ଭୁବନେଶ୍ବର ୨୦|୧୨: କୃଷିଋଣ ଛାଡ ପ୍ରସ୍ତାବକୁ ନୀତି ଆୟୋଗଙ୍କ ନା । କୃଷିଋଣ ଛାଡ ନକରି ବରଂ କୃଷକଙ୍କ ଆୟ ୨ ଗୁଣା କରାଯାଉ । ଏହା ଦେଶର ଅର୍ଥନୀତିକୁ ଅଧିକ ଫାଇଦା ଦେବ ବୋଲି ନୀତି ଆୟୋଗ ମତ ଦେଇଛି । ହେଲେ ରାଜନୈତିକ ଦଳଗୁଡ଼ିକ କୌଣସି ରିସ୍କ ନେବାକୁ ଚାହୁଁନାହାଁନ୍ତି । କୃଷିଋଣ ଛାଡ କରି ସେମାନେ ନିର୍ବାଚନୀ ସଫଳତା ଗୋଟାଇବା ଯୋଜନାରେ ଅଛନ୍ତି । ....
କୃଷକଙ୍କ ଲୋନ୍ ଛଡାଯିବା ଉଚିତ କି ନା ତାକୁ ନେଇ ସାରା ଦେଶରେ ବିତର୍କ ଚାଲିଥିବା ବେଳେ ନୀତି ଆୟୋଗଙ୍କ ନାସ୍ତିକ ବାଣି ଏହି ଚର୍ଚାକୁ ପୁଣି ଖୋରାକ ଯୋଗାଇଛି । ଆଗରୁ ରଘୁରାମ ରାଜନଙ୍କ ଭଳି ଅନେକ ଅର୍ଥନୀତିଜ୍ଞ କୃଷିଋଣ ଛାଡ ବିରୋଧରେ ମୁହଁ ଖୋଲି ସାରିଛନ୍ତି । ଏବେ ଦେଶର ଥିଙ୍କ୍ ଟ୍ୟାଙ୍କ କୁହାଯାଉଥିବା ନୀତି ଆୟୋଗ ବି ସମାନ ମତ ରଖିଲେଣି । ଋଣଛାଡ ଏକ ଦୀର୍ଘ ମିଆଦି ସମାଧାନ ନୁହେଁ ବରଂ ଏହା ଦ୍ବାରା ଦେଶ ଓ ରାଜ୍ୟର ଅର୍ଥନୀତି ଉପରେ କୁପ୍ରଭାବ ପଡିବ ବୋଲି ନୀତି ଆୟୋଗଙ୍କ ମତ ।
ରାଜନୈତିକ ଦଳଗୁଡ଼ିକ କିନ୍ତୁ ଏଭଳି ପରାମର୍ଶ ଶୁଣିବା ମୁଡରେ ନାହାଁନ୍ତି। ସବୁ ରାଜ୍ୟ ଯେଭଳି କୃଷିଋଣ ଛାଡ କରିବାକୁ କମ୍ପିଟିସନରେ ମାତିଛନ୍ତି । କୃଷକଙ୍କ ସମସ୍ୟା ସମାଧାନ ସହ କୃଷିଋଣ ଛାଡ ପ୍ରତିଶୃତି ଦେଇ କଂଗ୍ରେସ ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡରେ କ୍ଷମତାକୁ ଆସିବାରେ ସବୁ ଦଳ ଏବେ କୃଷକଙ୍କ ନାଁରେ ନିର୍ବାଚନ ବୈତରଣୀ ପାର ହେବାକୁ ବ୍ୟାକୁଳ ହେଉଛନ୍ତି । ଓଡିଶାରେ ଦୁଇ ପ୍ରମୁଖ ବିରୋଧିଦଳବିଜେପି ଓ କଂଗ୍ରେସ କୃଷି ଋଣ ଛାଡ ଦାବି କରିବାପରେ ବିଜେଡି ମଧ୍ୟ ଚାପରେ ଅଛି । ଏଦିଗରେ ସରକାର ଅନୁଧ୍ୟାନ କରୁଥିବା ନେଇ ଗତ କାଲି ବି ନବୀନ ସୂଚନା ଦେଇସାରିଛନ୍ତି । ରାଜ୍ୟ ଅର୍ଥ ମନ୍ତ୍ରୀ ଯୁକ୍ତି କରିଛନ୍ତି ଯଦି ଶିଳ୍ପପତିଙ୍କର ଲକ୍ଷାଧିକ କୋଟିର ଋଣ ଛାଡ କରିବାରେ ଅସୁବିଧା ହେଉନି ତାହେଲେ କୃଷକଙ୍କ ପାଇଁ ହେଲେ ଅସୁବିଧା କଣ ଅଛି । ଅର୍ଥମନ୍ତ୍ରୀ ଶଶିଭୁଷଣ ବେହେରାଙ୍କ ଏଭଳି ମନ୍ତବ୍ୟରୁ ଜଣା ପଡୁଛି ରାଜ୍ୟମଧ୍ୟ କୃଷି ଋଣ ଛାଡ କରିବା ଦିଗରେ ଚିନ୍ତା କରୁଛି ।
ନୀତି ଆୟୋଗଙ୍କ ଯୁକ୍ତି, କୃଷିଋଣ ଛାଡ କଲେ ଓଡିଶା ଭଳି ଅନେକ ଗରିବ ରାଜ୍ୟରେ ମାତ୍ର ୧୦ରୁ ୧୫ ପ୍ରତିଶତ ଚାଷୀ ଉପକୃତ ହେବେ । ତେଣୁ କୃଷି ଋଣ ସିଧାସଳଖ ଛାଡ ନକରି କୃଷକଙ୍କ ରୋଜଗାର କିଭଳି ବଢିବ ସେ ଦିଗରେ ଯୋଜନା ହେବା ଦରକାର ବୋଲି ନୀତି ଆୟୋଗ କହିଛନ୍ତି