ଦେବଗଡ, ୧୦।୧୦: ଦେବଗଡ ଆଦର୍ଶ ଥାନା ପୋଲିସ ପକ୍ଷରୁ ୪୯ ନମ୍ବର ଜାତୀୟ ରାଜପଥରେ ଯାଉଥିବା ଏକ ବେଆଇନ ଗାଇ ବୋଝେଇ ଟ୍ରକ୍ ଜବତ କରାଯାଇଛି । ଦେବଗଡ ଏସପି ରାଜକିଶୋର ପାଇକରାୟଙ୍କ ନିର୍ଦ୍ଦେଶ ଅନୁଯାୟୀ ଦେବଗଡ ପୋଲିସ ପକ୍ଷରୁ ଏସଆଇ ବୁଦ୍ଧରାୟ ମାଝୀଙ୍କ ନେତୃତ୍ଵରେ ଦେବଗଡ ସହର ବାଇପାସରେ ଗାଡିମଟର ଯାଞ୍ଚ ପ୍ରକ୍ରିୟା ଚାଲିଥିବା ବେଳେ ଗାଇ ବୋଝେଇ ଟ୍ରକ୍ର ଡ୍ରାଇଭର ଗାଡିକୁ ଛାଡି ଚାଲିଯାଇଥିଲା । ପୋଲିସ ସନ୍ଦେହରେ ଟ୍ରକକୁ ଯାଞ୍ଚ କରିଥିବା ବେଳେ ସେଥିରେ ଗାଇ ଚାଲାଣ ହେଉଥିବା ଦେଖିବାକୁ ପାଇଥିଲେ ।
ଟ୍ରକରେ ମୋଟ ୪୦ଟି ଗାଇ ଥିବା ବେଳେ ସେଥିମଧ୍ୟରୁ ୨୯ଟି ଗାଇକୁ ଜୀବନ୍ତ ଉଦ୍ଧାର କରାଯାଇଛି । ହେଲେ ୧୧ଟି ଗାଇ ମରିଯାଇଥିବା ଜଣାପଡିଛି । ଦେବଗଡ ପୋଲିସ ଉଦ୍ଧାର କରାଯାଇଥିବା ଗାଇମାନଙ୍କୁ ରେଙ୍ଗାଳବେଡା ଠାରେ ଥିବା ସେବାଧାମର ଜିମା ଦେଇଛନ୍ତି। ମୃତ ଗାଇ ଗୁଡିକର ଶବ ବ୍ୟବଛେଦ ପରେ ପୋତିଦିଆଯିବ ବୋଲି ଜଣାପଡିଛି । ଟ୍ରକର ଡ୍ରାଇଭର ଫେରାର ହୋଇଯାଇଥିବା ବେଳେ ପୋଲିସ ପକ୍ଷରୁ ଅଧିକ ଅନୁସନ୍ଧାନ କରାଯାଉଛି ।
