ଅମୃତସର ୧୫|୩ : ପାକିସ୍ତାନ ସୀମା ନିକଟ ଅମୃତସର ସହରରେ ଆତଙ୍କର ବାତାବରଣ ଦେଖାଦେଇଛି । ଗତକାଲି ବିଳମ୍ବିତ ରାତିରେ ହୋଇଥିବା ବିସ୍ଫୋରଣ ଫଳରେ ସହରର ଲୋକେ ଆତଙ୍କିତ ଅବସ୍ଥାରେ ରହିଛନ୍ତି । କଣ ବିସ୍ଫୋରଣ ହୋଇଥିଲା ଏବଂ କେଉଁ କାରଣରୁ ହୋଇଥିଲା ତାହାର କାରଣ ସ୍ପଷ୍ଟ ହୋଇନାହିଁ । କିନ୍ତୁ ପୋଲିସ ଏବଂ ପ୍ରଶାସନ ଅଧିକାରୀ ଏହା ସ୍ପଷ୍ଟ କରିଛନ୍ତି ଯେ, ସହରର ଆଖପାଖ ଅଞ୍ଚଳରେ ବିସ୍ଫୋରଣର ଶବ୍ଦ ଶୁଣାଯାଇଛି ।
ଶୁଣିବାକୁ ମିଳୁଛି ଯେ, ଏହି ବିସ୍ଫୋରଣ ନିକଟରେ ବିମାନ ଯିବା କାରଣରୁ ହୋଇଛି । ଅନ୍ୟ କେତେକ ଲୋକଙ୍କ କହିବା କଥା ଯେ, ସହରର ଆଖପାଖରେ ଦୁଇଟି ସ୍ଥାନରେ ବିସ୍ଫୋରଣ ହୋଇଛି ମାତ୍ର ଏହା ବିମାନ ଯିବା କାରଣରୁ ହୋଇଥିବା ଜଣାପଡୁନାହିଁ । ଅନ୍ୟପଟେ ଏଭଳି ସୂଚନା ମିଳୁଛି ଯେ, ବିସ୍ଫୋରଣ କାରଣରୁ ଅନେକ ଲୋକଙ୍କ ଘରର କାଚ ମଧ୍ୟ ଭାଙ୍ଗି ଯାଇଛି । ବିସ୍ଫୋରଣ ଏତେ ଜୋରଦାର ଥିଲା ଯେ, କେବଳ ଅମୃତସର ନୁହେଁ ବରଂ ଆଖପାଖ ଅଞ୍ଚଳକୁ ମଧ୍ୟ ଶୁଣାଯାଇଥିଲା । କେତେକ ଅଞ୍ଚଳରେ ଭୟରେ ଲୋକ ଘରୁ ବାହାରି ନଥିଲେ ।
ସହରର କେତେକ ସ୍ଥାନରେ ପୋଲିସ ଲୋକମାନଙ୍କୁ ବୁଝାସୁଝା କରି ମଧ୍ୟ ଘରକୁ ପଠାଇଛି । ପୋଲିସ କମିଶନର ଏବଂ ଜିଲ୍ଲାପାଳ କହିଛନ୍ତି ଯେ, ବିସ୍ଫୋରଣ କେଉଁଠାରେ ହୋଇଛି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଏନେଇ ଯାଞ୍ଚ ଜାରି ରହିଛି । ପୋଲିସ କମିଶନର କହିଛନ୍ତି ବିମାନ କାରଣରୁ ସୋନିକ ବୁମ୍ ପାଇଁ ମଧ୍ୟ ହୋଇପାରେ । ଲୋକମାନଙ୍କୁ ଭୟଭୀତ ନହେବା ପାଇଁ ଜିଲ୍ଲାପାଳ ଅପିଲ ମଧ୍ୟ କରିଛନ୍ତି ।