ଭୁବନେଶ୍ବର୨୯|୧: ଆଜି ରାଜ୍ୟ କ୍ୟାବିନେଟ୍ ବୈଠକରେ ୧୬ଟି ପ୍ରସ୍ତାବ ଉପରେ ଲାଗିଲା ମୋହର । କାଳିଆ ଯୋଜନାରେ ସବୁ ହିତାଧିକାରୀଙ୍କୁ  ମିଳିବ ସରକାରୀ ସାହାଯ୍ୟ । ସରକାରଙ୍କ ସମସ୍ତ ଲୋକାଭିମୁଖୀ ଯୋଜନାରୁ  ଲାଭ ପାଇ ପାରିବେ ହିତାଧିକାରୀ । ୫ଲକ୍ଷ କୃଷି ଶ୍ରମିକ  କାଳିଆ ଯୋଜନାରେ ସାମିଲ ହେବେ ପ୍ରତିବର୍ଷ  ଦୁଇ କିସ୍ତିରେ  ଚାଷୀଙ୍କୁ ମିଳିବ ଟଙ୍କା । 

ଓଡିଶା ହସ୍ତଶିଳ୍ପ ଯୋଜନା ୨୦୧୯କୁ  ଅନୁମୋଦନ କରିଛି  କ୍ୟାବିନେଟ୍  ।  ରାଜ୍ୟରେ ଶିଶୁ ଓ ମାତୃମୃତ୍ୟୁ ହାର  ହ୍ରାସ ପାଇଁ ଚାଲିଥିବା  ସଂମ୍ପୁର୍ଣ୍ଣା ଯୋଜନାରେ ଗର୍ଭବତୀ ମହିଳାଙ୍କ  ପରିବହନ ଲାଗି  ୧ହଜାର ଓ  ହସ୍ପିଟାଲରୁ ଘରକୁ ଫେରିବାକୁ ୫ଶହ ଟଙ୍କା ଦିଆଯିବ ।  ଦୁର୍ଗମ ଅଞ୍ଚଳରେ ପରିବହନ ବ୍ୟବସ୍ଥା ସୁଧାରିବାକୁ ୯୨ଟି ବାଇକ୍  ଆମ୍ବୁଲାନ୍ସ ଯୋଗାଇ ଦିଆଯିବାକୁ ନିଷ୍ପତି ହୋଇଛି ।  

ସଚିବାଳୟ ଡାଟା ଏଣ୍ଟ୍ରି କ୍ୟାଡର୍ ରୁଲରେ ସଂଶୋଧନ ପାଇଁ ହୋଇଛି ନିଷ୍ପତ୍ତି । ଏହାସହ ଗ୍ରାମ୍ୟ ପାନୀୟ ଜଳ ଯୋଗାଣ ପ୍ରକଳ୍ପର ୫ ଟେଣ୍ଡରକୁ ଅନୁମୋଦନ ମିଳିଛି ।  ଭଦ୍ରକ ଜିଲ୍ଲାର ଲୁଣିପାଣି ଅଞ୍ଚଳକୁ ଯୋଗାଣ ହେବ ପାନୀୟ ଜଳ । ଏଥିପାଇଁ  ଜିଲ୍ଲାର ୫ଟି ବ୍ଲକ୍ ପାଇଁ ଖର୍ଚ୍ଚ ହେବ ୭୫୪ କୋଟି ।

ଢେଙ୍କାନାଳ ଜିଲ୍ଲାର ପାନୀୟ ଜଳ ଯୋଗାଣ ପାଇଁ ୩୧୫ କୋଟି ଓ  କେନ୍ଦୁଝର ଜିଲ୍ଲାର ପାନୀୟ ଜଳ ଯୋଗାଣ ପାଇଁ ୯୭୯ କୋଟି ଖର୍ଚ୍ଚ ପାଇଁ ନିଷ୍ପତ୍ତି ହୋଇଛି । ଭୁବନେଶ୍ବର ASBM କୁ  ବିଶ୍ବବିଦ୍ୟାଳୟ କରିବାକୁ କ୍ୟାବିନେଟରେ ନିଷ୍ପତ୍ତି ନିଆଯାଇଛି ।