ଭୁବନେଶ୍ବର ୨|୭: ବିଧାନସଭା ବଜେଟ ଅଧିବେଶନ । ଆଜି ପ୍ରଶ୍ନ କାଳ ସ୍ବଭାବିକ ରହିଛି । ୨୦୧୭-୧୮ରେ ରାଜ୍ୟରେ ୫୫୦ ଶିଳ୍ପ ସଂସ୍ଥାରେ ୨ ଲକ୍ଷ ୬୬ ହଜାର ୮୫୪ ଜଣଙ୍କୁ ନିଯୁକ୍ତି ଦିଆଯାଇଛି । ଏଥି ମଧ୍ୟରୁ ୩୯ ହଜାର ୮୯୩ ରାଜ୍ୟ ବାହାରର । ସ୍ଥାନୀୟ ଯୁବକଙ୍କୁ ୭୫ ପ୍ରତିଶତ ଭିତ୍ତିରେ ସଂରକ୍ଷଣ ବ୍ୟବସ୍ଥାର ଅନୁପାଳନ ପାଇଁ ପଦକ୍ଷେପ ନିଆଯାଉଛି। କେନ୍ଦୁଝର ଜିଲ୍ଲାରେ ୨୨ଟି ଶିଳ୍ପସଂସ୍ଥାରେ ୧୦ ହଜାର ୫୯୨ ଜଣ ନିଯୁକ୍ତି ପାଇଛନ୍ତି। ଏଥିରୁ ରାଜ୍ୟରୁ ପାଇଛନ୍ତି ୯ ହଜାର ୩୩୯ ଜଣ ନିଯୁକ୍ତି ପାଇଛନ୍ତି। ଖୋର୍ଦ୍ଧାରେ ୭୫୦୯ ଜଣ ନିଯୁକ୍ତି ପାଇଛନ୍ତି ବିଭିନ୍ନ ଶିଳ୍ପସଂସ୍ଥାରେ । ସେଥି ମଧ୍ୟରୁ ୫୩୧ ଜଣ ବାହାର ରାଜ୍ୟରୁ ନିଯୁକ୍ତି ପାଇଛନ୍ତି। ପ୍ରଶ୍ନକାଳରେ ଏ ନେଇ ସୂଚନା ଦେଇଛନ୍ତି ଶ୍ରମ ଓ ନିୟୋଜନ ମନ୍ତ୍ରୀ ସୁଶାନ୍ତ ସିଂହ । ସେପଟେ ରାଜ୍ୟର କୃଷି ଓ କୃଷକ ପ୍ରତି ରାଜ୍ୟ ସରକାର ଉଦାସୀନ । ବିରୋଧୀ କଂଗ୍ରେସ ପକ୍ଷରୁ ଆସିଥିବା ମୁତଲବୀ ପ୍ରସ୍ତାବ ଉପରେ ଆଲୋଚନା ହୋଇପାରେ ।
ଅନ୍ୟପଟେ ୨୦୧୯-୨୦ରେ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା ୭ ହଜାର କିଲୋମିଟର ରାସ୍ତା ନିର୍ମାଣ ପାଇଁ ଲକ୍ଷ୍ୟ ରଖାଯାଇଛି । ସେଥିରୁ ୩ ହଜାର କିଲୋମିଟର ରାସ୍ତା ସବୁଜ ଜ୍ଞାନ କୌଶଳ ଉପଯୋଗ କରି ନିର୍ମାଣ କରାଯିବ । ପ୍ରଶ୍ନକାଳରେ ସୂଚନା ଦେଇଛନ୍ତି ଗ୍ରାମ୍ୟ ଉନ୍ନୟନ ମନ୍ତ୍ରୀ ସୁଶାନ୍ତ ସିଂ ।
ପ୍ରଧାନମନ୍ତ୍ରୀ ସଡ଼କ ଯୋଜନାରେ ବର୍ତ୍ତମାନ ସୁଦ୍ଧା ୬୧ ହଜାର ୫୮୨ କିଲୋମିଟର ରାସ୍ତା ନିର୍ମାଣ ପାଇଁ ମଞ୍ଜୁର ହୋଇଥିଲା। ସେଥିମଧ୍ୟରୁ ୫୫ ହଜାର ୧୩୬ କିଲୋମିଟର ରୋଡ୍ ସମ୍ପୂର୍ଣ୍ଣ ହୋଇଛି । ୫୪୩ଟି ସେତୁରୁ ୨୮୬ଟି ସେତୁ ସମ୍ପୂର୍ଣ୍ଣ ହୋଇଛି। ଏଥିପାଇଁ ମଞ୍ଜୁର ହୋଇଥିଲା ୨୬ ହଜାର ୯ଶହ କୋଟି । ଖର୍ଚ୍ଚ ହୋଇଛି ୨୨ ହଜାର ୮୨୩.୫୪ କୋଟି ଟଙ୍କା। ଆଗରୁ ଏହି ଯୋଜନାର ସମ୍ପୂର୍ଣ୍ଣ ଅର୍ଥ କେନ୍ଦ୍ର ସରକାର ବହନ କରୁଥିଲେ। ଏବେ କେନ୍ଦ୍ର ସରକାର ୬୦ ପ୍ରତିଶତ ଅନୁଦାନ ଦେଉଛନ୍ତି।
