ନିଶ୍ଚିନ୍ତକୋଇଲି ୨୭।୧୦: ବିଲରେ ଘାସ କାଟୁଥିବା ବେଳେ ଆକ୍ରମଣ କଲା ହାତୀ । ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଛି । ମୃତକ ହେଉଛନ୍ତି ଭାଗବତ ବେହେରା । କଟକ ଜିଲ୍ଲା ନିଶ୍ଚିନ୍ତକୋଇଲି ଥାନା କଟିକଟା ପଞ୍ଚାୟତର ରାମରାଙ୍ଗ ପାଟସାଇଲୋ ଗାଁରେ ଘଟିଛି ଏଭଳି ଅଘଟଣ । ପଛପଟୁ ଶୁଣ୍ଢରେ ଟେକି କଚାଡ଼ି ମାରିଦେଲା ହାତୀ । ଛତିଆ ଅମରାବତୀ ଜଙ୍ଗଲରୁ ହାତୀ ଟି ଡେରାବିଶ ବ୍ଲକ୍ ଦେଇ ମାହାଙ୍ଗା ଧାନ ବିଲ ପାଟ ଦେଇ ନିଶ୍ଚିନ୍ତକୋଇଲି ଅଂଚଳକୁ ଚାଲି ଆସିଥିବା ସୂଚନା ମିଳିଛି ।
ଗତ ୨୩ ତାରିଖ ଦିନ ଏଭଳି ଗୋଟିଏ ହାତୀ ନିଶ୍ଚିନ୍ତକୋଇଲି ଜିଗ୍ନୀପୁର ଧାନ ବିଲ ପାଟରେ ଆତଙ୍କ ସୃଷ୍ଟି କରିଥିଲା। ବନ ବିଭାଗ ଓ ପୋଲିସ ଟିମ୍ ଲାଗି ହାତୀଟିକୁ ଛତିଆ ଜଙ୍ଗଲକୁ ଘଉଡେଇ ନେଇଥିବା ବେଳେ ଆଜି ପୁଣି ଏକ ହାତୀ ଆସି ଜଣଙ୍କୁ ମାରିଦେଇଛି । ଏବେ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହେବା ସହ ଅସନ୍ତୋଷ ପ୍ରକାଶ ପାଇଛି ।
