ବରଗଡ, ୦୮|୦୮: ବର୍ତ୍ତମାନ ଚାଷର ସମୟ । ଏହି ସମୟରେ ରାଜ୍ୟର ଅଧିକାଂଶ ଚାଷୀ ଚାଷ କରିବା ପାଇଁ ବିଭିନ୍ନ ବ୍ୟାଙ୍କ, ସମବାୟ ସଂସ୍ଥା , ମହାଜନ ମାନଙ୍କ ପାଖରୁ ଋଣ ନେଇ ନିଜର ଚାଷ କାମ କରିଥାନ୍ତି । ଅନେକ ପରିଶ୍ରମ ସହିତ ଅନେକ ବାଧାବିଘ୍ନ ସହି ଚାଷୀ କୁଳ କୃଷିକାର୍ଯ୍ୟ ସମ୍ପାଦନ କରିଥାନ୍ତି । କିନ୍ତୁ ବଡ଼ ଦୁଃଖର ବିଷୟ ଯେ କିଛି ଖଳ ପ୍ରକୃତିର ବ୍ୟବସାୟୀ ସମୟ ଓ ସୁଯୋଗ ଦେଖି ଚାଷୀ ମାନଙ୍କର ରକ୍ତ ଶୋଷଣ କରିବାରେ ଲାଗିଛନ୍ତି । ଏମିତି ଏକ ଘଟଣା ଶନିବାର ବରଗଡ ଜିଲ୍ଲା ପାଇକମାଲରୁ ସାମନାକୁ ଆସିଛି ।
ବର୍ତ୍ତମାନ ଖୋଲା ବଜାରରେ ୟୁରିଆ ସାରର ଅଭାବର ସୁଯୋଗ ନେଇ ପାଇକମାଲର ତାୟଲ ସାର ଦୋକାନର ମାଲିକ ୟୁରିଆ ବସ୍ତା ପିଛା ୪୬୦ ଟଙ୍କାରେ ବିକ୍ରି କରୁଥିବା ଜଣେ ଚାଷୀ ଅଭିଯୋଗ କରିଥିଲେ । ଏହି ଅଭିଯୋଗ ଉପରେ ତୁରନ୍ତ ପଦକ୍ଷେପ ଗ୍ରହଣ କରିବା ନିମନ୍ତେ ଅଧିକାରୀଙ୍କୁ ଅନୁରୋଧ କରାଯାଇଥିଲା । ଅଭିଯୋଗ ପାଇବା ପରେ ବରଗଡ଼ ଜିଲ୍ଲା କୃଷି ଅଧିକାରୀ ଦିନବନ୍ଧୁ ଗାନ୍ଧୀଙ୍କର ନେତୃତ୍ୱରେ ଏକ ଟିମ୍ ଦ୍ୱିପ୍ରହରରେ ଦୁଇ ଗୋଟି ସାର ଗୋଦାମ ଉପରେ ଚଢ଼ାଉ କରିଥିଲା । ଅଭିଯୋଗର ସତ୍ୟତା ଜଣାପଡିବା ପରେ ଦୁଇ ଶହ ଷାଠିଏ ବସ୍ତା ୟୁରିଆ ସାର ଜବତ କରାଯାଇଛି ।
ଏହି ଚଢଉ ଓ ଜବତ ବିଷୟରେ ଜିଲ୍ଲାପାଳଙ୍କୁ ବିସ୍ତୃତ ରିପୋର୍ଟ ପ୍ରଦାନ କରାଯିବ । ଜିଲ୍ଲାପାଳଙ୍କର ନିର୍ଦେଶ ପରେ କିଶୋର ଅଗ୍ରୱାଲଙ୍କର ଉପରେ ପରବର୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜଣାପଡିଛି ।