ଦେବଗଡ, ୨୭।୦୬: ଦେବଗଡ ଜିଲ୍ଲା ରିଆମାଳ ଥାନା ଅନ୍ତର୍ଗତ ପାଳକୁଦର ଗ୍ରାମରେ ନିର୍ମାଣାଧୀନ ପୋଲର ସେଣ୍ଟ୍ରିଂ ଭୁଷୁଡି ଜଣେ ଶ୍ରମିକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଏଥିରେ ଅନ୍ୟ ତିନିଜଣ ଆହତ ହୋଇଛନ୍ତି । ଆହାତ ମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଶ୍ରମିକମାନେ କଂସର ଠାରୁ ପାଳକୁଦର ଗ୍ରାମ ରାସ୍ତାରେ ଏକ ନିର୍ମାଣାଧୀନ ପୋଲର ସେଣ୍ଟ୍ରିଂ ଉପରେ ଚଢି ଲୁହା ଛଡ ବାନ୍ଧୁଥିବା ବେଳେ ହଠାତ୍ ସେଣ୍ଟ୍ରିଂ ଭୁଷୁଡି ପଡିଥିଲା। ଫଳରେ କାମ କରୁଥିବା ଶ୍ରମିକ ମାନେ ଛଡ ଓ ସେଣ୍ଟ୍ରିଂ ମଧ୍ୟରେ ଚାପି ହୋଇଯାଇଥିଲେ । ପାଖରେ ଥିବା ଅନ୍ୟ ଶ୍ରମିକମାନେ ସେମାନଙ୍କୁ ଉଦ୍ଧାର କରିଥିବା ବେଳେ ଜଣେ ଶ୍ରମିକଙ୍କ ଘଟଣାସ୍ଥଳରେ ଶୋଚନୀୟ ମୃତ୍ୟୁ ଘଟିଥିଲା ।
ମୃତକ ଜଣଙ୍କ ହେଲେ ଦେବଗଡ ଥାନା ଅନ୍ତର୍ଗତ କଦଳୀପାଳ ଗ୍ରାମର ପ୍ରସନ୍ନ ନାୟକଙ୍କ ୧୯ ବର୍ଷ ବୟସ୍କ ପୁଅ ସିଦ୍ଧାନ୍ତ ନାୟକ । ଖବରପାଇ ରିଆମାଳ ଥାନା ପୋଲିସ ଓ ରିଆମାଳ ଦମକଳ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ମୃତ ଦେହ ଉଦ୍ଧାର କରିଛନ୍ତି । ଆହତ ମାନଙ୍କୁ ଦେବଗଡ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି ।
