ନୂଆଦିଲ୍ଲୀ ୫|୭: ନୂତନ ଭାରତ ଗଠନରେ ୨୦୧୯-୨୦ କେନ୍ଦ୍ର ବଜେଟ ଏକ ପ୍ରମୁଖ ଭୂମିକା ନେବ ବୋଲି କହି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାର ଉଚ୍ଚ ପ୍ରଶଂସା କରିଛନ୍ତି ।
ସଂସଦରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ବାର୍ଷିକ ବଜେଟ୍ ଉପସ୍ଥାପନ କରିବା ପରେ ଏହା ଉପରେ ଏକ ବିବୃତି ରଖି ମୋଦି କହିଛନ୍ତି ଯେ, ଏହା ଗରିବମାନଙ୍କ ମାନଦଣ୍ଡରେ ଉନ୍ନତି ଆଣିବା ସହ ଦେଶର ଯୁବ ଗୋଷ୍ଠୀକୁ ଏକ ସୁନେଲି ଭବିଷ୍ୟତ ପ୍ରଦାନ କରିବ ।
ବଜେଟର ପ୍ରମୁଖ ସୁବିଧା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଏହି ବଜେଟ ଦେଶର ବିକାଶର ଗତିକୁ ତ୍ୱରାନ୍ୱିତ କରିବା ସହ ମଧ୍ୟବିତ ଜନସାଧାରଣଙ୍କ ସହାୟକ ହେବ । ବଜେଟଟି ଟିକସ ପ୍ରକ୍ରିୟାର ସରଳୀକରଣ କରିବା ସହିତ ଦେଶର ଭିତିଭୂମିକୁ ଏକ ଆଧୁନିକ ରୂପ ଦେବ । ଦେଶର କୃଷି କ୍ଷେତ୍ରକୁ ବଦଳାଇବାରେ ଏହା ଦିଗଦର୍ଶନ ପ୍ରଦାନ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।
ପ୍ରଧାନମନ୍ତ୍ରୀ ବାର୍ଷିକ ବଜେଟକୁ ଏକ ଆଶାର ବଜେଟ ଭାବେ ବିବେଚନା କରିବା ସହ ଏହା ଏକବିଂଶ ଶତାବ୍ଦୀରେ ଦେଶର ବିକାଶଧାରାକୁ ତ୍ୱରାନ୍ୱିତ କରିବ ବୋଲି ସେ କହିଛନ୍ତି ।
ପ୍ରଧାନମନ୍ତ୍ରୀ ଆହୁରି କହିଛନ୍ତି ଯେ, ଦେଶର ଗରିବ, କୃଷକ, ଦଳିତ ଓ ବଂଚିତ ଜନସାଧାରଣଙ୍କୁ ସଶକ୍ତ କରିବା ପାଇଁ କେନ୍ଦ୍ର ସରକାର ସମସ୍ତ ପ୍ରକାର ପଦକ୍ଷେପ ନେଇଛନ୍ତି । ଆଗାମୀ ପାଂଚ ବର୍ଷ ଏଭଳି ସଶକ୍ତିକରଣ ଯୋଗୁଁ ସେମାନେ ଦେଶ ବିକାଶର କେନ୍ଦ୍ର ଭାବେ ବିବେଚିତ ହେବେ । ସେମାନଙ୍କ ଯୋଗୁଁ ଆଗାମୀ ପାଂଚ ବର୍ଷ ମଧ୍ୟରେ ଦେଶ ପାଂଚ ଲକ୍ଷ କୋଟି ଡଲାର ଅର୍ଥ ନୀତିର ସ୍ୱପ୍ନକୁ ସାକାର କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।
