ନବରଙ୍ଗପୁର ୪।୧: ନବରଙ୍ଗପୁର ଜିଲ୍ଲା ଉମରକୋଟ, ରାଇଘର ଅଞ୍ଚଳରେ ଦିନକୁ ଦିନ ବନ୍ୟଜନ୍ତୁ ଓ ପକ୍ଷୀଙ୍କ ଚୋରା ଚାଲାଣ କାରବାର ବୃଦ୍ଧି ପାଉଛି । ଜଣେ ଯୁବକ ୧୩ଟି ଜୀବନ୍ତ ଶୁଆ ପକ୍ଷୀକୁ ଓଡିଶା, ଛତିଶଗଡ଼ ସୀମାନ୍ତ ଜଙ୍ଗଲରୁ ଧରି ଆଣି ଉମରକୋଟ ଡିଏନକେ ସ୍ଥିତ ତାଙ୍କ ଘରେ ରଖିଥିଲେ । ତାକୁ ବାହାର ରାଜ୍ୟରେ ବିକ୍ରି କରିବାପାଇଁ ଉଦ୍ୟମ କରୁଥିବା ସମୟରେ ଉମରକୋଟ ବନ ବିଭାଗ ଶୁଆ ଚାଲାଣକାରୀ ଯୁବକଙ୍କ ଘରେ ଚଢ଼ାଉ କରି ୧୩ଟି ଜୀବନ୍ତ ଶୁଆ ଉଦ୍ଧାର କରିବା ସହ ଚାଲାଣକାରୀକୁ ଗିରଫ କରିଛି । ଗୋଟିଏ ଶୁଆକୁ ୧୨ ଶହ ଟଙ୍କାରେ ବିକ୍ରି କରିବାର ଯୋଜନା କରିଥିଲା ଗିରଫ ଯୁବକ । ପୂର୍ବରୁ ଜୀବନ୍ତ କଇଁଚ, ବଜ୍ରକାପ୍ତା, କଲରା ପତରିଆ ବାଘ ଛାଲ ଜବତ କରାଯାଇ ଚୋରା ଚାଲାଣକାରୀଙ୍କୁ ଗିରଫ କରାଯାଇଥିଲା । ବନ୍ୟଜନ୍ତୁ ଚୋରା ଚାଲାଣକାରୀଙ୍କ ପାଇଁ କଡା ଆଇନ ରହିଥିବା ବେଳେ ବନ୍ୟଜନ୍ତୁ ଚାଲାଣକାରୀମାନେ ଭୟ କରୁନଥିବା ବେଳେ ବନ୍ୟଜନ୍ତୁଙ୍କ ସୁରକ୍ଷାକୁ ନେଇ ପ୍ରଶ୍ନ ସୃଷ୍ଟି ହେଉଛି।