ଡେରାଡୁନ ୧୬/୦୭ : ବରିଷ୍ଠ କଂଗ୍ରେସ ନେତା ତଥା ରାଜସ୍ଥାନର ପୂର୍ବତନ ଉପ ମୁଖ୍ୟମନ୍ତ୍ରୀ ସଚିନ୍ ପାଇଲଟ୍ ଆଜି ଡେରାଡୁନରେ ପହଞ୍ଚିଛନ୍ତି। ସକାଳ ୧୦.୩୦ ରେ ଜଲି ଗ୍ରାଣ୍ଟରେ ପହଞ୍ଚିବା ପରେ ସଚିନ ପାଇଲଟ ସିଧାସଳଖ କଂଗ୍ରେସ ଭବନକୁ ଆସିଥିଲେ ଯେଉଁଠାରେ ସେ କଂଗ୍ରେସର ବରିଷ୍ଠ ନେତାମାନଙ୍କୁ ଭେଟିଥିଲେ। ସଚିନ ପାଇଲଟଙ୍କ ଏହି ଗସ୍ତ କେନ୍ଦ୍ର ସରକାରଙ୍କ ନୀତି ବିରୁଦ୍ଧରେ ହଲ୍ଲାବୋଲ କରିବାର ଉଦ୍ଦେଶ୍ୟ ଥିଲା ବୋଲି କୁହାଯାଉଛି। କିନ୍ତୁ ଡେରାଡୁନକୁ ଆସିବା ପରେ ସଚିନ ପାଇଲଟ କାର୍ଯ୍ୟକର୍ତ୍ତଙ୍କ ମଧ୍ୟରେ ଉତ୍ସାହ ଭରି ଦେଇଥିଲେ। ନିର୍ବାଚନ ପୂର୍ବରୁ ସଚିନ ପାଇଲଟ ଦଳର ସମସ୍ତ ନେତାଙ୍କୁ ଏକତାର ଶିକ୍ଷା ମଧ୍ୟ ଦେଇଛନ୍ତି।
କଂଗ୍ରେସର ବରିଷ୍ଠ ନେତାମାନଙ୍କୁ ଭେଟିବା ପରେ ସଚିନ ପାଇଲଟ ଏକ ସାମ୍ବାଦିକ ସମ୍ମିଳନୀ କରିଥିଲେ ଯାହା ମାଧ୍ୟମରେ ସେ କେନ୍ଦ୍ର ସରକାରଙ୍କ ଉପରେ କଡ଼ା ଆକ୍ରମଣ କରିଥିଲେ। କେନ୍ଦ୍ର ସରକାରଙ୍କ ବିରୋଧରେ ମହଙ୍ଗା ଦର ପ୍ରସଙ୍ଗକୁ ନେଇ ସଚିନ ମୋଦୀ ସରକାରଙ୍କ ବିରୋଧରେ ଅନେକ ଅଭିଯୋଗ କରିଥିଲେ। ପାଇଲଟ କହିଛନ୍ତି ଯେ କେନ୍ଦ୍ର ସରକାର ଭାଷଣ ଦେବାରେ ପାରଙ୍ଗମ କିନ୍ତୁ ମହଙ୍ଗା ଦରରେ ଜନସାଧାରଣଙ୍କୁ କୌଣସି ଆରାମ ଦେଉନାହାଁନ୍ତି। ସେ କହିଛନ୍ତି ଯେ ବର୍ତ୍ତମାନ ଦେଶରେ ମହଙ୍ଗା ଦର ଚରମ ସୀମାରେ ରହିଛି। ଅନେକ ପରିବାର ଠିକ୍ ସମୟରେ ଖାଦ୍ୟ ମଧ୍ୟ ପାଉନାହାନ୍ତି। ଦେଶରେ ପେଟ୍ରୋଲ ଏବଂ ଡିଜେଲ ଦର ବୃଦ୍ଧି ବିଷୟରେ ସଚିନ ପାଇଲଟ କହିଛନ୍ତି ଯେ ଏହି ସମୟରେ ପେଟ୍ରୋଲ ଏବଂ ଡିଜେଲର ମୂଲ୍ୟ ଦେଶୀ ଘିଅ ଅପେକ୍ଷା ମହଙ୍ଗା ହୋଇଛି। ପେଟ୍ରୋଲ ଏବଂ ଡିଜେଲର ମୂଲ୍ୟରେ କ୍ରମାଗତ ବୃଦ୍ଧି ହେତୁ ପ୍ରତ୍ୟେକ ଜିନିଷ ମହଙ୍ଗା ହେବାରେ ଲାଗିଛି ଏବଂ ଦେଶର ସାଧାରଣ ଲୋକଙ୍କ ଉପରେ ଏହାର ସିଧାସଳଖ ପ୍ରଭାବ ପଡୁଛି। ମହଙ୍ଗା ଦର ନେଇ ସେ ଉତ୍ତରାଖଣ୍ଡ ସରକାରଙ୍କୁ ମଧ୍ୟ ଟାର୍ଗେଟ କରିଥିଲେ।
