ପୁରୀ ୨୯।୬: ସ୍ନାନଯାତ୍ରାରେ ତିନି ଠାକୁର ଅତ୍ୟଧିକ ସ୍ନାନ କରିଥିବାରୁ ଏବେ ଅସୁସ୍ଥ । ଜ୍ବରାକ୍ରାନ୍ତ ମହାପ୍ରଭୁଙ୍କ ପୀଡ଼ା ଲାଘବ ପାଇଁ ଆଜି ବଡ଼ ଓଡ଼ିଆ ମଠ ପକ୍ଷରୁ ପ୍ରଦତ୍ତ ଫୁଲୁରୀ ତେଲକୁ ଦଇତାପତି ସେବାୟତ ମହାପ୍ରଭୁଙ୍କୁ ଲାଗି କରିବେ। ଏହି ସୁବାସିତ ତେଲ ଲାଗିଲେ ମହାପ୍ରଭୁମାନଙ୍କର ଜ୍ବରଜନିତ ପୀଡ଼ା ଲାଘବ ହେବାର ବିଶ୍ବାସ ରହିଛି । ଏପଟେ ରଥର ୧୩ ପରସ୍ତ ପୋଟଳ ଓ ଦ୍ବାରବେଢ଼ା କାମ ଶେଷ ହୋଇଥିବା ବେଳେ ରଥର ସୌନ୍ଦର୍ଯ୍ୟକରଣ କାର୍ଯ୍ୟରେ ଲାଗିଛନ୍ତି ଚିତ୍ରକର ସେବାୟତ। ସେପଟେ ନିଆଳିର ମାଧବାନନ୍ଦ ଜୀଉ ପୀଠ ଓ କାକଟପୁର ବିଶ୍ବାମିତ୍ର ମଠ ପକ୍ଷରୁ ମହାପ୍ରଭୁଙ୍କ ଅଣସର ଭାର ପହଞ୍ଚିଛି।
ଅତ୍ୟଧିକ ଜ୍ବରରେ ପୀଡ଼ିତ ମହାପ୍ରଭୁଙ୍କର ଏବେ ଅଣସର ଘରେ ଚାଲିଛି ଅସୁସ୍ଥତାର ଉପଚାର । ମଙ୍ଗଳବାର ପଞ୍ଚମୀ ତିଥିରେ ମହାପ୍ରଭୁଙ୍କୁ ଲାଗି ହେବ ଫୁଲୁରୀ ତେଲ । ଏହି ଫୁଲୁରୀ ତେଲକୁ ପରମ୍ପରା ଅନୁସାରେ ବହୁବର୍ଷ ଧରି ବଡ଼ ଓଡ଼ିଆ ମଠ ପକ୍ଷରୁ ପ୍ରସ୍ତୁତ କରାଯାଇଆସୁଅଛି। ଘଣାପେଡ଼ା ରାଶିତେଲରେ ବେଣଚେର, ମାଳତି, କିଆ, କେତକୀ, ବଉଳଫୁଲ ଭଳି ସ୍ବତନ୍ତ୍ର ସୁବାସିତ ଫୁଲ ଓ ୮ ପ୍ରକାର ଚେରମୂଳି ପକାଯାଇ ପ୍ରସ୍ତୁତ କରାଯାଇଥାଏ । ପଞ୍ଚମୀ ତିଥିରେ ଅର୍ଥାତ୍ ଆଜି ଏହାକୁ ଶ୍ରୀମନ୍ଦିର ନିଆଯିବା ପରେ ଦଇତାପତିମାନେ ଏହାକୁ ମହାପ୍ରଭୁଙ୍କ ଶ୍ରୀଅଙ୍ଗରେ ଲାଗି କରିଥାନ୍ତି । ବିଶ୍ବାସ ରହିଛି ଏହି ତେଲ ଲାଗିପରେ ମହାପ୍ରଭୁ ସାମାନ୍ୟ ସୁସ୍ଥ ହୋଇଥାନ୍ତି ।
ଏପଟେ ରଥଖଳାରେ ରଥନିର୍ମାଣର ଶେଷ ପର୍ଯ୍ୟାୟ କାମ ଜାରି ରଖିଛନ୍ତି ସେବାୟତ । ୩ ରଥର ତେରପରସ୍ତ ପୋଟଳ, ପାରାଭାଡ଼ି ଓ କଳସ କାର୍ଯ୍ୟ ଶେଷ ହୋଇଛି। ଆଜି ଦ୍ବାରବେଢ଼ା, ବେଦୀ ସିଂହାସନ ଓ ପ୍ରଭାକାମ ଶେଷ ପର୍ଯ୍ୟାୟରେ ପହଞ୍ଚିଛି । ସେହିପରି ଚିତ୍ରକାର ସେବାୟତମାନେ ରଥର ଚକ, ଅଖ, ପାର୍ଶ୍ବ ଦେବାଦେବୀ, ଓଲଟ ଶୁଆ ପ୍ରଭୃତି ରଙ୍ଗ ଦେବା କାମ ଜାରି ରଖିଛନ୍ତି । ରଥ ବ୍ରେକ କାମ ମଧ୍ୟ ଆଜିଠାରୁ ଆରମ୍ଭ ହୋଇଛି ।
ସେହିପରି ଜ୍ବରରେ ପୀଡ଼ିତ ଥିବା ମହାପ୍ରଭୁଙ୍କ ସୁସ୍ଥତା ଲାଗି ପବିତ୍ର ପ୍ରାଚୀ କ୍ଷେତ୍ରରୁ ଆସି ପହଞ୍ଚିଛି ଅଣସର ଫଳଭାର। ନିଆଳିର ଶ୍ରୀମାଧବାନନ୍ଦ ଜୀଉପୀଠ ଓ କାକଟପୁର ବିଶ୍ବମିତ୍ର ମଠ ପକ୍ଷରୁ ଏହି ଭାର ଆସିଛି। ଏହି ଅଣସର ଭାର ସାମଗ୍ରୀ ମଧ୍ୟରେ ପଣସ, ଆମ୍ବ, ସପୁରୀ, କଦଳୀ, ପିଜୁଳି, ଖଜୁରୀ ଆସିଛି । ଗତ ଦୁଇ ବର୍ଷ ଧରି ମହାପ୍ରଭୁଙ୍କ ମଉଳାକ୍ଷେତ୍ର କୁହାଯାଉଥିବା ଶ୍ରୀମାଧବାନନ୍ଦ ଜୀଉ ପୀଠରୁ ପୋଢ଼ୁଆଁ ଭାର ପଠାଯିବା ମଧ୍ୟ ଉଲ୍ଲେଖନୀୟ ରହିଛି। ଚଳିତବର୍ଷ ରଥକାର୍ଯ୍ୟ ବହୁତ ପୂର୍ବରୁ ଶେଷ ହେଉଥିବା ବେଳେ ମହାପ୍ରଭୁଙ୍କ ଅନବସର ନୀତି ମଧ୍ୟ ନିଷ୍ଠାର ସହ କରୁଛନ୍ତି ସେବାୟତମାନେ।