କେନ୍ଦୁଝର ୧୭।୧୧ - ଅଜଣା ବ୍ୟକ୍ତିଙ୍କ ମୃତଦେହ କୁ କେହି କଲେଜ ପଛରେଥିବା ପଡିଆ ଠାରେ ପୋତି ଦେଇଥିବା ଖବର ଆଜି ସକାଳୁ ସ୍ଥାନୀୟ ଅଞ୍ଚଳରେ ବିଜୁଳି ବେଗରେ ବ୍ୟାପିଥିଲା । ଏପରିକି କେହିକେହି କହୁଥିଲେ ଘଟଣା ସ୍ଥଳରେ ଏକ ମେସିନ୍ ଠିଆ ହୋଇଥିଲା, ହେଲେ ମେସିନ୍ କିମ୍ବା ଅପରେଟର ଏବେ ଦେଖା ମିଳୁନାହିଁ । ପୋତା ହୋଇଥିବା ମୃତ ବ୍ୟକ୍ତିର ହତ୍ୟାକାଣ୍ଡରେ ସଂପୃକ୍ତ ଅପରେଟରର ହାତ ରହିଥିବା ଆଲୋଚନା ହେଉଥିଲା ।
ହାଟଡିହି ବ୍ଲକ୍ ସଢଙ୍ଗ କଲେଜ ପଛରେ ଥିବା ପଡିଆରେ ଏଭଳି ଏକ ଘଟଣା କୁ ନେଇ ସ୍ଥାନୀୟ ଅଞ୍ଚଳରେ ଗୁଜବ ପ୍ରଚାରିତ ହୋଇଥିଲା । ତୁରନ୍ତ ଉପଜିଲ୍ଲାପାଳଙ୍କ ନିର୍ଦ୍ଦେଶନାରେ ହାଟଡିହି ଅତିରିକ୍ତ ତହସିଲଦାରଙ୍କୁ ମାଜିଷ୍ଟ୍ରେଟ ଭାବେ ନିଯୁକ୍ତି କରାଯାଇ ଘଟଣା ସ୍ଥଳକୁ ପଠାଯାଇଥିଲା । ସାଙ୍ଗରେ ନନ୍ଦିପଦା ଆଇଆଇସି ଙ୍କ ସହ ପୁର ପୋଲିସ ଟିମ୍ଘଟଣା ସ୍ଥଳରେ ପହଞ୍ଚିଥିଲେ । କଲେଜ ପଛରେଥିବା ପଡିଆର ଏକ ଉଚ୍ଚା ସ୍ଥାନରେ ଜେସିବି ମେସିନ୍ ରେ ଖୋଳା ହୋଇଥିଲା । ହେଲେ ସେଥିରୁ ଶବ ତ ବାହାରି ନଥିଲା, ହେଲେ କେତେଗୁଡ଼ିଏ ଏସ୍ପାରି ସରକାରୀ ମେଡିସିନ ବାହାରିଥିଲା । ମେଡିସିନ ଗୁଡିକ ପୋଡାହୋଇ କେହି ସେଠାରେ ପୋତି ଦେଇଥିବା ଜଣାପଡିଥିଲା । ତେବେ ଏତେଗୁଡିଏ ଏସ୍ପାରି ମେଡିସିନ୍ ସେଠାରେ କେଉଁ ପରିସ୍ଥିତିରେ ରେ ପୋତା ହେଲା ତାକୁନେଇ ଏବେ ତଦନ୍ତ କରୁଛି ପୋଲିସ । ଏକ୍ସପାରି ମେଡିସିନ ଗୁଡିକ କେଉଁ ସ୍ବାସ୍ଥ୍ୟ କେନ୍ଦ୍ରର ଓ ତାହା ସରକାରି ନିୟମ ଅନୁଯାୟୀ ଡିସ୍ପୋଜାଲ ହୋଇଛି କି ନାହିଁ? ତାକୁ ନେଇ ଏବେ ଖୋଳତାଡ ଆରମ୍ଭ କରିଛି ପୋଲିସ ।
