Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଗୁରୁତର ଆର୍ଥିକ ସଙ୍କଟ ଦେଇ ଗତି କରୁଛି ଉତ୍ତର କୋରିଆ, ମାସେ ପରେ ବ୍ଲୁ ପ୍ରିଣ୍ଟ ପ୍ରସ୍ତୁତ କରି ସାମ୍ନାକୁ ଆସିଲେ କିମ୍‌ ଜୋଙ୍ଗ

5/06/2021 at 7:41 PM

ନୂଆଦିଲ୍ଲୀ ୦୫/ ୦୬ : କରୋନା ମହାମାରୀରେ ଭାରତ ସମେତ ଅନେକ ଦେଶ ଏବେ ଆର୍ଥିକ ସଙ୍କଟ ଦେଇ ଗତି କରୁଛନ୍ତି । ଏକଛତ୍ରବାଦୀ ଶାସକ କିମ୍-ଜୋଙ୍ଗ-ଉନଙ୍କ ଉତ୍ତର କୋରିଆ ଏବେ ଗୁରୁତର ଆର୍ଥିକ ସଙ୍କଟ ଦେଇ ଗତି କରୁଛି । ଜନସାଧାରଣ ରୋଜଗାର ହରାଇଥିବା ବେଳେ ଆଗକୁ ସ୍ଥିତି ଆହୁରୀ ଭୟଙ୍କର ହୋଇପାରେ । ତେବେ ଉତ୍ତର କୋରିଆ ସର୍ବେସର୍ବା ଦେଶକୁ ଆର୍ଥିକ ସଙ୍କଟ ମଧ୍ୟରୁ ବାହାର କରିବା ପାଇଁ ଏକ ଗୁରୁତ୍ବପୂର୍ଣ୍ଣ ବୈଠକ କରିଛନ୍ତି ।

ପ୍ରାୟ ମାସେ ପରେ ପ୍ରଥମ ଥର ପାଇଁ ସାର୍ବଜନୀନ ସ୍ଥାନରେ ନଜର ଆସିଛନ୍ତି ଏକଛତ୍ରବାଦୀ ଶାସକ କିମ୍-ଜୋଙ୍ଗ-ଉନ । ଦେଶକୁ ଗୁରୁତର ଆର୍ଥିକ ସଙ୍କଟରୁ ଉଦ୍ଧାର କରିବା ପାଇଁ ପ୍ରସ୍ତୁତ କରିଛନ୍ତି ବ୍ଲୁ ପ୍ରିଣ୍ଟ । ମେରୁଦଣ୍ଡ ଭାଙ୍ଗିପଡିଥିବା ଅର୍ଥବ୍ୟବସ୍ଥାକୁ ଟ୍ରାକକୁ ଆଣିବା ପାଇଁ ବୈଠକରେ ନିଜ ଦଳର ନେତାମାନଙ୍କ ସହିତ ଆଲୋଚନା କରିଛନ୍ତି ।

କୋରିଆନ ସେଣ୍ଟ୍ରାଲ ନ୍ୟୁଜ ଏଜେନ୍ସିର ସୂଚନା ଅନୁଯାୟୀ, ଆତ୍ମ ନିର୍ଭରତା ତଥା ଆତ୍ମ ରୋଜଗାର ପାଇଁ ବିଭିନ୍ନ ପନ୍ଥା ତିଆରି କରୁଛନ୍ତି ଉତ୍ତର କୋରିଆ ସରକାର । ଏହା ସହିତ ଲୋକମାନଙ୍କର ରୋଜଗାର ବଢିବା ଦିଗରେ ମଧ୍ୟ କିଛି ଯୋଜନା ପ୍ରସ୍ତୁତି କରାଯାଇଥିବା ନ୍ୟୁଜ ଏଜେନ୍ସି କହିଛି । ମହାମାରୀ କାରଣରୁ ଉତ୍ତର କୋରିଆକୁ ଲାଗିଥିବା ଅନ୍ୟ ଦେଶମାନଙ୍କର ସୀମାକୁ ସିଲ କରିଦିଆଯାଇଛି । ଯାହା ଫଳରେ ଜିନିଷପତ୍ର ନେବା ଆଣିବା ସମ୍ପୂର୍ଣ୍ଣ ଭାବେ ଠପ୍ ହୋଇଯାଇଛି ।

ଦେଶରେ ଗୁରୁତର ଆର୍ଥିକ ସଙ୍କଟକୁ ନେଇ ଏକଛତ୍ରବାଦୀ ଶାସକ କିମ୍‌ କହିଛନ୍ତି ଯେ, ‘ଦେଶ ଏବେ ଯେଉଁଭଳି ଭାବେ ପ୍ରତିକୂଳ ପରିସ୍ଥିତି ଏବଂ ମାହୋଲକୁ ନେଇ ଗତି କରୁଛି ତାହା ନିହାତି ଭାବେ ଚ୍ୟାଲେଞ୍ଜିଂ । ଏଥର କିନ୍ତୁ ପ୍ରେସ କନଫରେନ୍ସରେ ଆମେରିକା କିମ୍ବା ଦକ୍ଷିଣ କୋରିଆ ବରୁଦ୍ଧରେ ପଦୁଟିଏ ମଧ୍ୟ ଟିପ୍ପଣୀ ଦେଇନାହାନ୍ତି କିମ । ଉତ୍ତର କୋରିଆ ଖୁବ ଶୀଘ୍ର ଗୁରୁତର ଆର୍ଥିକ ସଙ୍କଟରୁ ବାହାରିବ ବୋଲି ଏକଛତ୍ରବାଦୀ ଶାସକ କିମ-ଜୋଙ୍ଗ-ଉନ୍ କହିଛନ୍ତି ।

   Related Posts