ବେଙ୍ଗାଲୁରୁ, ୩୦|୦୫: କର୍ଣ୍ଣାଟକରେ ଆସନ୍ତା ରବିବାର ଦିନ କର୍ଫ୍ୟୁ ପାଳନ ହେବ ନାହିଁ । ଏନେଇ ରାଜ୍ୟ ସରକାର ସୂଚନା ଦେଇଛନ୍ତି । ତେବେ ସନ୍ଧ୍ୟା ୭ଟାରୁ ସକାଳ ୭ଟା ଯାଏଁ କେନ୍ଦ୍ର ସରକାରଙ୍କ ଗାଇଡଲାଇନ୍ ଅନୁସାରେ ରାଜ୍ୟରେ କର୍ଫ୍ୟୁ ଜାରି ରହିବ ବୋଲି ସରକାର କହିଛନ୍ତି । ଏନେଇ ସରକାରଙ୍କ ପକ୍ଷରୁ ବିଜ୍ଞପ୍ତି ମଧ୍ୟ ପ୍ରକାଶ ପାଇଛି । ରାଜ୍ୟବାସୀଙ୍କ ଅନୁରୋଧକ୍ରମେ ପ୍ରତି ରବିବାର ହେଉଥିବା ରବିବାର କର୍ଫ୍ୟୁକୁ ହଟାଯାଇଛି ବୋଲି କହିଛନ୍ତି ରାଜ୍ୟର ମୁଖ୍ୟ ଶାସନ ସଚିବ ଟିଏମ ବିଜୟ ଭାସ୍କର ।
ସରକାରଙ୍କ ନିର୍ଦ୍ଦେଶ ଅନୁସାରେ, ରାଜ୍ୟରେ ରବିବାରଠାରୁ ସମସ୍ତ ବସ ଚଳାଚଳ କରିବ । ଅତିକମରେ ୩୫୦୦ ବସ୍ ପ୍ରାଥମିକ ପର୍ଯ୍ୟାୟରେ ଚଳାଚଳ କରିବ ।
ଲକଡାଉନ୍ ୪.୦ ଆରମ୍ଭ ହେବା ପରେ କର୍ଣ୍ଣାଟକ ସରକାର ରବିବାର ଦିନ ରାଜ୍ୟରେ ସଟଡାଉନ୍ ଲାଗୁ କରାଯିବ ବୋଲି ନିର୍ଦ୍ଦେଶ ଦେଇଥିଲେ । ଗତ ରବିବାର ଦିନ ଇଦ୍ ସମୟରେ ମଧ୍ୟ ରାଜ୍ୟ ସମ୍ପୂର୍ଣ୍ଣ ଭାବେ ସଟଡାଉନ୍ ରହିଥିଲା । ଏହାକୁ ନଜରରେ ରଖି ସରକାର ଶନିବାର ସନ୍ଧ୍ୟାରୁ ହିଁ ରାଜ୍ୟରେ କର୍ଫ୍ୟୁ ଲାଗୁ କରିଥିଲେ ।
ସୂଚନାଯୋଗ୍ୟ, ଶୁକ୍ରବାର କର୍ଣ୍ଣାଟକରେ ୨୪୮ ଜଣ କରୋନା ସଂକ୍ରମିତ ସୁସ୍ଥ ହୋଇଥିଲେ । ଯାହା ଗୋଟିଏ ଦିନରେ ସର୍ବାଧିକ । ରାଜ୍ୟରେ ଏବେସୁଦ୍ଧା ମୋଟ କରୋନା ସଂକ୍ରମିତଙ୍କ ସଂଖ୍ୟା ୨୭୮୧ ଥିବା ବେଳେ ୧୮୩୭ଟି ସକ୍ରିୟ କେସ୍ ରହିଛି । ଏହାସହ ୪୮ଜଣ ପ୍ରାଣ ହରାଇ ସାରିଥିବା ବେଳେ ୮୯୪ଜଣ ସୁସ୍ଥ ହୋଇ ମେଡିକାଲରୁ ଡିସଚାର୍ଜ ହୋଇଛନ୍ତି ।
