ମୁମ୍ବାଇ ୨୬/୧୧ : ମୁମ୍ବାଇର ପୂର୍ବତନ ପୋଲିସ କମିଶନର ପରମ ବୀର ସିଂହଙ୍କ ବିରୁଦ୍ଧରେ ଆଉ ଏକ ସଙ୍ଗୀନ ଅଭିଯୋଗ ଆସିଛି । ପୂର୍ବତନ ଆସିଷ୍ଟାଣ୍ଟ ପୋଲିସ କମିଶନର ସମଶେର ଖାନ ପଠାନ୍, ପରମ ବୀର ସିଂହଙ୍କ ବିରୁଦ୍ଧରେ ସାଂଘାତିକ ଅଭିଯୋଗ କରିଛନ୍ତି ଯାହାକି ଏବେ ଚର୍ଚ୍ଚାର ବିଷୟ ପାଲଟିଛି । ସମଶେର ପଠାନ୍ ଅଭିଯୋଗ କରିଛନ୍ତି ଯେ, ‘୨୬/୧୧ ମୁମ୍ବାଇ ଆକ୍ରମଣ ସମୟରେ ମୁମ୍ବାଇ ପୋଲିସର ଏଟିଏସ୍ DIG ଥିବା ପରମ ବୀର ସିଂହ ଗୋଟିଏ ମୋବାଇଲକୁ ଗାଏବ କରିଦେଇଥିଲେ । ଯାହାକି କୁଖ୍ୟାତ ଆତଙ୍କବାଦୀ ଅଜମଲ ଅମୀର କସାବର ମୋବାଇଲ ଫୋନ ଥିଲା ।’
ଘଟଣାକୁ ଦୀର୍ଘ ଦିନ ବିତିଯାଇଥିଲେ ସୁଦ୍ଧା ବର୍ତ୍ତମାନ ଏଭଳି ସଙ୍ଗୀନ ଅଭିଯୋଗ ଆଣିଛନ୍ତି ପୂର୍ବତନ ପୋଲିସ ଅଧିକାରୀ ସମଶେର ପଠାନ୍ । ଏ ନେଇ ଗୁରୁବାର ସେ ମୁମ୍ବାଇ ପୋଲିସକୁ ଅଭିଯୋଗ କରିବା ସହିତ ମାମଲାର ପୁଣି ଥରେ ତଦନ୍ତ କରିବା ପାଇଁ ଅପିଲ କରିଛନ୍ତି । ସେ କହିଛନ୍ତି, ‘୨୬/୧୧ ମୁମ୍ବାଇ ଆକ୍ରମଣ ବେଳେ ଏକ ଫୋନ ମିଳିଥିଲା । ସେହି ଫୋନ ମାଧ୍ୟମରେ କସାବ ପାକିସ୍ତାନ ସହ ଲିଙ୍କରେ ଥିଲା । ସେଠାରୁ କିଛି ଆତଙ୍କବାଦୀ କସାବକୁ ଫୋନ ମାଧ୍ୟମରେ ନିର୍ଦେଶ ଦେଉଥିଲେ । ଆକ୍ରମଣ ପରେ କସାବ ବ୍ୟବହାର କରିଥିବା ଫୋନକୁ ତତ୍କାଳୀନ ପୋଲିସ ଅଧିକାରୀ ପରମ ବୀର ସିଂହ ପାକିସ୍ତାନୀ ଗୁଇନ୍ଦା ସଂସ୍ଥା ISIକୁ ଗୁପ୍ତରେ ବିକ୍ରି କରିଦେଇ ଥାଇପାରନ୍ତି ।’
ପୂର୍ବରୁ ଗତ ଜୁଲାଇ ମାସରେ ମଧ୍ୟ ମୁମ୍ବାଇ ପୋଲିସ କମିଶନରଙ୍କୁ ଚିଠି ଲେଖି ଏହାର ତଦନ୍ତ କରିବାକୁ ଅପିଲ କରିଥିଲେ ପୂର୍ବତନ ପୋଲିସ ଅଧିକାରୀ ସମଶେର ଖାନ ପଠାନ୍ । ନାଁ ଗୁପ୍ତ ରଖି ସେ ମୁମ୍ବାଇ ପୋଲିସ କମିଶନରଙ୍କୁ ଏହାର ତଦନ୍ତ କରିବା ପାଇଁ ଚିଠି ଲେଖିଥିଲେ । କିନ୍ତୁ ବର୍ତ୍ତମାନ ଉକ୍ତ ଚିଠିର ଏକ ନକଲ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ବର୍ତ୍ତମାନ ଏହି ଘଟଣାର ତଦନ୍ତ କରି କଡା କାର୍ଯ୍ୟାନୁଷ୍ଠାନ ନେବାକୁ ମୁମ୍ବାଇ ସିପିଙ୍କୁ ଅନୁରୋଧ କରିଛନ୍ତି ସମଶେର ।
ଲାଞ୍ଚ କାରବାର ତଥା ପୋଲିସ କମିଶନର ଥିବା ବେଳେ ବ୍ୟାପକ ଅନିୟମିତତା କରିଥିବା ପରମ ବୀର ସିଂହ ଏବେ ତଦନ୍ତ ପରିସରଭୁକ୍ତ ଅଛନ୍ତି । ମୁମ୍ବାଇର ପୂର୍ବତନ ପୋଲିସ କମିଶନର ପରମ ବୀର ସିଂହଙ୍କ ନାଁ ରେ ବିଭିନ୍ନ ଅପରାଧିକ ମାମଲା ସାମ୍ନାକୁ ଆସିବା ପରେ ତାଙ୍କ ବିରୁଦ୍ଧରେ ତଦନ୍ତ ଆରମ୍ଭ ହୋଇଥିଲା । ଅଦାଲତ ତାଙ୍କୁ ପଳାତକ ଘୋଷଣା କରିବା ସହିତ ବାସଭବନ ସାମ୍ନାରେ ନୋଟିସ୍ ଲଗାଇଥିଲେ । ଏବେ ଦୁର୍ନୀତିଗ୍ରସ୍ତ ବାବୁ ମୁମ୍ବାଇ କ୍ରାଇମବ୍ରାଞ୍ଚରେ ହଜାର ହେବା ସହିତ ୬ ଘଣ୍ଟା ଧରି ଜେରାର ସମ୍ମୁଖୀନ ହୋଇଥିଲେ ।
