ଟିଟିଲାଗଡ (ତୀର୍ଥଙ୍କର ପଟେଲ ) ୨୫|୫: ଶ୍ରମଜୀବୀଙ୍କ ସ୍ବାର୍ଥ ପ୍ରତି ଦୃଷ୍ଟି ଦେବ କିଏ ? ମୂଲ ମଜୁରି କରି ପରିବାର ପୋଷୁଥିବା ଲୋକଙ୍କଲାଗି ସରକାରଙ୍କ ଏକାଧିକ ଯୋଜନା । କିନ୍ତୁ ଟିଟିଲାଗଡ଼ରେ ସବୁ ଫେଲ୍ । ରୋଜଗାର ଆଶାରେ ହାଟରେ ନିଜ ଶ୍ରମ ଲାଗି ମାଲିକ ଖୋଜୁଛନ୍ତି ଶ୍ରମଜୀବୀ । ଟିଟିଲାଗଡ଼ର ମଣିଷ ହାଟରେ ଏପରି ଦିନମଜୁରିଆଙ୍କ କଷଣର କାହାଣୀ , ସରକାରୀ ଯୋଜନାର ବିଫଳତା ବୟାନ କରୁଛି । ତା ସହ ବିକାଶ, ଉନ୍ନତିର ଡିଣ୍ଡିମ ପିଟୁଥିବା ସମାଜରେ ଦାରିଦ୍ର୍ୟଓ ଅବହେଳାର ନଗ୍ନ ଚିତ୍ର ବି ରଖୁଛି ।
{"id":115873}ପେଟ ପାଇଁ ନାଟ । ମଜୁରୀ ଲାଗି ହାଟରେ ନିଜକୁ ମୂଲୋଉଛି ଅଭାବୀ ମଣିଷ । ଏ ସେହି ମଣିଷ ହାଟ । ବଲାଙ୍ଗିର ଜିଲ୍ଳା ଟିଟିଲାଗଡ ହାଟପଦା ପଡା ପୁରୁଣା ଫାଟକ ପାଖର ସବୁଦିନିଆ ଦୃଶ୍ୟ । ଏଠି ବସିଥିବା ଲୋକେ ମଜୁରି ପାଇଁ କାମ ଦେବା ଲୋକ ଓ ମାଲିକ ସହ ନିଜ ଶ୍ରମର ମୂଲଚାଲ କରୁଛନ୍ତି । ପାଉଣା ଦାବି କରୁଛନ୍ତି । ପ୍ରତିଦିନ ସକାଳେ ଆଖପାଖ ଗାଁର ଅନେକ ଶ୍ରମିକ ଏଠାରେ ଭିଡ଼ ଜମାନ୍ତି । ମାଲିକ ଆସିବ, କାମ ଦେବ ଓ ପାଉଣା ପାଇଲେ ପେଟ ଭରିବ । କାରଣ ଶ୍ରମ ବିନା ଏହି ଶ୍ରମଜୀବିଙ୍କ ପରିବାର ଯେ ଭୋକିଲା, ଅପୋଷା । କିନ୍ତୁ ସବୁଦିନେ , ସମସ୍ତଙ୍କୁ କାମ ମିଳେନି । ସକାଳ ୭ ରେ ଏଠାକୁ ଆସି ଦିନ ୧୧ ରେ ମୁହଁ ସୁଖେଇ ଫେରନ୍ତି ଅନେକ ।
{"id":115868}କାହିଁକି ଏମିତି ସ୍ଥିତି ? କ’ଣ ନାହିଁ ଦିନ ମଜୁରୀଆଙ୍କ ଲାଗି ପେଟ ପୋଷିବାର ବିକଳ୍ପ ? ଶ୍ରମିକଙ୍କ ଲାଗି ସରକାରଙ୍କ ଅନେକ ଯୋଜନା ।ଯୋଗ୍ୟ ହିତାଧିକାରୀ ବି ଅନେକ । ହେଲେ, ବାସ୍ତବତାର ଚିତ୍ର ଅଲଗା । ଏହି ଶ୍ରମିକଙ୍କ ପାଇଁ ସରକାରୀ ଯୋଜନା ସ୍ବପ୍ନ ପାଲିଟିଛି । ମନରେଗା ଯୋଜନାରେ ଠିକ୍ ସମୟରେ ମଜୁରି ମିଳୁନଥିବା ଅଭିଯୋଗ । ତା ସହ ସଙ୍ଗୀନ କଥାଟି ହେଲା , ମଣିଷ ବଦଳରେ ମେସିନ୍ରେ କାମ କରାଉଛି ଠିକାଦାର । ଫଳରେ ଶ୍ରମଜୀବୀଙ୍କୁ କାମ ମିଳୁନି ।
{"id":115874}ଏହା ସହ ଆହୁରି ବଡ଼ ଅଭିଯୋଗ ହେଲା, ନିର୍ମାଣ ଶ୍ରମିକ ସହାୟତା ପାଇବା ଦୂରର କଥା ଶ୍ରମିକି କାର୍ଡ ପାଇଁ ଅନେକ ଖର୍ଚ୍ଚା’ ଓ ହଇରାଣ ହେବାକୁ ପଡୁଥିବା ଶ୍ରମଜୀବୀ ଅଭିଯୋଗ କରନ୍ତି । ତେବେ ଏସଂପର୍କରେ ଟିଟିଲାଗଡ ଉପଜିଲ୍ଳାପାଳଙ୍କ ଉତ୍ତର ହେଲା, ଶ୍ରମିକମାନେ ପଞ୍ଚାୟତ ଠାରୁ କାମ ଦାବୀ କରି ପାରିବେ । ସେମାନଙ୍କୁ କାମ ନମିଲିଲେ , ସରକାର ସେମାନଙ୍କୁ ବେକାର ଭତ୍ତା ଦେବାକୁ ବାଧ୍ୟ ।
{"id":115871}ଶ୍ରମିକଙ୍କ ଦୁଃଖ ସରୁନି , ଅଫିସର କିନ୍ତୁ କହୁଛନ୍ତି ନୀତି ନିୟମର କଥା ।ତେବେ ସରକାରଙ୍କ ନୀତି, ନିୟମ ଏବଂ ଯୋଜନାର ସୁଫଳ ପାଇବାରୁ ଯେ ଟିଟିଲିଗଡ଼ ଶ୍ରମଜୀବୀ ବଞ୍ଚିତ, ଏହା ବୟାନ କରୁଛି ଏଠାର ମଣିଷ ହାଟ । ତେଣୁ ସ୍ଥିତି ପ୍ରତି ସଚେତନ ହେବା ଉଭୟ ଶ୍ରମ ଦାତା, ସରକାରୀ ବାବୁ ଏବଂ ଶ୍ରମଜୀବୀ ସମସ୍ତଙ୍କ ଲାଗି ଜରୁରି ।