ସଚିନ ପାଇଲଟ କେନ୍ଦ୍ରରେ ମୋଦୀ ସରକାରଙ୍କୁ ଟାର୍ଗେଟ କରି କହିଛନ୍ତି ଯେ ଦେଶର ଅଧିକାଂଶ ରାଜ୍ୟରେ ପେଟ୍ରୋଲ ଦର ୧୦୦ ଟଙ୍କାରୁ ଅଧିକ ହୋଇଛି। ଗତ ୬ ମାସ ମଧ୍ୟରେ ପେଟ୍ରୋଲ ମୂଲ୍ୟ ୬୬ ଥର ବୃଦ୍ଧି କରାଯାଇଛି। ଏଥିରୁ କେନ୍ଦ୍ର ସରକାରଙ୍କ ନୀତି କଣ ଜଣାପଡୁଛି। ମହଙ୍ଗା ଦର କମ କରିବା ପରିବର୍ତ୍ତେ ବଢ଼ିବାରେ କେନ୍ଦ୍ର ସରକାର ଅଧିକ ଆଗ୍ରହ ନେଉଛନ୍ତି। ଯେତେବେଳେ କଂଗ୍ରେସ ସରକାର କେନ୍ଦ୍ରରେ କ୍ଷମତାରେ ଥିଲା ସେତେବେଳେ ପେଟ୍ରୋଲ ଦର ବୃଦ୍ଧିକୁ ନେଇ ଯେଉଁ ପ୍ରସ୍ତାବ ଆସୁଥିଲା ସେ ସବୁକୁ ଆମେ ବିରୋଧ କରିଥିଲୁ। କିନ୍ତୁ ଏହି ସରକାର ଜାଣିଶୁଣି ଲୋକଙ୍କ ଉପରେ ମହଙ୍ଗା ଦରର ଭାର ଦେଉଛନ୍ତି ବୋଲି କହିଛନ୍ତି ପାଇଲଟ।
ସେ କହିଛନ୍ତି ଯେ ୭ ବର୍ଷରେ ୨୩ କୋଟି ଲୋକ ଦାରିଦ୍ର ସୀମାରେଖା ତଳକୁ ଆସିଛନ୍ତି ଏବଂ ପେଟ୍ରୋଲ ଏବଂ ଡିଜେଲରେ ଶୁଳ୍କ ବୃଦ୍ଧି କରାଯାଇଛି। ସଚିନ ପାଇଲଟ ଆହୁରି କହିଛନ୍ତି ଯେ ଭାରତ ସରକାର ପେଟ୍ରୋଲ ଉପରେ ଲିଟର ପିଛା ୩୩ ଟଙ୍କା, ଡିଜେଲ ଉପରେ ୩୨ ଟଙ୍କା ଶୁଳ୍କ ଧାର୍ଯ୍ୟ କରିଛନ୍ତି। ଚାଷୀମାନେ ଦୀର୍ଘ ଦିନ ଧରି ଆନ୍ଦୋଳନ କରୁଛନ୍ତି କିନ୍ତୁ ସରକାର ସେମାନଙ୍କ ସମସ୍ୟା ଶୁଣୁ ନାହାଁନ୍ତି। ଭାରତର କମ୍ପାନୀଗୁଡ଼ିକୁ ଦୁର୍ବଳ କରିବା ପାଇଁ କାର୍ଯ୍ୟ କରାଯାଇଛି।
ଉତ୍ତରାଖଣ୍ଡରେ ୨୦୨୨ରେ ହେବାକୁ ଥିବା ବିଧାନସଭା ନିର୍ବାଚନ ସମ୍ପର୍କରେ ସଚିନ ପାଇଲଟ କହିଛନ୍ତି ଯେ କଂଗ୍ରେସର ଏକ ପ୍ରତିଷ୍ଠିତ ପରମ୍ପରା ରହିଛି ଯେ ସାମୂହିକ ନେତୃତ୍ୱରେ ନିର୍ବାଚନ ଲଢ଼ଯାଏ। ନିର୍ବାଚନ ପରେ ହିଁ ନେତା ଚୟନ କରାଯାଇଥାଏ। କଂଗ୍ରେସର ବିଜେପି ଭଳି ପରମ୍ପରା ନାହିଁ ଯେ ବର୍ଷକୁ ତିନିଥର ମୁଖ୍ୟମନ୍ତ୍ରୀ ପରିବର୍ତ୍ତନ କରାଯିବ। ପାଇଲଟ କହିଛନ୍ତି ଯେ ଯେତେବେଳେ କଂଗ୍ରେସ କ୍ଷମତାକୁ ଆସେ, ସମସ୍ତ ବିଧାୟକଙ୍କ ସର୍ବସମ୍ମତି କ୍ରମେ ନେତା ନିର୍ବାଚିତ ହୁଅନ୍ତି ଏବଂ ତାଙ୍କ ନେତୃତ୍ୱରେ ସରକାର ଚାଲେ। ୨୦୨୨ ରେ ଉତ୍ତରାଖଣ୍ଡରେ ପୂର୍ଣ୍ଣ ସଂଖ୍ୟାଗରିଷ୍ଠତା ସହ କଂଗ୍ରେସ ସରକାର ଗଠନ ହେବ ବୋଲି ପାଇଲଟ କହିଛନ୍ତି।