ଢେଙ୍କାନାଳ ୦୯।୦୯ : ଢେଙ୍କାନାଳ ଜିଲ୍ଲା ରାସୋଳ ବାଲିକିଆରୀ ଗ୍ରାମରେ ହାତୀ ଉପଦ୍ରବ । ହାତୀ ଆକ୍ରମଣରେ ଜଣେ ଚାଷୀଙ୍କର ମୃତ୍ୟୁ ହୋଇଛି । ମୃତ ଚାଷୀ ଜଣଙ୍କ ବାଲିକିଆରୀ ଗାଁର ସଞ୍ଜୟ ରାଉତ ବୋଲି ଜଣାପଡିଛି ।
ବିଳମ୍ବିତ ରାତିରେ ସଞ୍ଜୟ ଗାଁର କିଛି ଚାଷୀମାନଙ୍କ ସହ ବିଲକୁ ପାଣି ଦେଖିବାକୁ ଯାଇଥିଲେ । କିନ୍ତୁ ସେମାନେ ଯାଉଥିବା ବେଳେ ହାତୀ ହାବୁଡ଼ରେ ପଡିଯାଇଥିଲେ । ଅନ୍ୟମାନେ ସୌଭାଗ୍ୟବଶତଃ ହାତୀ କବଳରୁ ଜୀବନ ବଞ୍ଚାଇ ଖସି ଯାଇଥିବା ବେଳେ ସଞ୍ଜୟ ଖସି ପାରିନଥିଲେ ।
ହାତୀ ସଞ୍ଜୟଙ୍କୁ ପାଦରେ ଦଳ ଦେଇଥିଲା । ଯାହାଫଳରେ ସଞ୍ଜୟ ଗୁରୁତର ଭାବେ ଆହତ ହୋଇଥିଲେ । ଘଟଣାସ୍ଥଳରୁ ତାଙ୍କୁ ଗୁରୁତର ଭାବେ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । କିନ୍ତୁ ତାଙ୍କ ଅବସ୍ଥା ଶୋଚନୀୟ ହେବାରୁ କଟକ ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା , ହେଲେ ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଛନ୍ତି ।
