Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଅନ୍ୟ ରାଜ୍ୟରୁ ଶ୍ରମଜୀବୀଙ୍କୁ ଆଣିବା ବାବଦରେ ଇଷ୍ଟକୋଷ୍ଟ ରେଲୱେକୁ ସାଢେ ୫ କୋଟି ଟଙ୍କା, ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିରୁ ଦିଆଯିବ ଅର୍ଥ

23/05/2020 at 2:33 PM

ଭୁବନେଶ୍ବର ୨୩।୫: ରାଜ୍ୟ ସରକାର ଇଷ୍ଟକୋଷ୍ଟ ରେଲୱେକୁ ସାଢେ ୫ କୋଟି ଟଙ୍କା ଅର୍ଥ ରାଶି ପ୍ରଦାନ କରିବେ । ବାହାର ରାଜ୍ୟରେ ଅଟକିଥିବା ଶ୍ରମିକଙ୍କୁ ଟ୍ରେନରେ ଆଣିବା ବାଦବରେ ଏହି ଦେୟ ଭରଣା କରାଯିବ । ମୁଖ୍ୟମନ୍ତ୍ରୀ ରିଲିଫ୍ ଫଣ୍ଡରୁ ଏହି ଅର୍ଥ ଦିଆଯିବ । ଟ୍ରେନରେ ପ୍ରବାସୀ ଶ୍ରମିକଙ୍କ ଯାତାୟତ ଖର୍ଚ୍ଚ ବାବଦରେ କେନ୍ଦ୍ର ସରକାର ୮୫ ପ୍ରତିଶତ ଏବଂ ରାଜ୍ୟ ସରକାର ୧୫ ପ୍ରତିଶତ ଅର୍ଥ ଭରଣା କରିବେ । ଏହି କ୍ରମରେ ଓଡିଶା ତାର ଅଂଶ ସାଢେ ୫ କୋଟି ଟଙ୍କା ଇଷ୍ଟକୋଷ୍ଟ ରେଲୱେକୁ ଦେଇଛି ।

ସୂଚନାଯୋଗ୍ୟ ଯେ, କରୋନା ବିସ୍ତାରକୁ ରୋକିବାକୁ ଦେଶବ୍ୟାପୀ ଲକ୍ ଡାଉନ୍ ଘୋଷଣା କରାଯାଇଥିଲା । ଲକ୍ ଡାଉନ୍ ଯୋଗୁଁ ବିଭିନ୍ନ ରାଜ୍ୟରେ ଫସିରହିଥିଲେ ପ୍ରବାସୀ ଓଡିଆ। ଗୁଜୁରାଟ, କର୍ଣ୍ଣାଟକ, ତାମିଲନାଡୁ, ତେଲେଙ୍ଗାନା, ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ, ଉତ୍ତରପ୍ରଦେଶ ଆଦି ଅଞ୍ଚଳରୁ ପ୍ରବାସୀମାନେ ଫସି ରହିଥିଲେ । ତେବେ ସେମାନଙ୍କୁ ସେଠାରୁ ସୁରକ୍ଷିତ ଭାବେ ଫେରାଇ ଆଣିବାକୁ ରାଜ୍ୟ ସରକାର ପଦକ୍ଷେପ ନେଇଥିଲେ । ଟ୍ରେନ୍ ଏବଂ ବସ୍ ଯୋଗେ ବିଭିନ୍ନ ରାଜ୍ୟରୁ ପ୍ରବାସୀ ଓଡିଆମାନେ ରାଜ୍ୟକୁ ଫେରୁଛନ୍ତି ।

ରାଜ୍ୟର ଭଦ୍ରକ, ବାଲେଶ୍ବର, ରାୟଗଡା, ବ୍ରହ୍ମପୁର, ଖୋର୍ଦ୍ଧା ଆଦି ଅଞ୍ଚଳକୁ ଟ୍ରେନ୍ ଯୋଗେ ପ୍ରବାସୀମାନେ ଫେରିଛନ୍ତି । ପ୍ରବାସୀମାନଙ୍କ ପାଇଁ ଆଇସୋଲେସନ ଏବଂ କ୍ବାରେଣ୍ଟାଇନ୍ ବାଧ୍ୟତମୂଳକ କରାଯାଇଥିଲା । ସେମାନଙ୍କୁ ନିଜ ନିଜ ଅଞ୍ଚଳରେ କ୍ବାରେଣ୍ଟାଇନ୍ ରେ ରଖାଯାଇଛି ।

   Related Posts