ଲାହୋର, ୧୪|୦୫ :ପାକିସ୍ତାନ ସ୍ଥିତ ବେଲୁଚିସ୍ଥାନର ଅର୍ଥମନ୍ତ୍ରୀ ଜହୁର ବୁଲେଦୀ କରୋନା ଭାଇରସରେ ସଂକ୍ରମିତ ହୋଇଛନ୍ତି । ତାଙ୍କୁ ସ୍ଥାନୀୟ ଏଖ ହସ୍ପିଟାଲରେ ଭର୍ତ୍ତି କରାଯାଇଛି । ସେ ହେଉଛନ୍ତି ନିଜ ଅଞ୍ଚଳର ପ୍ରଥମ ରାଜନେତା ଯିଏ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ତେବେ ତାଙ୍କଠାରେ ଭାଇରସର କୌଣସି ଲକ୍ଷଣ ଦେଖାଯାଉ ନଥିବା ଓ ସେ ନିଜକୁ କ୍ୱାରେଣ୍ଟାଇନ କରିଥିବା ଟ୍ୱିଟ୍ ଯୋଗେ ସୂଚନା ଦେଇଛନ୍ତି ।
ସେ ଟ୍ୱିଟ୍ କରି କହିଛନ୍ତି ଯେ, ନମୂନା ଯାଂଚ ପରେ ସେ କରୋନା ଭାଇରସରେ ସଂକ୍ରମିତ ହୋଇଥିବା ଜାଣିବାକୁ ପାଇଥିଲେ । ଏଙାସହ ସେ ନିଜ ସମର୍ଥକ ଓ ଶୁଭେଚ୍ଛୁଙ୍କୁ ଧନ୍ୟବାଦ ଜଣାଇଛନ୍ତି । ଏହାସହ ଡାକ୍ତରଙ୍କ ସମସ୍ତ ପରାମର୍ଶ ମାନିବା ସହ ଅତିଶୀଘ୍ର ସୁସ୍ଥ ହେବେ ବୋଲି ସେ ଆଶା କରିଛନ୍ତି ।
ଏକ୍ସପ୍ରେସ୍ ଟ୍ରିବ୍ୟୁନର ସୂଚନାନୁସାରେ, ବୁଲେଦୀ ବେଲୁଚିସ୍ଥାନର ପ୍ରଥମ ନେତା ଯିଏ କରୋନା ସଂକ୍ରମିତ ହୋଇଛନ୍ତି । ଏହାପୂର୍ବରୁ ପାକିସ୍ତାନ ନ୍ୟାଶନାଲ ଆସେମ୍ବଲୀ ଅଧ୍ୟକ୍ଷ ଅସଦ୍ କୈସର କରୋନା ସଂକ୍ରମିତ ହୋଇଥିଲେ । ଏପରିକି ସିନ୍ଧ୍ ରାଜ୍ୟପାଳ ଇମରାନ୍ ଇସମାଇଲ ମଧ୍ୟ କରୋନା ପଜିଟିଭ୍ ଚିହ୍ନଟ ହୋଇଥିଲେ ।
