କୋଲକତା ୨୬|୧୧: ମୁମ୍ବାଇ ଆକ୍ରମଣ ଘଟଣାକୁ ୧୦ବର୍ଷ ପୂରିଥିବାବେଳେ କୋଲକତାରେ ଆତଙ୍କବାଦୀ ଅଛନ୍ତି ବୋଲି ମେସେଜ୍ ଟାଇପ୍ କରିବା ଯୁବକଙ୍କ ପାଇଁ ମହଙ୍ଗା ପଡିଛି । ମୁମ୍ବାଇ ଯାଉଥିବା ବିମାନରେ ବସିଥିବା ଜଣେ ଯୁବକ ତାଙ୍କ ସାଙ୍ଗଙ୍କୁ ଥଟାମଜାରେ ବିମାନରେ ଆତଙ୍କବାଦୀ ଥିବା ମେସେଜ ପଠାଇଥିଲେ । ଯୁବକଙ୍କ ସହ ବସିଥିବା ଅନ୍ୟ ଜଣେ ଯାତ୍ରୀ ସେହି ମେସେଜଟି ଦେଖି କ୍ୟାବିନ୍ କ୍ରୁଙ୍କୁ ଏ ବିଷୟରେ ସୂଚନା ଦେଇଥିଲେ । ଏହା ପରେ ଯାତ୍ରୀ ଜଣଙ୍କୁ ଅଟକ ରଖାଯାଇଛି ।
ସୂଚନା ଅନୁସାରେ ଜେ ପୋଦାର ନାମକ ଯୁବକ ଜେଟ୍ ଏୟାରଓ୍ବେଜ୍ ର ଫ୍ଲାଇଟ୍ ୯ଡବ୍ଲୁ୪୭୨ରେ ମୁମ୍ବାଇ ଯିବା ପାଇଁ ୫ଜଣ ସାଙ୍ଗଙ୍କ ସହ ବିମାନରେ ଚଢିଥିଲେ । ନିଜ ସିଟ୍ ରେ ବସିବା ପରେ ସେ ରୁମାଲରେ ତାଙ୍କର ଅଧା ମୁହଁ ଘୋଡାଇଦେଇଥିଲେ ଏବଂ ତାଙ୍କ ଫୋନ୍ ରୁ ହ୍ବାଟସଆପରେ ମେସେଜ୍ ପଠାଇବା ଆରମ୍ଭ କରିଦେଇଥିଲେ । ପୋଦାରଙ୍କ ପାଖରେ ବସିଥିବା ଜଣେ ବ୍ରିଟିଶ ଯାତ୍ରୀଙ୍କୁ ପୋଦାରଙ୍କ ଗତିବିଧି ସନ୍ଦେହଜନକ ଲାଗିଥିଲା । ସେ ପଠାଉଥିବା ମେସେଜରେ ଗୋଟିଏ ମେସେଜ ବିମାନରେ ଆତଙ୍କବାଦୀ ଥିବା ଲେଖାଥିଲା । ଏହା ଦେଖି ଯାତ୍ରୀ ଜଣଙ୍କ ଏ ସୂଚନା କ୍ରୁ ମେମ୍ବରଙ୍କୁ ଦେଇଥିଲେ । କ୍ରୁ ମେମ୍ବର ପାଇଲଟକୁ ଏହାର ସୂଚନା ଦେଇଥିଲେ । ପାଇଲଟ ସ୍ଥାନୀୟ ଅଧିକାରୀଙ୍କୁ ଏହି ସୂଚନା ଦେଇଥିଲେ । ଏହାପରେ ବିମାନରେ ନିରାପତ୍ତା ତତ୍ପରାତା ଦେଖା ଦେଇଥିଲା। ବିମାନଟିକୁ ପାର୍କିଙ୍ଗ୍ ଓ୍ବେକୁ ଫେରାଇ ନେବାକୁ ସ୍ଥିର କରାଗଲା । ଏହାପରେ ବିମାନ ଭିତରକୁ ନିରାପତ୍ତା କର୍ମଚାରୀମାନେ ଆସି ଆତଙ୍କବାଦୀ ଅଛନ୍ତି ବୋଲି ମେସେଜ୍ ଟାଇପ୍ କରୁଥିବା ଯାତ୍ରୀ ଜଣଙ୍କୁ ଅଟକ ରଖାଯାଇ । ସିଆଇଏସଏଫ ଯୁବକଙ୍କୁ ଏ ସମ୍ବନ୍ଧରେ ପଚରାଉଚରା କରୁଛି । ଅନ୍ୟପଟେ ଯୁବକ ଜଣଙ୍କ କହିଛନ୍ତି ଯେ ସେ ତାଙ୍କ ସାଙ୍ଗମାନଙ୍କୁ ବିମାନରେ ଆତଙ୍କବାଦୀ ଥିବା କଥା ମଜାରେ କହିଥିଲେ ।
ସୂଚନା ଅନୁସାରେ ଏଭଳି ମେସେଜ୍ ଯୋଗୁଁ ଘଣ୍ଟାଏରୁ ଅଧିକ ସମୟ ବିଳମ୍ବରେ ବିମାନଟି ଉଡାଣ ଆରମ୍ଭ କରିଥିଲା।