ଲକ୍ଷ୍ନୌ, ୦୮|୦୫: ଲକଡାଉନ୍ ପାଇଁ ବିଭିନ୍ନ ରାଜ୍ୟରେ ମଦ ଦୋକାନ ବନ୍ଦ ରହିଛି । କିଛି ରାଜ୍ୟରେ ସାମାଜିକ ଦୂରତା ରକ୍ଷା କରି ମଦ ଦୋକାନ ଖୋଲାଯାଇଥିବା ବେଳେ ଆଉ କିଛି ସ୍ଥାନରେ ଅନଲାଇନରେ ମଦ ଡେଲିଭରୀ ହେଉଛି । ଆହୁରି ମଧ୍ୟ କିଛି ସ୍ଥାନରେ ଲୁଚାଛପାରେ ଚଢା ଦରରେ ମଦ ବିକ୍ରି କରାଯାଉଥିବା ଅଭିଯୋଗ ଆସୁଛି ।
ମଦ ପିଉଥିବା ବ୍ୟକ୍ତିଙ୍କ ପାଇଁ ଖୁସି ଖବର । ଏବେ ମଦର ନିର୍ଧାରିତ ମୂଲ୍ୟଠୁ ଅଧିକ ଦାମରେ ବିକ୍ରି କରାଗଲେ ଦୋକାନୀଙ୍କ ଉପରେ ଜରିମାନା ଲାଗିବ । ଅବକାରୀ ବିଭାଗ ଏହି ମାମଲାରେ ଦୋକାନୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବ । ଉତ୍ତର ପ୍ରଦେଶ ଅବକାରୀ ଆୟୋଗ ସଞ୍ଜୟ ଆର୍ ଭୁସରେଡ୍ଡୀ ଏନେଇ ସୂଚନା ଦେବା ସହ ଗ୍ରାହକଙ୍କୁ ଅପିଲ ମଧ୍ୟ କରିଛନ୍ତି । ଦୋକାନୀ ଏମଆରପିଠାରୁ ଅଧିକ ଦାମ ନେଲେ ଗ୍ରାହକମାନେ ଅଭିଯୋଗ କରିପାରିବେ ବୋଲି ଆୟୋଗ କହିଛନ୍ତି ।
ଅବକାରୀ ବିଭାଗର ପ୍ରମୁଖ ସଚିବ କହିଛନ୍ତି ଯେ, ଏପରି ମାମଲା ସାମ୍ନାକୁ ଆସିଲେ ଏହାକ ତଦନ୍ତ କରାଯିବ । ଯଦି ଅଭିଯୋଗ ସତ ପ୍ରମାଣିତ ହୁଏ ତେବେ ଦୋକାନୀଙ୍କ ଉପରେ ୭୫ ହଜାର ଟଙ୍କା ଜରିମାନା ଲାଗିବ । ଦ୍ୱିତୀୟ ଥର ସମାନ ଅଭିଯୋଗ ଆସିଲେ ଜରିମାନା ରାଶି ୧.୫୦ ଲକ୍ଷ ହୋଇଯିବ । ସେହିପରି ତୃତୀୟ ଥର ଧରାପଡିଲେ ଦୋକାନର ଲାଇସେନ୍ସ ବାତିଲ ହେବ । ଅବକାରୀ ବିଭାଗ ତରଫରୁ ସମସ୍ତ ଅଧିକାରୀଙ୍କୁ ଏନେଇ ନିର୍ଦ୍ଦେଶ ଦିଆଯାଇଛି ।
