ସିଡନୀ,୦୭/୦୧:   ବିଶ୍ୱର ସବୁଠାରୁ ବୟସ୍କ ପ୍ରଥମ ଶ୍ରେଣୀ କ୍ରିକେଟର ଆଲାନ ବରଜେସ୍ ୧୦୦ ବର୍ଷ ବୟସରେ ପ୍ରାଣ ତ୍ୟାଗ କରିଛନ୍ତି । ଏନେଇ ନ୍ୟୁଜିଲାଣ୍ଡ କ୍ରିକେଟ ବୋର୍ଡ ପକ୍ଷରୁ ବୁଧବାର  ସୂଚନା ଦିଆଯାଇଛି । ଦକ୍ଷିଣହାତୀ ବ୍ୟାଟସମ୍ୟାନ୍ ତଥା ବାମହାତୀ ସିମର୍ ଭାବେ ସେ କ୍ରିକେଟ ଖେଳୁଥିଲେ । ସେ ୧୯୪୦ରୁ ୧୯୫୨ ଯାଏଁ ୧୧ଟି ପ୍ରଥମ ଶ୍ରେଣୀ ମ୍ୟାଚ୍ ଖେଳିଛନ୍ତି । ସେ ଓଟାଗୋ ବିପକ୍ଷରେ ନିଜର ପଦାର୍ପଣ ମ୍ୟାଚରେ ୫୨ ରନ୍ ଦେଇ ୬ଟି ଓ୍ୱିକେଟ୍ ନେଇଥିଲେ ।

ନ୍ୟୁଜିଲାଣ୍ଡ କ୍ରିକେଟ୍ ବୋର୍ଡ କହିଛି ଯେ, ଏହା ଏକ ଦୁଃଖଦ ଖବର । ସେ ବିଶ୍ୱର ସବୁଠୁ ବୟସ୍କ ପ୍ରଥମ ଶ୍ରେଣୀ କ୍ରିକେଟର ଥିଲେ । ଆଲାନଙ୍କ ଝିଅ ପିପ୍ କହିଛନ୍ତି ଯେ, ତାଙ୍କ ପିତା ବୁଧବାର ମଧ୍ୟରାତ୍ରରେ ଦେହତ୍ୟାଗ କରିଛନ୍ତି । ସେ ଚାର୍ଲସ୍ ଉପହାମ ରିଟାୟରମେଣ୍ଟ୍ ଗ୍ରାମରେ ରହୁଥିଲେ ।

ଆଲାନଙ୍କ ପରେ ଓଟାଗୋର ୯୮ ବର୍ଷୀୟ ଇଆନ୍ ଗାଲାଓ୍ୱେ ଏବେ ନ୍ୟୁଜିଲାଣ୍ଡର ଜୀବିତ ବୟୋଜେଷ୍ଠ କ୍ରିକେଟର ଅଟନ୍ତି । ସେହିପରି ଭାରତୀୟ ଖେଳାଳି ରଘୁନାଥ ଚନ୍ଦୋରକର ମଧ୍ୟ ବିଶ୍ୱର ବୟୋଜେଷ୍ଠ ପ୍ରଥମ ଶ୍ରେଣୀ ମ୍ୟାଚ୍ ଖେଳିଥିବା ଜୀବିତ କ୍ରିକେଟର ଅଟନ୍ତି ।