିଟେଡ ବିୟର ଫ୍ୟାକ୍ଟ୍ରି ନିର୍ମାଣ ପାଇଁ ଇଡକୋରୁ ୧୨ ଏକର ଜମି ନେଇଛି । ଯେଉଁଥିପାଇଁ ଚାଲିଥିଲା ବ୍ୟାପକ ଗଛ କଟା। ପ୍ରଶ୍ନ ଉଠୁଛି ଯଦି ବିୟର ଫ୍ୟାକ୍ଟି ରାଜ୍ୟ ପାଇଁ ନିହାତି ଆବଶ୍ୟକ ତେବେ କରାଯାଉ କିନ୍ତୁ ସେହି ନିର୍ଦ୍ଦିଷ୍ଟ ସ୍ଥାନରେ ଶହ ଶହ ଗଛ ବଳିପକାଇବାରେ କେଉଁ ବିକାଶ ବାନା ଉଡୁଛି।