ଭୁବନେଶ୍ବର ୨୬।୧୦: ଆଉ ଜଣେ ଓଡ଼ିଆଙ୍କୁ ଗୁରୁ ଦାୟିତ୍ବ । ଓଡ଼ିଆ ଆଇଏଏସ ଗିରିଶ ଚନ୍ଦ୍ର ମୁର୍ମୁ ହେଲେ ଜାମ୍ମୁ ଓ କାଶ୍ମୀରର ପ୍ରଥମ ଲେଫଟନାଣ୍ଟ ଗଭର୍ଣ୍ଣର ।
ମୟୂରଭଞ୍ଜର ବେତନଟୀ ବାସିନ୍ଦା ଗିରିଶ ମୁର୍ମୁଙ୍କ ପରିବାର ଏବେବି ବେତନଟୀରେ ରହୁଛନ୍ତି । ବାପା ଭାଗବତ ମୁର୍ମୁ ରେଲୱେରେ ବରିଷ୍ଠ ଅଧିକାରୀ ଥିଲେ ଓ ମାଆ ପାର୍ବତୀ ମୁର୍ମୁ ଡାକ ବିଭାଗର ଅଧିକାରୀ ଥିଲେ । ଉତ୍କଳ ବିଶ୍ବବିଦ୍ୟାଳୟରୁ ଡିଗ୍ରୀ ହାସଲ ପରେ ଗିରୀଶଚନ୍ଦ୍ର ୟୁନିଭର୍ସିଟି ଅଫ ବର୍ମିଂହାମରୁ ଏମ୍.ବି.ଏ କରିଥିଲେ । ୧୯୮୫ ବ୍ୟାଚ୍ ଗୁଜରାଟ କ୍ୟାଡର ଆଇଏଏସ ଅଧିକାରୀ ଥିଲେ ଗିରୀଶ ଚନ୍ଦ୍ର ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯେତେବେଳେ ଗୁଜରାଟର ମୁଖ୍ୟମନ୍ତ୍ରୀ ଥିଲେ, ସେତେବେଳେ ଗିରୀଶ ଚନ୍ଦ୍ର ମୁଖ୍ୟ ଶାସନ ସଚିବ ଥିଲେ । ପରେ ସେ ଅର୍ଥ ବିଭାଗରେ ବ୍ୟୟ ସଚିବ ମଧ୍ୟ ଥିଲେ । ଏପରିକି ଦେଶର ରାଜସ୍ବ ବୃଦ୍ଧି ନେଇ ତାଙ୍କର ପ୍ରସ୍ତାବ ଅର୍ଥ ବିଭାଗକୁ ଏକ ନୂଆ ଦିଶା ଦେଇଥିଲା । ତେଣୁ ପ୍ରଧାନମନ୍ତ୍ରୀ ମୋଦିଙ୍କ ଅତ୍ୟନ୍ତ ବିଶ୍ବସ୍ତ ଅଧିକାରୀଙ୍କ ମଧ୍ୟରେ ଗିରୀଶ ଗଣାଯାଇଥାନ୍ତି । ଯେଉଁଥିପାଇଁ ସେ ଜାମ୍ମୁ କାଶ୍ମୀର ଦାୟିତ୍ବ ଗିରୀଶଙ୍କ ଉପରେ ନ୍ୟସ୍ତ କରିଛନ୍ତି ।
ଧାରା ୩୭୦ ଉଚ୍ଛେଦ ପରେ ଜାମ୍ମୁ ଓ କାଶ୍ମୀର ଏକ ରାଜନୈତିକ ପରିବର୍ତ୍ତନ ସମୟ ଦେଇ ଗତି କରୁଛି । ଅକ୍ଟୋବର ୩୧ ତାରିଖରୁ ନୂଆ କେନ୍ଦ୍ର ଶାସିତ ଅଞ୍ଚଳ ଭାବେ ପରିଗଣିତ ହେବ ଜାମ୍ମୁ ଓ କାଶ୍ମୀର । ପ୍ରଥମ ଉପରାଜ୍ୟପାଳ ଭାବେ ଗିରୀଶଚନ୍ଦ୍ରଙ୍କ ଦାୟିତ୍ବ ଗୁରୁତ୍ବପୂର୍ଣ୍ଣ । ଗିରିଶ ମୁର୍ମୁ ଉପରାଜ୍ୟପାଳ ହେବା ଖବର ପ୍ରସାରିତ ହେବାପରେ ବିଭିନ୍ନ ମହଲରୁ ତାଙ୍କୁ ଅଭିନନ୍ଦନର ସୁଅ ଛୁଟିବାରେ ଲାଗିଛି ।
ମୁଖ୍ୟମନ୍ତ୍ରୀ ନବୀନ ଟୁଇଟ୍ କରି ତାଙ୍ଭକୁ ଶୁଭେଚ୍ଛା ଜଣାଇଛନ୍ତି । ଜାମ୍ମୁ ଓ କାଶ୍ମୀରର ଉପରାଜ୍ୟପାଳ ଥିବା ସତ୍ୟପାଲ ମଲ୍ଲିକଙ୍କୁ ଗୋଆ ରାଜ୍ୟପାଳ ଭାବେ ବଦଳି କରାଯାଇଛି । ସେହିପରି ରାଧାକୃଷ୍ଣ ମାଥୁର ଲଦାଖର ଉପରାଜ୍ୟପାଳ ହୋଇଛନ୍ତି ।
