ହାଇଦ୍ରାବାଦ୮।୧୧: ବିଭିନ୍ନ ସ୍ଥାନରେ ଚାଲୁଥିବା ସେକ୍ସ ରାକେଟ ଉପରେ ପୋଲିସ ଚଢ଼ଉ କରିଛି। ଆନ୍ଧ୍ରପ୍ରଦେଶ ପୋଲିସର ଏହି ଚଢଉରେ ଏପର୍ଯ୍ୟନ୍ତ ୧୩ ଜଣଙ୍କୁ ଗିରଫ କରାଗଲାଣି। ନେଲୋର ସିଟିରେ ଦେହ ବ୍ୟବସାୟ ଚାଲିଥିଲା। ଏ ସମ୍ପର୍କରେ ପୋଲିସକୁ ସୂଚନା ମିଳିବାମାତ୍ରେ ଆଡ୍ଡା ଉପରେ ଚଢ଼ଉ କରାଯାଇଥିଲା। ଜୋର ଜବରଦସ୍ତ ଧନ୍ଦାରେ ଲିପ୍ତ ଥିବା ଯୁବତୀଙ୍କୁ ପୋଲିସ ଉଦ୍ଧାର କରିଥିଲା।
ସହରର ୬ଟି ସ୍ଥାନରେ ଚାଲିଥିବା ଦେହ ବ୍ୟବସାୟ ଉପରେ ପୋଲିସ ଏପର୍ଯ୍ୟନ୍ତ ଚଢ଼ଉ କରିଛି। ୮ଜଣ ପରିଚାଳକ ଓ ୫ ଜଣ ଗ୍ରାହକଙ୍କୁ ପୋଲିସ ଗିରଫ କରିଥିବା ବେଳେ ଜାକିର ହୁସେନ ନାମକ ଜଣେ ବ୍ୟକ୍ତି ଏବଂ ତାଙ୍କ ସହଯୋଗୀମାନେ ଏହି ରାକେଟ ଚଲାଇଥିଲେ। ଫିଲ୍ମରେ ଅଭିନୟ ସୁଯୋଗ ଦେବା ବାହାନାରେ ଯୁବତୀ ଓ ମହିଳାଙ୍କୁ ସେମାନେ ଦେହ ବ୍ୟବସାୟରେ ସାମିଲ କରୁଥିଲେ ବୋଲି ପୋଲିସର ପ୍ରାଥମିକ ତଦନ୍ତରୁ ଜଣାପଡିଛି।
ଚଢ଼ଉ ସମୟରେ ଗୋଟିଏ କାର, ଗୋଟିଏ ମୋଟରସାଇକେଲ, ଗୋଟିଏ କମ୍ପ୍ୟୁଟର, ୧୪ଟି ମୋବାଇଲ ଓ ନଗଦ ୧୨ ହଜାର ୩୦୦ ଟଙ୍କା ପୋଲିସ ଜବତ କରିଛି। ଭାରତୀୟ ଦଣ୍ଡବିଧି ଆଇନ ଅନୁସାରେ ଅଭିଯୁକ୍ତଙ୍କ ବିରୋଧରେ ପୋଲିସ ମୋକଦ୍ଦମା ରୁଜୁ କରିଛି।