ମୋରଡା, ୧୧/୦୫: ଲକଡାଉନରେ ଥମୁନି ଦେଶୀ ବିଦେଶୀ ମଦ କାରବାର ।ମୟୂରଭଞ୍ଜ ଜିଲ୍ଲା ମୋରଡାର ବିଭିନ୍ନ ଅଞ୍ଚଳରେ ଦିନକୁ ଦିନ ବଢିବାରେ ଲାଗିଛି ଚୋରା ମଦ ବେପାରୀ ଙ୍କ ଦୌରାତ୍ମ୍ୟ । କରୋନା ଦ୍ୱିତୀୟ ଲହରି ପାଇଁ ଲକଡାଉନ ଲାଗିଥିବା ବେଳେ ଚୋରା ମଦ ବେପାରୀଙ୍କର ଚାଲିଛି ଜୋରଦାର ବେପାର । ସାଧାରଣ ଲୋକଙ୍କ ପାଇଁ ରୋଜଗାର କମିବାର ଡର ପଶିଥିବା ବେଳେ ଚୋରା ମଦ ବେପାରୀଙ୍କ ପାଇଁ ଆସିଛି ରୋଜଗାର ବାଟ ।
ଲକଡାଉନର ସୁଯୋଗ ନେଇ ଚୋରାରେ ଦେଶୀ ବିଦେଶୀ ମଦ ବିକ୍ରି ଆରମ୍ଭ କରିଛନ୍ତି କିଛି ବେପାରୀ । ଲକଡାଉନ୍ କାରଣରୁ ସବୁ ଦୋକାନ ବଜାର ବନ୍ଦ ରହିଛି । ଏଥିରୁ ମଦ କାଉଣ୍ଟର ମଧ୍ୟ ବାଦ୍ ପଡିନାହିଁ । କିଛି ଲୋକ ମଦ ପିଇବାକୁ ମଧ୍ୟ ଡହଳ ବିକଳ ହେଉଛନ୍ତି । ଯାହାର ଫାଇଦା ଉଠାଇବା ପାଇଁ କିଛି ଅସାଧୁ ବେପାରୀ ଚୋରା ଚାଲାଣ କରି ଚଢା ଦରରେ ମଦ ବିକ୍ରି କରୁଛନ୍ତି । ମଙ୍ଗଳବାର ମୋରଡା ଅବକାରୀ ବିଭାଗ ପକ୍ଷରୁ ବିଶେଷ ସୂତ୍ରରୁ ଖବର ପାଇଁ ଇଦର ଗ୍ରାମର ମାଳତୀ ସୋରେନ ଘରୁ ୯ ଲିଟର ଚୋରା ବିଦେଶୀ ମଦ ଜବତ କରାଯାଇ ତାଙ୍କୁ ଗିରଫ କରାଯାଇଛି ।
ସେହିପରି ଝିଙ୍କିରିଆ ଗ୍ରାମର ଛିତା ସୋରେନଙ୍କ ଘରୁ ୨୦ ଲିଟର ଚୋରା ଦେଶୀ ମଦ ଜବତ କରିବା ସହ ତାଙ୍କୁ ବିଭାଗ ଗିରଫ କରିଛି । ଗିରଫ କରି ଗାଡ଼ିରେ ଆଣୁଥିବା ବେଳେ ବାଟରେ ଛିତା ସୋରେନ ପରିସ୍ରା ଯିବାକୁ କହି ଗାଡିରୁ ଓହ୍ଲାଇ ଥିଲେ । ସାଙ୍ଗରେ ମହିଳା କର୍ମଚାରୀ ମଧ୍ୟ ଓହ୍ଲାଇ ଥିଲେ । ତେବେ ହଠାତ ଛିତା ସୋରେନ ଦୌଡିବାକୁ ଆରମ୍ଭ କରିଦେଲେ । ମୋରଡା ଅବକାରୀ ବିଭାଗର କର୍ମଚାରୀ ମାନେ ତାଙ୍କୁ ଧରିବାରେ ସଫଳ ହୋଇଥିଲେ । ତେବେ ଦୁଇଜଣଙ୍କୁ ଗିରଫ କରି କୋର୍ଟ ଚାଲାଣ କରାଯିବ ବୋଲି ସୂଚନା ଦେଇଛନ୍ତି ମୋରଡା ଅବକାରୀ ଅଧିକାରୀ ଭରତ ମିଶ୍ର ।
