ନୂଆଦିଲ୍ଲୀ ୨୧|୬: ପୂର୍ବ ଏନଡିଏ ସରକାର ସମୟରେ ରାଜ୍ୟସଭାରେ ପାରିତ ହୋଇପାରିନଥିବା ‘ଟ୍ରିପଲ ତଲାକ୍’ ବିଲ୍ ନୂଆ ରୂପରେ ଆଜି ଲୋକସଭାରେ ଆଗତ ହେବ । ମୁସଲିମ୍ ମହିଳା ବିବାହ ଅଧିକାର ସୁରକ୍ଷା ବିଲ୍ ୨୦୧୯ ନାମରେ ନାମିତ ଏହି ବିଲ୍ ପୂର୍ବ ସରକାର ଫେବୃଆରୀ ମାସରେ ଆଣିଥିବା ଅଧ୍ୟାଦେଶର ସ୍ଥାନ ନେବ ।
ଏହି ବିଲ୍ ପାରିତ ହେଲେ ତତ୍କାଳ ତିନି ଥର ତଲାକ୍ କହି ଛାଡ଼ପତ୍ର ଦେଉଥିବା ମୁସଲିମ୍ ପୁରୁଷଙ୍କୁ ୩ ବର୍ଷର ଜେଲ ହୋଇପାରିବ । ଏହି ବିଲ୍ କୁ କଂଗ୍ରେସ ସମେତ ଅନେକ ବିରୋଧୀ ଦଳ ବିରୋଧ କରୁଥିଲେ । ସେମାନଙ୍କ କହିବା ଅନୁଯାୟୀ ଏହା ଘରୋଇ ମାମଲା ଏଥିରେ ଜେଲଦଣ୍ଡ କିପରି ରହିପାରିବ ।
ସରକାର ଯୁକ୍ତି ବାଢ଼ିଥିଲେ, ଏହା ବହୁଦିନ ଧରି କଷ୍ଟ ସହି ଆସୁଥିବା ମହିଳାଙ୍କ ପାଇଁ ଆଶ୍ୱସ୍ତି ହେବ।ଏହା ସେମାନଙ୍କୁ ସମାନ ଅଧିକାର ପ୍ରଦାନ କରିବ । ନୂଆ ବିଲ୍ ଏହି ଅଧ୍ୟାଦେଶର ନକଲ । ୧୭ତମ ଲୋକସଭାର ପ୍ରଥମ ଅଧିବେଶନରେ ଏହି ବିଲ ସମେତ ୧୦ଟି ଅଧ୍ୟାଦେଶକୁ ଆଇନରେ ପରିଣତ କରିବାର ଯୋଜନା କରିଛନ୍ତି ଏନଡିଏ ସରକାର ।
