ଭୁବନେଶ୍ବର ୭|୪ : ଆଜି ଓଡିଶା ପାଇଁ ୨୦୧୯ ନିର୍ବାଚନୀ ଇସ୍ତାହାର ପ୍ରକାଶ କରିଛି କଂଗ୍ରେସ । ପିସିସି ସଭାପତି ନିରଞ୍ଜନ ପଟ୍ଟନାୟକ ଇସ୍ତାହାର ପ୍ରକାଶ କରିଛନ୍ତି । ଏଥିରେ ନିଯୁକ୍ତି, ଚାଷୀ ଓ ଚାଷୀ ସମସ୍ୟା, ମହିଳାଙ୍କ ସମସ୍ୟା ଓ ଗରିବଙ୍କୁ ମୁଖ୍ୟତଃ ପ୍ରାଧାନ୍ୟ ଦିଆଯାଇଛି । ଗରିବଙ୍କ ପାଇଁ ମାସିକ ୬ ହଜାର ଟଙ୍କା ପ୍ରଦାନ ପାଇଁ ଜାତୀୟ ସ୍ତରରେ କଂଗ୍ରେସ ଯାହା ଘୋଷଣା କରିଥିଲା, ତାକୁ ପିସିସି ମଧ୍ୟ ଦୋହରାଇଛି । ମାସକୁ ୬ ହଜାର ନିଯୁକ୍ତି ଗ୍ୟାରେଣ୍ଟି , ମହିଳାଙ୍କ ଆକାଉଣ୍ଟରେ ଟଙ୍କା ଜମା, ଯୁବକଙ୍କୁ ନିଯୁକ୍ତି, ଯେଉଁମାନେ ନିଯୁକ୍ତି ପାଇନଥିବେ ସେମାନଙ୍କୁ ୩ ହଜାର ଟଙ୍କା ବେକାରି ଭତ୍ତା ଆଦି ରହିଛି ଏହି ନିର୍ବାଚନୀ ଇସ୍ତାହାରରେ ।
ଇସ୍ତାହାରରେ କ’ଣ ରହିଛି ଜାଣନ୍ତୁ :
-ଗରିବଙ୍କ ପାଇଁ ମାସିକ ୬ ହଜାର ଟଙ୍କା ପ୍ରଦାନ କରାଯିବ ।
- ମାସକୁ ୬ ହଜାର ନିଯୁକ୍ତି ଗ୍ୟାରେଣ୍ଟି ଦେଇଛି କଂଗ୍ରେସ ।
- ମହିଳାଙ୍କ ଆକାଉଣ୍ଟରେ ଟଙ୍କା ଜମା କରାଯିବ ।
- ଯୁବକଙ୍କୁ ନିଯୁକ୍ତି ଦିଆଯିବ ।
-ନିଯୁକ୍ତି ନପାଇଥିବା ବେକାରୀଙ୍କୁ ମାସିକ ୩ ହଜାର ଟଙ୍କା ଲେଖାଏଁ ଭତ୍ତା ପ୍ରଦାନ କରାଯିବ ।
-ପ୍ରତ୍ୟେକ ପରିବାରର ଜଣକୁ ଚାକିରି ଓ ଚୁକ୍ତିଭିତ୍ତିକ କର୍ମଚାରୀଙ୍କୁ ନିୟମିତ କରାଯିବ ।
- ଚାଷୀଙ୍କ ଋଣ ଛାଡ଼, ଧାନର ଏମ୍ଏସ୍ପି କ୍ବିଣ୍ଟାଲ୍ ପିଛା ୨୬ ଶହ ଟଙ୍କା, ୩ ବର୍ଷ ଯାଏଁ ଚାଷୀଙ୍କୁ ପ୍ରତିବର୍ଷ ସ୍ବତନ୍ତ୍ର ୧୦ ହଜାର ଟଙ୍କାର ସହାୟତା ପ୍ରଦାନ ଓ ଭାଗ ଚାଷୀଙ୍କୁ ସେମାନଙ୍କ ଅଧିକାର ଦିଆଯିବ ।
- ପ୍ରତ୍ୟେକ ଭୂମିହୀନ ପରିବାରକୁ ଜମି ସହିତ ୨୦୨୪ ସୁଦ୍ଧା ସମସ୍ତ ବାସହୀନଙ୍କୁ ଘର ଯୋଗାଇ ଦିଆଯିବ।
- ସଂସଦ, ବିଧାନସଭା ସହିତ ସରକାରୀ ଚାକିରିରେ ୩୩ ପ୍ରତିଶତ ମହିଳାଙ୍କୁ ମିଳିବ ସଂରକ୍ଷଣ।
-ସବୁ ସ୍ତରରେ ଝିଅ ଓ ମହିଳାଙ୍କୁ ମାଗଣା ଶିକ୍ଷା ଓ ଗରିବ ଝିଅଙ୍କ ବାହାଘରରେ ସହାୟତା ପ୍ରଦାନ କରାଯିବ ।
- ଅଙ୍ଗନଓ୍ବାଡୀ କର୍ମୀଙ୍କୁ ନିୟମିତ କରାଯିବା ସହିତ ମାସିକ ୯ ହଜାର ଟଙ୍କା ଦରମା ଦିଆଯିବ ।
-ରାଜ୍ୟ ବଜେଟ୍ରେ ଶିକ୍ଷା ପାଇଁ ୨୦ପ୍ରତିଶତ ଅର୍ଥ ଖର୍ଚ୍ଚ କରିବାକୁ ଓ ଶିକ୍ଷା ଅଧିକାରକୁ ଦ୍ୱାଦଶ ଶ୍ରେଣୀ ଯାଏଁ ଲାଗୁ କରିବା ।
-ଶିକ୍ଷକଙ୍କୁ ଜାତୀୟ ହାରରେ ଦରମା ଦେବା
- ୬ ମାସ ମଧ୍ୟରେ ଚିଟ୍ଫଣ୍ଡ କ୍ଷତିଗ୍ରସ୍ତଙ୍କୁ ସେମାନଙ୍କର ଟଙ୍କା ଫେରାଇ ଦିଆଯିବା ।
- ସମସ୍ତଙ୍କ ପାଇଁ ଖାଦ୍ୟ ସୁରକ୍ଷା ସହିତ ୨୦୨୪ ସୁଦ୍ଧା ଦାଦନ ସମସ୍ୟାର ସମାଧାନ କରାଯିବ ।